Երեւան: Մեդիամաքս: «Եվրանեսթ» խորհրդարանական վեհաժողովում հայկական պատվիրակության ղեկավար Վահան Հովհաննիսյանն այսօր ասել է, որ "հայկական պատվիրակությունը հաջողեց Բաքվում եւ հանդես եկավ որպես մեկ միասնական թիմ”:
Մեդիամաքս-ը հիշեցնում է, որ 9 պատգամավորից բաղկացած ՀՀ խորհրդարանական պատվիրակությունն ապրիլի 1-ին մեկնել էր Բաքու` մասնակցելու «Եվրանեսթ» խորհրդարանական վեհաժողովի երկրորդ լիագումար նիստին:
Վահան Հովհաննիսյանն այսօր դրական է գնահատել Բաքվում կայացած նիստի արդյունքները եւ արդարացված համարել պատվիրակության մեկնումն Ադրբեջան:
“Հայկական պատվիրակությունն ակտիվորեն մասնակցեց նիստի աշխատանքին եւ կարողացավ առաջ տանել կարեւոր շեշտադրումներ հատկապես ժողովրդավարության, մարդու իրավունքների ամրապնդման, սոցիալական զարգացման հարցերում”,- ասել է պատվիրակության ղեկավարը:
Նա տեղեկացրել է, որ ի տարբերություն նախորդ նիստի, այս անգամ վեհաժողովի անդամ երկրներին հաջողվել է բանաձեւեր ընդունել:
Խոսելով հայկական պատվիրակությանը ցուցաբերած ընդունելության մասին՝ պատվիրակության ղեկավարն ասել է, որ անվտանգության ապահովումը եւ ընդունելությունը պատշաճ մակարդակի վրա էր:
“Ատելության կամ ագրեսիայի դրսեւորում չնկատվեց: Կարծում եմ, որ այդ երկրում կա ընդամենը մեկ մարդ, ով քաղաքական դիվիդենտներ է շահում պատերազմի մասին խոսելիս”,- նկատել է Վահան Հովհաննիսյանը:
Անդրադառնալով նիստի բացման ընթացքում Ադրբեջանի նախագահ Իլհամ Ալիեւի ելույթին, որում այդ երկրի ղեկավարը հայերին “ֆաշիստ” է անվանել՝ Հովհաննիսյանն ասել է, որ դրանով Ալիեւը մեծ հարված է հասցրել իր երկրի քաղաքական իմիջին:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: