Երեւան: Մեդիամաքս: Հայաստանի պաշտպանության նախարար Վաղարշակ Հարությունյանն այսօր Սյունիքում ՌԴ խաղաղապահ զորախմբի սպաների հետ հանդիպմանը քննարկել է Գորիս-Ստեփանակերտ ավտոճանապարհի հսկողության հարցերն ու Հայաստանի՝ Ադրբեջանի հետ սահմանի Սյունիքի հատվածում ռուսաստանցի սահմանապահների տեղակայման ծրագիրը:
ՀՀ ՊՆ մամուլի ծառայությունից հայտնում են, որ հանդիպմանը անդրադարձ է եղել նաեւ պատերազմի հետեւանքով անհայտ կորած անձանց որոնողական աշխատանքներին եւ առաջիկա անելիքներին:
Սյունիքի մարզում Վաղարշակ Հարությունյանը նաեւ աշխատանքային խորհրդակցություն է անցկացրել զորամիավորման հրամանատարի, Սյունիքի մարզպետի եւ ԱԱԾ սահմանապահ զորքերի տարածքային ստորաբաժանման հրամանատարի մասնակցությամբ:
Խորհրդակցության ընթացքում քննարկվել են Հայաստանի եւ Ադրբեջանի սահմանազատման, նոր ձեւավորվող բնագծերում զինված ուժերի ստորաբաժանումների եւ սահմանապահ զորքերի տեղակայման հետ կապված հարցեր:
Պաշտպանական գերատեսչության ղեկավարը հանձնարարականներ է տվել սահմանային բանակցություններին մասնակցող բարձրաստիճան սպաներին զորքերի տեղակայման, պահպանության տեղամասերի ստեղծման, ըստ ուղղությունների՝ նոր միավորների ձեւավորման գործընթացի վերաբերյալ: Զորամիավորման հրամանատարը եւ Սյունիքի մարզպետը ներկայացրել են վիճահարույց որոշ հատվածներում իրականացվող աշխատանքները, ընդգծել, որ կողմերի միջեւ սահմանային քննարկումները շարունակվում են:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: