Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ: 

Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

• 15 ՏԱՐԻ ԱՌԱՋ. 2004 ԹՎԱԿԱՆԻ ՀՈՒՆՎԱՐԻ 14-20

Հայաստանը սպասում է, որ ՆԱՏՕ-ն «սկզբունքայնություն կդրսեւորի» 

Հունվարի 14-ին ՀՀ արտաքին գործերի նախարարությունը խորը մտահոգություն էր հայտնել՝ «հունվարի 13-ին Ստամբուլի օդանավակայանում` Ադրբեջանի իշխանությունների պահանջով ու միջամտությամբ, Հայաստանի պաշտպանության նախարարության պատվիրակությանը Բաքվում Cooperative Best Effort 2004 զորավարժությունների առաջին պլանավորման կոնֆերանսին մասնակցելու հնարավորությունից զրկելու կապակցությամբ»:

«Հայաստանի ԱԳՆ-ը դատապարտում է այդ արարքը եւ կարծում է, որ այդ փաստը ամբողջությամբ հակասում է ՆԱՏՕ-ի «Գործընկերություն հանուն խաղաղության» ծրագրի ոգուն, տառին եւ տրամաբանությանը: Ադրբեջանի իշխանությունների այդ աննախադեպ քայլը կասկածի տակ է դնում Գործընկերության հիմնական նպատակների իրագործումը՝ ուղղված Եվրոատլանտյան տարածաշրջանի երկրների, մասնավորապես, Հարավային Կովկասի երկրների միջեւ երկխոսության եւ փոխգործակցության ընդլայնմանը»,- ասվում էր Հայաստանի արտգործնախարարության հայտարարության մեջ:  

Նույն օրը ՀՀ արտգործնախարար Վարդան Օսկանյանը հայտարարել էր, որ Հայաստանը մտադիր չէ հրաժարվել  Cooperative Best Effort 2004 զորավարժություններին մասնակցությունից:  Հայաստանի արտգործնախարարը հույս էր հայտնել, որ ՆԱՏՕ-ն «սկզբունքայնություն կդրսեւորի եւ համապատասխան քայլեր կձեռնարկի ստեղծված իրավիճակը շտկելու համար»:

Ալիեւը նոր առաջարկությունների է սպասում 

Հունվարի 20-ին Ադրբեջանի նախագահ Իլհամ Ալիեւը հայտարարել էր, որ ԵԱՀԿ Մինսկի խմբի համանախագահները պետք է հանդես գան Լեռնային Ղարաբաղի հակամարտության կարգավորման նոր առաջարկներով:

Ալիեւն ասել էր, որ ԵԱՀԿ Մինսկի խմբի գործունեությունը վերջին տարիների ընթացքում  «անարդյունք» է եղել եւ նշել էր, որ Ադրբեջանի հասարակությունը «մեծ ակնկալիքներ ունի միջնորդներից»:

«Մենք պատերազմ չենք ցանկանում, նոր զոհեր չենք ցանկանում», - ասել էր Ադրբեջանի նախագահը: Իլհամ Ալիեւը հայտարարել էր, որ անհրաժեշտ է համարում շարունակել Ադրբեջանի եւ Հայաստանի նախագահների անմիջական երկխոսությունն այն պայմանով, որ ԵԱՀԿ Մինսկի խումբը հանդես չի գա «դիտորդի» դերում:

Իլհամ Ալիեւը` 2009 թվականին

Լուսանկարը` REUTERS

Իլհամ Ալիեւը համոզմունք էր հայտնել, որ «Ադրբեջանը կհասնի խնդրի քաղաքական կարգավորմանը` ամրապնդելով իր տնտեսական եւ ռազմական ներուժը»:

«Սակայն եթե դա տեղի չունենա, մենք մտադիր չենք հաշտվել ստեղծված իրադրության հետ», - նշել էր նա: «Ադրբեջանը միանշանակ իրավունք ունի ցանկացած պահին եւ ցանկացած միջոցներով ազատագրել իր տարածքները», - նշել էր Իլհամ Ալիեւը:

Սակայն հակամարտության լուծման այլ տարբերակների մասին հնարավոր կլինի մտածել միայն այն բանից հետո, երբ «միանգամայն համոզված կլինենք նրանում, որ կարգավորման գործընթացի խաղաղ ներուժը լիովին սպառված է», - ասել էր  Ադրբեջանի նախագահը:

