Գրքի երեւանյան փառատոնի մանրամասն ուղեցույց - Mediamax.am

exclusive
2372 դիտում

Գրքի երեւանյան փառատոնի մանրամասն ուղեցույց


Մարիա Սադոյանը
Մարիա Սադոյանը
Հրանտ Մաթեւոսյանը, Անատոլի Կիմը, Սերգեյ Դովլաթովը եւ Տատյանա Տոլստայան Լիսաբոնում՝ 1988 թվականին
Հրանտ Մաթեւոսյանը, Անատոլի Կիմը, Սերգեյ Դովլաթովը եւ Տատյանա Տոլստայան Լիսաբոնում՝ 1988 թվականին

Լուսանկարը` Տատյանա Տոլստայայի արխիվից

Յոկո Տավադան
Յոկո Տավադան

Մայիսի 25-ին, 26-ին եւ 27-ին Սունդուկյանի անվան ազգային ակադեմիական թատրոնում կայանալու է տարվա ամենասպասված եւ սիրված միջոցառումներից մեկը՝ Գրքի երեւանյան փառատոնը: Բոլոր միջոցառումների մուտքն ազատ է:

Մեդիամաքսը ներկայացնում է Գրքի երեւանյան փառատոնի մանրամասն ուղեցույցը:

 

ՄԱՅԻՍԻ 25

 

12:00 Յոկո Տավադայի «Պատվիրակը» գրքի շնորհանդես

 

Ճապոնացի ժամանակակից արձակագիր Յոկո Տավադայի «Պատվիրակը» վեպը լույս է ընծայել «Գրանիշ» հրատարակչությունը, թարգմանիչը Աստղիկ Հովհաննիսյանն է:

 

1960 թվականին ծնված Յոկո Տավադան 1982 թվականից ապրում է Գերմանիայում, ստեղծագործում ճապոներեն ու գերմաներեն։

Յոկո Տավադան Յոկո Տավադան

 

Վեպից մի հատված կարող եք կարդալ այս հղումով.

 

https://granish.org/yoko-tawada-patviraky/

 

2022-ին «Անտարես»-ը Աստղիկ Հովհաննիսյանի թարգմանությամբ հրատարակել էր ճապոնացի հանրահայտ գրող, Նոբելյան մրցանակի դափնեկիր Կենձաբուրո Օեի «Ինձ պաշարեցին ջրերը մինչեւ հոգիս» վեպը:

 

13:00 «Թումանյանը ժամանակակիցների հուշերում» երկհատորյակի շնորհանդես

 

Երկհատոր ժողովածուն կներկայացնեն Հովհաննես Թումանյանի թանգարանի տնօրեն Անի Եղիազարյանը եւ թանգարանի ցուցադրությունների կազմակերպման եւ հանրահռչակման բաժնի ղեկավար Սուսաննա Ադամյանը:

 

«Հուշագիրները մասնագիտությամբ, անհատական խառնվածքով, բանաստեղծի հետ ունեցած հարաբերությունների բնույթով խիստ բազմազան են: Բայց բոլորի նպատակը մեկն է` սերունդներին ավանդել Թումանյանի իրական կերպարը, ինչպիսին տեսել ու ճանաչել են իրենք», - ասված է գրքի առաջաբանում:

 

14:00 «Իմ» մատենաշարի շնորհանդես

 

««Իմ» մատենաշարը մտերմիկ զրույց է ընթերցողի եւ գրողի միջեւ՝ պոետական խոսքի նուրբ ելեւէջներով. համարձակ մի քայլ, երբ ոչ թե մտապատկերում, այլ ձեռքին ընթերցողը կարող է ունենալ իր սիրելի գրողի ստեղծագործությունների՝ բացարձակ նոր շերտեր բացահայտող ժողովածու»։

 

15:00 Վաչե Սարգսյանի «Ակեղդամա» եռահատոր վեպի առաջին երկու մասերի շնորհանդես

 

Գիրքը հրատարակվել է Հովհաննիսյան ինստիտուտի կողմից:

 

Ինստիտուտի կայքում ասվում է.

 

««Ակեղդամա» վեպը խորհրդահայ սիբիրյան աքսորի գրականության յուրօրինակ նմուշ է: Հեղինակը սկսել է գրել վեպը 1960-ական թթ.` ՊԱԿ-ի բանտերում եւ գուլագյան ճամբարներում 16-ամյա ազատազրկումից վերադառնալուց հետո: Ակեղդամա ընդհանուր խորագրի տակ հավաքված են երեք գիրք` Անկրկնելի պատմություն, Հավերժական սառածություն եւ Արյան ագարակ: Վեպի գլխավոր հերոսի, որ մեծ մասամբ ինքը` հեղինակն է, աչքերով բացահայտվում է գուլագյան դաժան իրականությունը:

 

Սարգսյանը, խրախուսված Վասիլի Գրոսմանի հետ հանդիպումից` գրել եւ բացահայտել Խորհրդային Գուլագի մասին ճշմարտությունը, վեպի առաջին տարբերակն ավարտում է 1964-ին, որը հաստատվում է հրատարակության խրուշչովյան ձնհալի այս վերջին տարում: Վերջին պահին, սակայն, վեպը դուրս է հանվում հրատարակությունից, բայց Սարգսյանը շարունակում է աշխատել մինչեւ իր ինքնասպանությունը` 1987 թ.»:

 

Կարդացեք նաեւ Վահրամ Մարտիրոսյանի «Անկրկնելի պատմություն», որ վերջապես «շրջանցեց լեռները» հոդվածը:

 

16:00 Իեն Մըքյուենի «Քավություն» գրքի շնորհանդես

 

Իեն Մըքյուենը, որը անգլիական գրականության կենդանի դասական է համարվում, առաջին անգամ է թարգմանվում հայերեն:

 

The Observer «Քավությունը» համարել է երբեւէ գրված 100 մեծագույն վեպերից մեկը, իսկ The Telegraph-ը ներառել է «բոլոր ժամանակների 100 լավագույն վեպերի» ցանկում։

 

Վեպի հիման վրա նկարահանված ֆիլմը նկարահանվել է 2007 թվականին եւ արժանացել «Օսկարի»։

 

«Քավությունը» թարգմանել է Մարիա Սադոյանը, ում ջանքերով վերջին տարիներին մի շարք կարեւոր գրքեր հասանելի են դարձել հայերեն:

Մարիա Սադոյանը Մարիա Սադոյանը

 

Մասնավորապես, Մարիան թարգմանել է Խալեդ Հոսեյնիի «Օդապարուկ թռցնողը» եւ «Հազար չքնաղ արեւները» գրքերը, « Ջեք Քերուեքի «Ճանապարհին» վեպը, Լոիս Լոուրիի «Պարգեւողը» վեպը:

 

17:00 Ռոբին Շարմայի «Հրովարտակ ուղղված ամենօրյա հերոսին» գրքի շնորհանդես

 

Գիրքը հրատարակած «Բուկինիստի» հաղորդագրության մեջ ասված է, որ «Հրովարտակ՝ ուղղված ամենօրյա հերոսին» բեսթսելերը «բեկումնային ազդեցություն է ունեցել բազմաթիվ հաջողված բիզնեսմենների, սպորտային աստղերի եւ այլ պրոֆեսիոնալների կյանքում»:

 

18:00 Հանդիպում Տատյանա Տոլստայայի հետ

 

Ռուսաստանցի գրողի հետ հանդիպում-քննարկումը վարելու է գրականագետ Լիլիթ Մելիքսեթյանը:

Հրանտ Մաթեւոսյանը, Անատոլի Կիմը, Սերգեյ Դովլաթովը եւ Տատյանա Տոլստայան Լիսաբոնում՝ 1988 թվականին Հրանտ Մաթեւոսյանը, Անատոլի Կիմը, Սերգեյ Դովլաթովը եւ Տատյանա Տոլստայան Լիսաբոնում՝ 1988 թվականին

Լուսանկարը` Տատյանա Տոլստայայի արխիվից

Մի քանի տարի առաջ Տատյանա Տոլստայան պատմել էր հեռավոր 1986 թվականին Լիսաբոնում կայացած Հրանտ Մաթեւոսյանի եւ Իոսիֆ Բրոդսկու հանդիպման մասին:

 

19:00 «Լավ Էլի» խմբի համերգ

 

Մայիսի ընթացքում «Լավ Էլի»-ն երկրորդ անգամ կուրախացնի իր երկրպագուներին՝ առաջին համերգը կայացել էր մայիսի 6-ին «Platform»-ում։

 

***

 

ՄԱՅԻՍԻ 26

 

12:00 «Երազ» մանկական մատենաշարի առաջին երեք գրքերի շնորհանդես

 

Մատենաշարը Newmag-ը նախաձեռնել է «Երազ Փրոջեքթս»-ի հետ։

 

Առաջին գիրքն ամերիկացի մանկագիր, մուլտիպլիկատոր, դիզայներ եւ The New York Times-ի բեսթսելեր գրող Ջեֆ Քիննի «Վտվտիկի օրագիրն» է: «Վտվտիկի օրագիրը» վաճառվել է ավելի քան 280 միլիոն օրինակով։

 

Երկրորդ գիրքը Սոնա Բաբաջանյանի հեքիաթն է՝ «Մուշի տարօրինակ ճամփորդությունը»: Սարսափելի վթարից հետո փոքրիկ Մուշի սիրտը ահ է ընկնում. նա վախենում է մթությունից, այլեւս քնել չկարողանալուց, հայրիկին կորցնելուց եւ նախկին կյանքին չվերադառնալուց։ Բայց մի օր, երբ նա, վերմակի տակ ծածկված, փորձում է թաքնվել վախերից, զարմանալի հյուր է այցելում նրան։ Տղայի երազի միջից պատահաբար Արտաշխարհվայր ընկած փոքրիկ տարօրինակ արարածը՝ Փսփսիկը, աղերսում է փրկել իրեն եւ վերադարձնել հայրենի Ներաշխարհ։

 

Երրորդ գրքի հեղինակներն են ամերիկացի մանկական հոգեթերապեւտներ Սիգելը եւ Բրայսոնը: «Կարգապահություն առանց դրամայի» ձեռնարկը ճանապարհային քարտեզ է ծնողների համար՝ ինչպես մեղմել զայրույթը, լարումն ու առանց տեսարան ստեղծելու լուծել հուզական հարցերը: Գիրքը համալրված է ծնողների անկեղծ պատմություններով եւ նկարազարդումներով:

 

13:00 Պոլսահայ նորագույն գրականությունը․ Սուրեն Դանիելյանի դասախոսությունը

 

Դասախոսությունը վերաբերում է 1970-ական թվականներից հետո ծավալված գրական զարգացումներին, դեմքերին՝ Զահրատ, Զարեհ Խրախունի, Զաւէն Պիպէռեան, Ռոպէր Հատտէճեան, Մկրտիչ Մարկոսեան, Իգնա Սարըասլան եւ ուրիշներ:

 

14:00 Բանաստեղծությունը՝ բացված

 

Գերմանացի եւ հույն պոետներ Շենոն Սալիվանն ու Յորղոս Կուտուվելասը հրավիրում են ձեզ միասին մասնակցել պոետիկ արտահայտման հետմիջօրեին:

 

15։00 Դոն Միգել Ռուիսի «Չորս համաձայնությունները» գրքի շնորհանդես

 

«Զանգակ» հրատարակչությունը գիրքն այսպես է ներկայացնում.

 

««Չորս համաձայնությունները» գիրքը տոլտեկների՝ Մեքսիկայի բնիկ հնագույն ժողովրդի երկարամյա ուսմունքի հիման վրա գրված ուղեցույց է, որը պարզ, հասանելի եւ հեշտ շարադրանքով մեր առջեւ բացում է մեր ներքին կապանքները, որոնք գալիս են մանկությունից: Հեղինակը որպես լուծում առաջարկում է չորս համաձայնություն, որոնք կնքելու դեպքում կկոտրենք մեզ ներարկված սահմանափակող համոզմունքները եւ կհասնենք ազատության, երջանկության եւ սիրո»:

 

16:00 Վահրամ Ալազանի «Տառապանքի ուղիներում» հուշագրության շնորհանդես

 

Հուշագրությունը լույս է տեսել «Անտարեսի» գլխավոր խմբագիր Արքմենիկ Նիկողոսյանի աշխատասիրությամբ:

 

«1930-1950-ական թվականների բանտերի ու աքսորների սարսափը վկայագրած կարեւորագույն այս գիրքը ժամանակին մնացել է անտիպ, եւ հրատարակվել միայն 1990 թվականին: Բայց չափազանց շատ կրճատումներով, մկրատումներով, խմբագրումներով: Ներկա հրատարակությունը պատրաստված է հեղինակային մեքենագիր օրինակի հենքով, եւ, ըստ էության, ամբողջությամբ ու անխաթար հրատարակվում է առաջին անգամ», - ասել է Արքմենիկ Նիկողոսյանը:

 

17:00 Շառլ Ազնավուրի պոեզիայի երրորդ հատորի շնորհանդես

 

Newmag-ը ներկայացնում է Ազնավուրի գրական ժառանգությունը:

 

18:00 Կլաուդիո Պոցցանի եւ Լիլիթ Օսիպյան. գրական-երաժշտական բաթլ

 

«Զանգակը» դեռ 2013 թվականին հրատարակել էր Կլաուդիո Պոցցանիի բանաստեղծությունների «Ստվերի քայլերթը» գիրքը (հայերեն թարգմանությունը՝ Դավիթ Մաթեւոսյանի, ռուսերեն թարգմանությունը՝ Վիկա Չեմբարցեւայի)՝ կից հեղինակի ընթերցանությամբ ձայնասկավառակով:

 

19:30 Հանդիպում Արմեն Զախարյանի հետ

 

Շատերի համար սա, թերեւս, փառատոնի ամենասպասված միջոցառումն է:

 

Արմեն Զախարյանը վարում է «Армен и Фёдор» յութուբյան ալիքը (https://www.youtube.com/@armenifedor), որտեղ անսովոր եւ չափազանց հետաքրքիր կերպով պատմում է տարբեր գրական ստեղծագործությունների մասին:

 

Արմենի աշխատանքի որակի եւ խորության մասին պատկերացում կազմելու համար կարող եք դիտել թեկուզ այս հաղորդումը.

 

 

 

Փառատոնում Արմեն Զախարյանը խոսելու է հայ գրականության մասին, իսկ երկրորդ մասում Լիլիթ Մելիքսեթյանը կվարի հարց ու պատասխանի հատվածը:

 

ԿԱՐԵՎՈՐ. Արմեն Զախարյանի հետ հանդիպմանը պետք է ներկայանալ վերջին 10 տարվա ընթացքում հրատարակված որեւէ գրքով:

 

***

 

ՄԱՅԻՍԻ 27

 

12:00 «Միսս Փերեգրինի յուրահատուկ երեխաների տունը» գրքի շնորհանդես

 

Այս գիրքը եւս թարգմանել է Մարիա Սադոյանը:

 

«Միսս Փերեգրինի յուրահատուկ երեխաների տունը»՝ գիրք մեծանալու մասին հրապարակման մեջ զրուցել ենք Մարիայի եւ «Արեւիկ» հրատարակչության տնօրեն

Սաբեթ Հովհաննիսյանի հետ:

 

13:00 Ոչ կենցաղային շփում։ Ի՞նչն է օգնում կենդանի զգալուն. Դմիտրի Գարիչեւ, Ալեքսանդրա Շալաշովա, Տատյանա Սոլովյովա

 

Այս միջոցառման մասին, ցավոք, տեղեկություն չգտանք:

 

14:00 Շուշանիկ Ասատրյանի «Ափից ներս» գրքի շնորհանդես

 

«Գրանիշ»-ը գիրքն այսպես է ներկայացնում.

 

«Շուշանիկ Ասատրյանը, պատմվածքների «Ափից ներս» ժողովածուում լուսանկարչական օբյեկտիվը ձեռքին, տարեգրում է աշխարհի՝ իր առջեւ բացվող պատուհանն ու շերտ առ շերտ հայտնվող իրականության մեջ բացահայտում մարդկային ճակատագրերն ու բնավորությունները: Զում կարգավորման միջոցով գծերը երբեմն հեռանում են՝ ուրվապատկերելով լեռներ, հորիզոններ եւ գերհզոր ստվերներ, որոնց խորխորատներում փոքրանում ու անհետանում է մարդը իր անցողիկ կեցությամբ, երբեմն էլ գծերը կտրուկ մոտենում են՝ ափից ներս ցուցադրելով մարդկային եզակի ճակատագրերը՝ առօրյա բարդություններով, կենցաղով ու հանապազօրյա հացի համար մղվող պայքարով»:

 

14։00 Գրողներն ու ընթերցողները խաղում են «Այլկերպ» (Ձմեռային այգում)

 

Պետք է որ շատ յուրահատուկ միջոցառում լինի:

 

15:00 Մոգականություն եւ ռեալիզմ

 

Գրականագետ եւ բանաստեղծ Դենիս Բեզնոսովը կախարդանքի գաղտնիքների մասին կխոսի երիտասարդ գրող, «Հրավառություն այն կողմում» կախարդող առակի հեղինակ Ալեքսանդրա Շալաշովայի եւ Մարիամ Պետրոսյանի հետ։

 

16:00 Ժամանակակիցը, ժամանակավորը եւ անժամանակը պոեզիայում

 

Ինչպե՞ս է ժամանակը հաշվեհարդար տեսնում նոր տեքստի հետ, ինչպե՞ս է մտապահում կամ մոռանում այն, եւ հատկապես՝ ինչպե՞ս է այն վերհիշում անցյալի տեքստը եւ ինքնաճշգրտվում ըստ նրա։ Այս եւ այլ հարցերին փորձելու են պատասխանել բանաստեղծներ Կարեն Անտաշյանը, Հասմիկ Սիմոնյանը եւ Մարինե Պետրոսյանը:

 

17:00 Էրիկ Էմանուել Շմիտի «Օսկարը եւ վարդագույն տիկինը» գրքի շնորհանդես

 

«Վերնատուն» հրատարակչությունը Թերեզա Ստեփանյանի թարգմանությամբ ներկայացնում է Էրիկ Էմանուել Շմիտի «Օսկարը եւ վարդագույն տիկինը» ժողովածուն։ Շմիտը ֆրանս-բելգիական արմատներով նշանավոր արձակագիր է, սցենարիստ եւ դրամատուրգ։ Նրա ստեղծագործությունները հրատարակվել են երեսունհինգից ավելի լեզուներով։

 

«Օսկարը եւ վարդագույն տիկինը» հիվանդ երեխայի մասին է, որը կյանքի վերջին օրերն է անցկացնում հիվանդանոցում։ Այս պատմությունը կյանքը գնահատելու, ամեն ակնթարթը որպես հավերժություն ապրելու եւ դրա համար Աստծուն շնորհակալ լինելու փորձ է։

 

18:00 Արամ Պաչյանի «Եթե սա գրող է» գրքի շնորհանդես

 

Արամ Պաչյանը իր նոր գրքր մասին պատմել է այս զրույցի ընթացքում.

 

 

 

19:00 Գրքի երեւանյան փառատոնի փակման արարողություն եւ մրցանակաբաշխություն

 

 

 

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:




Մեր ընտրանին