Երեւան։ Մեդիամաքս։ Ռուսաստանի ռազմական գերատեսչությունը պատրաստ է աջակցել Հայաստանի Զինված ուժերի արդիականացմանն ու բարեփոխմանը, այսօր ասել է ՌԴ պաշտպանության նախարար, բանակի գեներալ Սերգեյ Շոյգուն ՀՀ պաշտպանության նախարար Արշակ Կարապետյանի հետ Մոսկվայում կայացած հանդիպման ժամանակ:
«Մենք կարեւոր նշանակություն ենք տալիս ռազմական ոլորտում համագործակցության զարգացմանը՝ ինչպես երկկողմ ձեւաչափով, այնպես էլ՝ ՀԱՊԿ շրջանակում։ Միեւնույն ժամանակ, մենք պատրաստ ենք շարունակել աջակցել Հայաստանի Զինված ուժերի բարեփոխումների ծրագրի իրականացմանը»,- ՌԴ ՊՆ մամուլի ծառայության փոխանցմամբ, ասել է Սերգեյ Շոյգուն։
Նա նաեւ նշել է, որ Հայաստանում գտնվող ՌԴ 102-րդ ռազմաբազան հագեցած է եւ հանդիսանում է անվտանգության երաշխավոր։
«Հայաստանը Ռուսաստանի դաշնակիցն ու առանցքային գործընկերն է Անդրկովկասում անվտանգության ապահովման հարցում, եւ մենք շահագրգռված ենք տարածաշրջանում կայունության պահպանման հարցում»,- ասել է Սերգեյ Շոյգուն։
Արշակ Կարապետյանն իր հերթին նշել է, որ «Ռուսաստանը միակ պետությունն է, որը հայ ժողովրդին անվտանգության իրական շոշափելի արդյունք է տալիս»։
«Այսօր Ռուսաստանը զբաղվում է անվտանգության հարցերով ոչ միայն Լեռնային Ղարաբաղում, այլեւ անմիջապես Հայաստանի սահմաններին: Մենք պատրաստ ենք սերտ եւ արդյունավետ համագործակցության»,- ասել է նա։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: