Երեւան: Մեդիամաքս: Անահիտ աստվածուհու արձանի մասունքները ժամանակավորապես կբերվեն Բրիտանական թանգարանից եւ կցուցադրվեն Հայաստանում:
Ինչպես հաղորդում է Մեդիամաքսը, արձանի մասունքների ժամանակավոր ցուցադրման կազմակերպման մասին պայմանավորվածությունը ձեռք է բերվել այսօր կրթության եւ գիտության նախարար Արմեն Աշոտյանի եւ Հայաստանում Մեծ Բրիտանիայի դեսպան Քեթրին Ջեյն Լիչի հանդիպման արդյունքում:
Այսօր Հայաստանում Մեծ Բրիտանիայի դեսպանատան շենքի մոտ Հայաստանի երիտասարդական հիմնադրամի ներկայացուցիչները Անահիտ աստվածուհու արձանի մասունքները Հայաստանին վերադարձնելու պահանջով ակցիա են անցկացրել:
Լրագրողների հետ զրույցում Քեթրին Ջեյն Լիչն ասել է, որ Հայաստանում արձանի մասունքների ցուցադրումը “երկու երկրների միջեւ հարաբերությունների ամրապնդման ուղղված լավ քայլ կլինի”:
Նա դժվարացել է պատասխանել այն հարցին, թե որքան իրատեսական է մասունքները ընդմիշտ Հայաստան տեղափոխելու ակտիվիստների պահանջն իրագործելու հնարավորությունը, քանի որ Բրիտանական թանգարանը անկախ մարմին է, որի գործողությունների եւ որոշումների համար դեսպանը չի կարող պատասխան տալ:
Քեթրին Ջեյն Լիչն հավաստիացրել է, որ Բրիտանական թանգարանին կփոխանցի ակցիայի մասնակիցների պահանջները:
Իր հերթին Արմեն Աշոտյանը նշել է, որ ժամանակավոր ցուցադրումը այս նախաձեռնության առաջին արդյունքն է, սակայն հայկական կողմը մտադիր չէ դրա վրա կանգ առնել: “Մենք կպայքարենք արձանի մասունքների Հայաստան վերջնական տեղափոխման համար”, - ասել է նախարարը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: