Երեւան։ Մեդիամաքս։ «Հին Երեւան» նախագծի ճարտարապետ Լեւոն Վարդանյանի արվեստանոցում կայացել է ՀՀ ԿԳՄՍ նախարարությանը կից գիտամեթոդական խորհրդի նիստը, որի ընթացքում քննարկվել է «Հին Երեւան» թաղամասի էսքիզային նախագիծը՝ Աբովյան փողոցից Քոչինյան փողոց ընկած հատվածը:
ԿԳՄՍ նախարարությունից հայտնում են, որ նախարար Ժաննա Անդրեասյանը նիստում, մասնավորապես, ասել է.
«Մենք շատ հարցեր կարող ենք բարձրացնել այս գործընթացի վերաբերյալ՝ ե՞րբ է սկսվել, ինչպե՞ս է սկսվել, արդյոք պե՞տք է սկսվեր, թե՞ ոչ: Բոլորս անցնում ենք այդ տարածքով եւ տեսնում դեռեւս կանգուն հուշարձան-շենքերի՝ օրեցօր վատթարացող վիճակը: Իդեալական վիճակ չունենք եւ չենք կարող ունենալ, որովհետեւ գտնվում ենք ինչ-որ գործընթացի միջնամասում: Կան սկսված աշխատանքներ, եւ պետք է հասկանալ, թե ինչպե՞ս կարող ենք առավել արդյունավետ վարվել ստեղծված իրավիճակում: Փաստ է, որ մենք արդեն խոսում ենք վեր կանգնած բարձրահարկ շենքերի մասին, հազարավոր մարդկանց եւ նրանց սեփականության իրավունքի մասին, որոնց հետ պարտավոր ենք հաշվի նստել: Հետեւաբար անհրաժեշտ է գտնել փաստացի իրավիճակից բխող լուծումը, ոչ թե վերադառնալ մի վայր, որտեղ վերադառնալն այլեւս անհնար է»:
ԿԳՄՍ նախարարությունից հայտնում են, որ նախագծի հայեցակարգով պարագծային կառուցապատումն ունի 4 վերգետնյա հարկ, որից երկուսը կազմում է հուշարձանների շարքը, իսկ մյուս երկուսը՝ վերնահարկը: Ավելացված հարկերը հետ են քաշված կառուցապատման հիմնական ճակատից և փողոցի կողմից չեն ընկալվում: Նախատեսվում է նաև 3 ստորգետնյա հարկ, որից մեկը հուշարձանների մառանային հարկն է՝ հասարակական օգտագործման նպատակով: Մյուս երկու ստորգետնյա հարկերը տրամադրվում են ավտոկայանատեղիների նպատակով: Դաստակերտների առանձին այգիները և բակերը միավորված են՝ ստեղծելով ընդհանուր կանաչ գոտի և երկայնական հետիոտն ճանապարհ: Ներսի ճակատներում վերականգնվում են փայտյա բաց պատշգամբները՝ իրենց ուրվագծերով կազմելով առանձին ներդաշնակ անկյուններ ընդհանուր տարածության մեջ:
Ներքին բաց տարածքները ծածկված են հին Երևանի առևտրական թաղերին բնորոշ թաղակապ ծածկով, բայց ժամանակակից ապակյա արևակլանող նյութով, որը գործառնական տեսակետից կապահովի տարածքի հարմարավետ օգտագործումն ամբողջ տարվա ընթացքում՝ գեղագիտական տեսանկյունից ստեղծելով ավանդական երևանյան բակերին բնորոշ կամերային միջավայր:
Ըստ նախագծի՝ տեղում պահպանված 14 հուշարձան-շենքերի հետ մեկտեղ, որոնք պահպանվում և վերականգնվում են իրենց ծավալատարածական և հատակագծային լուծումներով, թաղամասը կհամալրվի նաև վերջին տարիներին քանդված կամ ապամոնտաժված ևս 7 այլ պատմական շենքերով, որոնք նախորդ տարիներին ընդգրկվելով տեղափոխման պետական ցուցակի մեջ՝ ապամոնտաժվել էին՝ իրենց տեղը զիջելով նորակառույց բարձրահարկ կառուցապատմանը:
Նախարարությունից հայտնում են, որ քննարկումների եւ տեղի ունեցած քվեարկության արդյունքում «նախագիծը որոշակի վերապահումներով արժանացել է հավանության»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: