Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:

Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

•    15 ՏԱՐԻ ԱՌԱՋ. 2003 ԹՎԱԿԱՆԻ ՕԳՈՍՏՈՍԻ 13-19

Իրաք մեկնելու մասին որոշումը

Օգոստոսի 19-ին Վաշինգթոնում Հայաստանի դեսպանությունը հայտարարություն էր տարածել սակրավորների դասակ եւ զինվորական բժիշկներ Իրաք ուղարկելու հայկական կողմի պատրաստակամության մասին՝ այդ երկրի վերականգնման գործընթացին մասնակցելու համար:

Հայ խաղաղապահները Իրաքում

Լուսանկարը` ՀՀ ՊՆ

«Հայաստանը մշտական կապ է պահպանել ԱՄՆ կառավարության հետ մինչեւ Իրաքում ռազմական գործողությունների սկսելը, դրանց ընթացքում եւ դրանցից հետո` ամերիկյան զորքերին ցանկացած անհրաժեշտ եւ հնարավոր օգնություն ցույց տալու նպատակով», - ասված էր Հայաստանի դեսպանության հաղորդագրության մեջ:

ԵԿԳ կոչը

Pernod Ricard միջազգային խմբի կազմում ընդգրկված Երեւանի կոնյակի գործարանի (ԵԿԳ) ղեկավարությունն օգոստոսի 19-ին Հայաստանի իշխանություններին կոչ էր արել «ձեռնարկել միջոցներ, որպեսզի ներմուծվող սպիրտերը, որոնց որակը եւ ծագումը վերահսկելի չեն, չօգտագործվեն հայկական կոնյակի արտադրության համար»:

Երեւանի կոնյակի գործարանում

Լուսանկարը` Մեդիամաքս

«Չնայած նրան, որ սպիրտների ներմուծումը, հավանաբար, անօրինական չէ, ԵԿԳ ղեկավարությունը խիստ մտահոգված է շուկայում «հայկական կոնյակի» հայտնվելու հնարավորությամբ, որն իրենից կներկայացնի ոչ ավելին, քան սովորական բրենդի: Դա կարող է մոլորության մեջ գցել սպառողներին եւ կհանգեցնի հայկական կոնյակի նկատմամբ վստահության կորստին»,- ասված էր ԵԿԳ հայտարարությունում:

•    10 ՏԱՐԻ ԱՌԱՋ. 2008 ԹՎԱԿԱՆԻ ՕԳՈՍՏՈՍԻ 13-19

Անջատումը Western Union-ից եւ Moneygram-ից

Օգոստոսի 14-ին հայտնի դարձավ, որ Ստեփանակերտում գործող հայկական առեւտրային բանկերի մասնաճյուղերն անջատվել են դրամական փոխանցումների Western Union եւ Moneygram համակարգերից:

Լուսանկարը` REUTERS

Դրանից մեկ օր առաջ ադրբեջանական ԶԼՄ-ները տեղեկացրել էին, որ իշխանությունները Ադրբեջանի տարածքում Western Union-ի եւ Moneygram-ի աշխատանքը վերսկսելու որոշում են կայացրել, քանի որ նշված ընկերությունները «դադարեցրել են անօրինական գործունեությունը գրավյալ տարածքներում»:

Իրավիճակը Վրաստանում

Օգոստոսի 14-ին նախագահ Սերժ Սարգսյանի կողմից հրավիրված Ազգային անվտանգության խորհրդի նիստում քննարկվել էր Վրաստանում ստեղծված իրավիճակը:

Նախագահը մտահոգություն էր հայտնել ստեղծված իրավիճակի կապակցությամբ եւ ողջունել առկա կառուցողական դիրքորոշումները, որոնք ուղղված են տարածաշրջանում խաղաղության եւ կայունության հաստատմանը:

Սերժ Սարգսյանը շեշտել էր, որ Ռուսաստանը Հայաստանի ռազմավարական դաշնակիցն է, իսկ Վրաստանը` բարեկամ երկիր, հետեւաբար, Հայաստանը մեծապես շահագրգռված է խնդրի շուտափույթ խաղաղ կարգավորմամբ: Նախագահը վերահաստատել էր Հայաստանի «մարդասիրական միջանցք» հանդիսանալու պատրաստակամությունը եւ հանձնարարել էր Եվրամիության անդամ երկրների քաղաքացիների տարանցիկ ուղեւորությունների համար ժամանակավորապես սահմանել առանց մուտքի արտոնագրերի ռեժիմ:

Արա Թադեւոսյան