• 10 ՏԱՐԻ ԱՌԱՋ. 2009 ԹՎԱԿԱՆԻ ՀՈՒՆՎԱՐԻ 14-20

Ադրբեջանի ԱԳՆ-ը մեղադրում է Ռուսաստանին

Հունվարի 15-ին Ադրբեջանի ԱԳՆ-ը Ռուսաստանին մեղադրել էր Հայաստանին $‌ 800 մլն-ի ռազմամթերք հատկացնելու եւ «ադրբեջանական հողերը գրաված Հայաստանի ռազմական ներուժն հզորացնելու» համար: 

«Դա հակասում է ՄԱԿ-ի Անվտանգության խորհրդի՝ հայ-ադրբեջանական հակամարտության կարգավորման վերաբերյալ բանաձեւերին: Խոսքը Ռուսաստանի կողմից հակամարտության կողմերից մեկին աջակցություն չցուցաբերելու վերաբերյալ պարտավորությունների խախտման մասին է»,- ասվում էր Ադրբեջանի ԱԳՆ-ի հայտարարությունում:

Ադրբեջանի եւ Ռուսաստանի նախագահներ Իլհամ Ալիեւը եւ Դմիտրի Մեդվեդեւը՝ 2009 թվականին

Լուսանկարը` REUTERS

«Ադրբեջանի ԱԳՆ-ը դեմ է արտահայտվում ադրբեջանական հողերի օկուպացիայի ուժեղացմանն ուղղված գործողություններին եւ Ռուսաստանին կոչ է անում ձեռնարկել բոլոր հնարավոր միջոցառումները` Հայաստանին զինամթերք տրամադրելու հետեւանքները կանխելու նպատակով», - նշվում էր հայտարարությունում: 

Լավրովը հերքում է

Հունվարի 16-ին Սերգեյ Լավրովը հերքել էր Հայաստանին զենքի մատակարարման մասին տեղեկատվությունը:

Նա հայտարարել էր, որ Ռուսաստանը ուսումնասիրել է Հայաստանին ռուսաստանյան մեծածավալ մատակարարումների վերաբերյալ ադրբեջանական ԶԼՄ-ների հրապարակումների շուրջ ստեղծված իրադրությունը, եւ տվյալները չեն հաստատվել: 

Սերգեյ Լավրովը՝ 2009 թվականին

Լուսանկարը` REUTERS

«Գլխավոր շտաբի հետ մենք հետազոտել ենք այդ իրավիճակը: Այն մարդը, ում ազգանունը հիշատակվում է ադրբեջանական ԶԼՄ-ներում, ոչ մի փաստաթուղթ չի ստորագրել, եւ անցած տարի Հայաստանին ոչ մի սպառազինություն չի մատակարարվել»,- ասել էր Լավրովը: 

• 5 ՏԱՐԻ ԱՌԱՋ. 2014 ԹՎԱԿԱՆԻ ՀՈՒՆՎԱՐԻ 14-20

«Իշխանությունը փորձում է շեղել հասարակության ուշադրությունը»

Հունվարի 16-ին ՀԱԿ արտաքին հարաբերությունների հանձնաժողովի նախագահ Վլադիմիր Կարապետյան ասել էր, որ Ռոբերտ Քոչարյանի եւ Սերժ Սարգսյանի միջեւ «առկա է բանավեճ եւ ոչ ավելին»:

Պատասխանելով հարցին, թե արդյո՞ք այն կարող է դիտվել որպես Ռոբերտ Քոչարյանի քաղաքականություն վերադառնալու նախանշան` ՀԱԿ անդամն ասել է հետեւյալը.

«Այս պահի դրությամբ, ավելի զարգացումներ, քան բանավեճը, մենք չենք տեսնում: Ավելին, մենք տեսնում ենք, որ իշխանությունը փորձում է հանրության ուշադրությունը հրավիրել այդ բանավեճի վրա` շեղելով այն կարեւորագույն խնդիրներից, որոնք առկա են, իսկ մենք մտադիր չենք շեղվել»,-ասել էր նա:

Արա Թադեւոսյան