Երեւան: Մեդիամաքս: Երեւանում կայացել է ՀՀ Գիտությունների ազգային ակադեմիայի արտասահմանյան անդամ, պատմագիտության դոկտոր Արմեն Կլոդ Մութաֆյանի «Լեւանտյան Հայաստան(11-14-րդ դդ.)» (L'Arménie du Levant (XIe-XIVe siècle) գրքի շնորհանդեսը:
«Այս երկհատոր հսկայական աշխատությունն իրապես ձեռքբերում է ինչպես հայագիտության, այնպես էլ Մերձավոր Արեւելքի եւ Եվրոպայի պատմագիտության մեջ»,- ասել է Հայ մատենագրության թվանշային գրադարանի տնօրեն Մերուժան Կարապետյանը: Նա ներկաներին հիշեցրել է, որ Արմեն Կլոդ Մութաֆյանը, բացի պատմագիտության դոկտոր լինելուց, նաեւ մաթեմատիկական գիտությունների պրոֆեսոր է:
Արմեն Կլոդ Մութաֆյանը պարզաբանել է գրքի անվանումը. «Ֆրանսերեն Levant բառը թարգմանաբար նշանակում է «արեւելք», բայց միաժամանակ նշանակում է Միջերկրական ծովի արեւելյան ափ`այսինքն` Կիլիկիայից մինչեւ Եգիպտոս ընկած տարածքը», - ասել է նա:
Պատմաբանի կարծիքով, Հայոց աշխարհի բաժանումը դարեր շարունակ արհեստական բնույթ է կրել, քանի որ Կիլիկյան հայոց թագավորությունը միշտ կապ է ունեցել Մեծ Հայքի հետ: «Շատ քարտեզներում Կիլիկիայի հայոց թագավորությունը նշված չէ, լավագույն դեպքում նշված է Փոքր Հայք անվանմամբ: Սա անթույլատրելի սխալ է, եւ պետք է հասկացնել աշխարհին, որ 12-14-րդ դարերում Կիլիկիան եղել է տարածաշրջանի ամենահզոր թագավորությունը»,-ասել է Արմեն Կլոդ Մութաֆյանը:
Գրքում տեղ է գտել արեւմտյան հայերենով առաջին պատմությունը, որը մոնղոլական արշավանքների մասին գրել է Հեթում պատմիչը եւ ամենահին հայերեն փաստաթուղթը (1248թ.):
Գիտական հրատարակությունը պարունակում է նաեւ Կիլիկյան թագավորների տոհմածառերը, որոնցում պատմաբանն ավելացրել է նաեւ տոհմի կին ներկայացուցիչների անունները, քարտեզներ, պահպանված արձանագրությունների մեկնություններ, պատկերներ եւ այլն:
Ի դեպ, գրքի շնորհանդեսին ներկա է եղել ՀՀ առաջին նախագահ Լեւոն Տեր-Պետրոսյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: