Երեւան: Մեդիամաքս: Հայաստանի երկրորդ նախագահի գրասենյակի ղեկավար Վիկտոր Սողոմոնյանն այսօր ասել է, որ Ռոբերտ Քոչարյանի դեմ հարուցված քրեական գործն ու կալանավորումն ապօրինի են:
«Սա քաղաքական եւ անձնական հաշվեհարդար է: Գործը իրավական որեւէ հիմնավորում չունի եւ չի կարող ունենալ», - ասել է Վիկտոր Սողոմոնյանն այսօր կայացած մամուլի ասուլիսում:
«Ամեն ինչ ակնհայտ է: Մեզ մնում է պարզել, թե Բերիան ով է, եւ ես վստահեցնում եմ, որ մենք նրան գտնելու ենք ու այդ Բերիան պատժվելու է: Սա Հայաստանի Հանրապետությունն է, այստեղ իրավական բեսպրեդել չի լինելու», - շեշտել է Վիկտոր Սողոմոնյանը:
«Քոչարյանն ազատ է արձակվելու, իրեն ապօրինի հետապնդողները պատժվելու են՝ մենք օգտագործելու ենք քաղաքական ու իրավական պայքարի բոլոր գործիքները», - ավելացրել է նա:
Մարդու իրավունքների պաշտպան Արման Թաթոյանմ այսօր հայտնել է, որ այցելել է ՀՀ երկրորդ նախագահ Ռոբերտ Քոչարյանին «Երեւան-Կենտրոն» քրեակատարողական հիմնարկում:
ՄԻՊ-ից հայտնում են, որ պաշտպանն առանձնազրույց է ունեցել Ռոբերտ Քոչարյանի հետ, ուսումնասիրվել են պահման պայմանները: Բարձրացված մի շարք հարցեր առանձնազրույցից անմիջապես հետո քննարկվել են քրեակատարողական հիմնարկի վարչակազմի հետ եւ ստացել լուծում:
Ռոբերտ Քոչարյանի կողմից չեն ներկայացվել դժգոհություններ քրեակատարողական հիմնարկի ծառայողների վերաբերմունքից:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: