Երեւան: Մեդիամաքս: Ռուսաստանը ցանկանում է, որ Հարավային Կովկասը տրանսպորտային եւ առեւտրա-տնտեսական առումով առավելագույնս բաց լինի:

Այդ մասին ասել է ՌԴ փոխարտգործնախարար Անդրեյ Ռուդենկոն «Ռոսիյա Սեգոդնյա»-ին տված հարցազրույցում՝ մեկնաբանելով այն ենթադրությունը, որ Ռուսաստանի եւ Վրաստանի միջեւ 2011 թ. կնքված եւ փաստացի չգործող մաքսային վարչարարության մասին համաձայնագիրը կարող է ոչ արդիական դառնալ, քանի որ առաջացել է Ադրբեջանի տարածքով Ռուսաստանից Հայաստան տրանսպորտային ուղի ունենալու հեռանկարը:

«Ռուսաստանը հետեւողականորեն դեմ է ցանկացած առեւտրային շրջափակումներին եւ սահմանափակումներին, այդ թվում ՝ Հարավային Կովկասում, որն իր աշխարհագրական դիրքի շնորհիվ հանդիսանում է առեւտրի ուղիների բնական խաչմերուկ: Տնտեսական եւ տրանսպորտային կապերի ապաշրջափակումը համապատասխանում է այս տարածաշրջանի բոլոր երկրների ռազմավարական շահերին: Այս ձգտումը արձանագրվել է Ռուսաստանի, Ադրբեջանի եւ Հայաստանի ղեկավարների 2020թ. նոյեմբերի 9-ի եռակողմ հայտարարության մեջ, ինչպես նաեւ այս տարվա հունվարի 11-ին Մոսկվայում կայացած գագաթնաժողովի արդյունքներով:

Այս հիմքի վրա մենք արդեն սկսել ենք համապատասխան աշխատանքները Բաքվի եւ Երեւանի հետ: Միեւնույն ժամանակ, մենք չենք մոռանում ավելի լայն համատեքստը՝ նկատի ունենալով Հարավային Կովկասի կայունության եւ բարգավաճման ապահովմանը նպաստելու մեր մյուս գործընկերների հնարավորություններն ու ցանկությունը: Փաստացի, մենք խոսում ենք տարածաշրջանի բոլոր դերակատարների ջանքերը համադրելու հնարավորության մասին, որպեսզի Հարավային Կովկասը տրանսպորտային եւ առեւտրա-տնտեսական առումով առավելագույնս բաց լինի», - ասել է ռուսաստանցի դիվանագետը:

Ինչ վերաբերում է Վրաստանի հետ ստորագրված համաձայնագրին, ապա, ըստ Ռուդենկոյի, «ռուսական կողմը տրամադրված է շարունակել կառուցողական աշխատանքը եւ գտնել փոխընդունելի լուծումներ, որպեսզի 2011-ի համաձայնագիրն աշխատի հնարավորինս արագ»: