Երեւան: Մեդիամաքս: Փոխվարչապետ Տիգրան Ավինյանի խորհրդական Ավետիք Էլոյանի մասին Կադաստրի պետական կոմիտեի նախկին ղեկավար Սարհատ Պետրոսյանի ներկայացված տեղեկատվությունը ստուգվել է իրավապահ մարմինների կողմից եւ քրեական գործի հարուցումը մերժվել է։
Այդ մասին այսօր հայտնել է AM իրավաբանական ընկերությունը՝ նշելով, որ ստանձնել է Ավետիք Էլոյանի շահերի պաշտպանությունը:
«Կադաստրի պետական կոմիտեի նախկին ղեկավար Սարհատ Պետրոսյանը զրպարտող տեղեկատվություն է տարածել առ այն, որ փոխվարչապետ Տիգրան Ավինյանի խորհրդական Ավետիք Էլոյանը իբր կապված է կոռումպացվածության հետ ու պատվերներ է ստանում պաշտոնի չարաշահման շնորհիվ։ Տեղեկատվությունը չի համապատասխանում իրականությանը` ստուգվել է նաեւ իրավապահ մարմինների կողմից եւ քրեական գործի հարուցումը մերժվել է։
Նշվածի հետ կապված Ավետիք Էլոյանը դիմել է «AM» իրավաբանական ընկերություն, ինչից հետո ընկերության փաստաբան Վանիկ Մարգարյանը ստանձնել է վերջինիս շահերի պաշտպանությունը, եւ հայցադիմում է ներկայացվել դատարան` հերքման պահանջով։
Սարհատ Պետրոսյանը 10.01.2020թ․ հրապարակայնորեն նշել է, թե նշված գործի շարունակումը Ավետիք Էլոյանի շահերից չի բխում, եւ իբր հայցն արդեն մերժվել է, ինչը չի համապատասխանում իրականությանը։ Հայցադիմումը վերադարձվել է դատարանի կողմից ձեւական պատճառներով եւ դատավարական ժամկետների խախտումներով, ինչից հետո հայցը կրկին ներկայացվել է 27.12.2019թ–ին։ Հայցադիմումը վարույթ ընդունելու հարցով որոշումը դեռեւս առկա չէ։ Նշված գործը եւ հետագա նրա ընթացքը չի բխում բացառապես Սարհատ Պետրոսյանի շահերից, ում արտահայտություններում զրպարտության առկայությունը անվիճելի է, ինչն ի վերջո «AM» իրավաբանական ընկերության ջանքերով վերջինիս համար հանգեցնելու է օրենքով սահմանված պատասխանատվության», - ասված է ընկերության հաղորդագրության մեջ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: