Երեւան: Մեդիամաքս: ՀՀ նախագահի աշխատակազմի Հասարակայնության հետ կապերի վարչության պետի պաշտոնակատար է նշանակվել Զոյա Բարսեղյանը։

Այս մասին Մեդիամաքսին հայտնեց ՀՀ նախագահի օգնական Հասմիկ Պետրոսյանը։ 

Զոյա Բարսեղյանը լրագրության  ու հանրային կապերի ոլորտում աշխատանքի մեծ փորձ ունի։ Բազային կրթությամբ լրագրող է, երկար տարիներ աշխատել է  «Արմենպրես» լրատվական գործակալությունում, սկզբում՝ որպես լրագրող, 2004 թվականից՝ որպես փոխտնօրեն-գլխավոր խմբագիր։ 

2010-2014 թթ. եղել է ՀՀ տարածքային կառավարման նախարարության  Հասարակայնության հետ կապերի բաժնի պետը, 2014-2016 թվականներին ղեկավարել է «Հայաստանի զարգացման նախաձեռնություններ» (IDeA) հիմնադրամի Հանրային կապերի բաժինը։  

2017 թվականի սեպտեմբերից մինչև 2018 թ․ մայիսը եղել  է ՀՀ կառավարության աշխատակազմի Տեղեկատվության և հասարակայնության հետ կապերի վարչության պետը։ 2011-2013 թվականներին «Հանրային կապեր» է դասավանդել ԵՊՀ Ժուռնալիստիկայի ֆակուլտետում։ 

Ավարտել է Հայաստանի պետական կառավարման ակադեմիան՝ ստանալով քաղաքագիտության մագիստրոսի որակավորում, ինչպես նաև  Հայաստանի ամերիկյան համալսարանը՝ իրավագիտության մագիստրոսի որակավորմամբ։