Երեւան: Մեդիամաքս: Ֆրանսիայի նախագահ Էմանյուէլ Մակրոնն ասել է, որ այսօր հաջողված հեռախոսազրույցներ է ունեցել Հայաստանի եւ Ադրբեջանի ղեկավարների հետ:
Reuters-ը վկայակոչում է Մակրոնի հայտարարությունն այն մասին, որ նա Հայաստանի վարչապետին եւ Ադրբեջանի նախագահին առաջարկել է «նոր մեթոդ»՝ Մինսկի խմբի շրջանակում բանակցությունները վերսկսելու համար:
Ֆրանսիայի նախագահն ասել է, որ այդ աշխատանքը կմեկնարկի այսօր երեկոյան:
Էմանյուէլ Մակրոնը նաեւ վերահաստատել է հրադադարի մասին իր կոչը:
Այսօր ավելի վաղ հայկական կողմը հաղորդել էր Մակրոնի եւ Փաշինյանի հեռախոսազրույցի մասին:
Հայաստանի վարչապետը շնորհակալություն էր հայտնել պատերազմը սանձազերծելու անթույլատրելիության վերաբերյալ Ֆրանսիայի սկզբունքային եւ կառուցողական դիրքորոշման համար:
Կողմերն անթույլատրելի էին համարել օտարերկրյա ահաբեկիչ զինյալների ներգրավումը ռազմական գործողություններում:
Ֆրանսիայի նախագահը կարեւորել էր խաղաղ գործընթացի վերականգնումը՝ համաձայն ԵԱՀԿ Մինսկի խմբի համանախագահ երկրների նախագահների հոկտեմբերի 1-ի հայտարարության:
Վարչապետ Փաշինյանն անընդունելի էր համարել Թուրքիայի եւ այդ երկրի կողմից հովանավորվող ահաբեկիչների ներթափանցումը տարածաշրջան՝ ընդգծելով, որ առանց այդ ապակայունացնող ուժերի դուրսմղման հնարավոր չէ վերականգնել տարածաշրջանային անվտանգությունը:
Խաղաղության հաստատման համատեքստում Նիկոլ Փաշինյանը կարեւորել էր ԵԱՀԿ Մինսկի խմբի համանախագահների եւ նրանց երկրների սերտ համագործակցությունը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: