Երեւան: Մեդիամաքս: Թուրքիայում անցկացված հարցման արդյունքները վկայում են, որ այս երկրում գրեթե հավասարապես անբարյացակամ դիրքորոշում ունեն Հայաստանի եւ Իսրայելի նկատմամբ:
ԱՄՆ-ի Մարշալի Գերմանական հիմնադրամի անցկացրած հարցման արդյունքների համաձայն՝ Հայաստանի նկատմամբ բարյացակամ է տրամադրված Թուրքիայում հարցված բնակիչների միայն 10%-ը: Իսրայելի դեպքում այս ցուցանիշը նույնիսկ ավելի ցածր է եւ կազմում է 8%:
Հարցվածների մեծ մասը հիմնականում անբարյացակամ դիրքորոշում է հայտնել այլ երկրների նկատմամբ, բացառությամբ Ադրբեջանի: Վերջինիս նկատմամբ բարյացակամ է տրամադրված հարցվածների 63%-ը: Ադրբեջանին հաջորդում են Եվրոպական Միությունն ու Գերմանիան՝ համապատասխանաբար 41% եւ 38% բարյացակամ դիրքորոշմամբ:
Թուրքիայի ռազմավարական դաշնակից համարվող ԱՄՆ-ը արժանացել է հարցվածների միայն 23%-ի դրական վերաբերմունքին:
Ռուսաստանի դեպքում այս ցուցանիշը կազմում է 26%: Նրան հաջորդում են Իրանն ու Հյուսիսային Իրաքը՝ մոտ 20%:
Հունաստանի եւ Սիրիայի նկատմամբ դրական վերաբերմունք է արտահայտել հարցվածների 15% եւ 14%-ը համապատասխանաբար:
Հարցին, թե որ երկիրն է Թուրքիայի ռազմավարական դաշնակիցը, հարցվածների 50%-ը չի կարողացել հստակ պատասխան տալ, 41%-ն ասել է, թե չգիտի, իսկ 9%-ը պատասխանել, որ Անկարան ռազմավարական որեւէ դաշնակից չունի:
ԱՄՆ-ի Մարշալի Գերմանական հիմնադրամի հարցումն անցկացվել է ԱՄՆ դեսպանության ֆինանսավորմամբ: Դեմ առ դեմ հարցումներն անցկացվել են 2015թ. հուլիսի 4-13 ընկած ժամանակահատվածում Թուրքիայի 16 նահանգում՝ 1018 մարդու շրջանում:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: