Երեւան: Մեդիամաքս: Բրեվիս ընկերությունը 2020 թ. մայիսին հետազոտություն է անցկացրել՝ կորոնավիրուսի դեմ պատվաստանյութի ստեղծման վերաբերյալ հայաստանցիների տրամադրություններն ու սպասումները պարզելու նպատակով։

Հարցվածների մոտ 17%-ը համաճարակի հաղթահարումը Հայաստանում կապում է պատվաստանյութի ստեղծման հետ։

Պատվաստանյութի առկայության դեպքում յուրաքանչյուր 3-րդ հայաստանցի (հարցվածների 32%-ը) չի գնա պատվաստվելու։ Մի փոքր ավելի է նրանց թիվը, ովքեր լիովին հավանական են համարում, որ կպատվաստվեն՝ 36%:

Հարցվածների գրեթե կեսը՝ 44%-ը, հավանական է համարել, որ պատվաստանյութը կստեղծվի արդեն այս տարի, մոտ 16%-ը  որպես հավանական ժամկետ նշել է 2021-ը, իսկ ավելի քան 10%-ը կարծիք է հայտնել, որ պատվաստանյութը կստեղծվի 2021-ից հետո։

Կան նաեւ հոռետեսորեն տրամադրվածներ (9%), որոնք անհավանական են համարում պատվաստանյութի ստեղծումը։

Հետազոտությունը կատարվել է այս տարվա մայիսի 15-25-ն ընկած ժամանակահատվածում, Երեւանում եւ Հայաստանի 10 մարզերում հեռախոսային հարցումների միջոցով 1620 բնակիչների շրջանում։