Երեւան: Մեդիամաքս: ՀՀ Զինված ուժերի պատրաստության 2021թ.-ի առաջին կիսամյակի պլանի համաձայն, մարտի 16-ից 20-ը բոլոր օպերացիոն ուղղություններում անցկացվելու են մարտավարական եւ մարտավարամասնագիտական համատեղ զորավարժություններ:

ՊՆ հաղորդագրության համաձայն՝ համազորային, զորատեսակների եւ հատուկ զորքերի ստորաբաժանումների ընդգրկմամբ զորավարժությունները նպատակ ունեն.

- ստուգել զորքերի մարտունակությունը, օպերատիվ օղակի կառավարման կարողությունները եւ ստեղծված իրավիճակում արագ գործելու ունակությունները,

- ճշտել հաստիքային, տրված եւ աջակցող ուժերի ու միջոցների փոխգործակցության հարցերը,

- անցկացնել ստորաբաժանումների եւ կրակի կառավարման մարզումներ՝ օպերատիվ-մարտավարական դրվագների խաղարկմամբ, ինչպես մարտական, այնպես էլ ոչ մարտական հրաձգություններով:

Մարտավարական եւ մարտավարամասնագիտական զորավարժություններին ընդգրկվում են շուրջ 7500 զինծառայող, շուրջ 200 հրթիռային, ռեակտիվ-հրետանային եւ հրետանային, ավելի քան 150 հակատանկային միջոցներ, շուրջ 100 զրահատեխնիկա, ավելի քան 90 հակաօդային պաշտպանության միջոցներ: Զորքերի մարտավարական գործողություններին աջակցելու համար զորավարժություններին կներգրավվեն նաեւ օդային հարձակման միջոցներ (ավիացիա):