Վազգեն Սարգսյանի անվան ռազմական ինստիտուտն այս տարի առաջին անգամ աղջիկների ընդունելություն է կատարել: Մեդիամաքսը «Վաշտի աղջիկները» հատուկ նախագծում ներկայացնում է զինվորական գործը որպես մասնագիտություն ընտրած յոթ աղջիկներին: Շարքի այսօրվա հերոսը կուրսանտ Լուիզա Խլղաթյանն է:
«Սեռը չի կարող խոչընդոտ լինել ճիշտ ճանապարհը գտնելու համար»
Լուիզա Խլղաթյանը Երեւանից է: 20 տարեկան է: Հայրենասիրությունն ու խառնվածքն են նրան բերել Ռազմական ինստիտուտ: Ցանկանում է հետախույզ դառնալ՝ «միշտ պատրաստ հայրենիքին ծառայելու»:
«Ամեն մարդ իր ճանապարհն ունի. սեռը չի կարող խոչընդոտ լինել ճիշտ ճանապարհը գտնելու համար: Կան շատ աղջիկներ, որոնք կարող են հրաշալի տիրապետել ռազմական գործին, սակայն բարդույթավորվում են»:
Նա ռազմական գործը հաճելի գործ է համարում:
«Եթե գործդ չսիրես, քեզ մոտ ոչինչ չի ստացվի. լավ հրամանատար չես կարող լինել, բանակում ծաղր ու ծանակի առարկա կդառնաս»:
«Ամեն մարդ իրենը պետք է գտնի»
«Երբ ասացի, որ ուզում եմ Ռազմական ինստիտուտ ընդունվել, մայրիկս ասաց. «Ինչ լավ է, վերջապես որոշեցիր, ինչ ես ուզում դառնալ»: Ամեն մարդ իրենը պետք է գտնի այս կյանքում, պայմաններն ու դժվարությունները կապ չունեն, կարեւորը մեծ ցանկությունն ու աշխատասիրությունն է` այդ ցանկությունն իրականացնելու համար»:
«Պատրաստ էի, որ մազերս տղաների պես կարճ կտրեն»
Լուիզայի կարծիքով, բանակում ամեն ինչ պետք է հավասարության սկզբունքով լինի:
Լուսանկարը` Մեդիամաքս
«Պատրաստ էի, որ մազերս տղաների պես կարճ կտրեն, բայց, քանի որ բոլորն էին դրանց պատրաստ, պետք է հարմարվեի: Ամեն ինչի հետ հարմարվում եմ. եթե եկել եմ այստեղ սովորելու եւ ուզում եմ լավ մասնագետ դառնալ, որեւէ բանի դեմ չեմ գնա»:
Լուիզան կարծում է, որ բանակում աղջիկների ներկայությունը շատ մեծ
ազդեցություն կարող է ունենալ տղաների պահվածքի վրա:
«Տղաներն ավելի զուսպ ու զգոն են լինում: Իհարկե, մեզանից էլ է շատ բան կախված, եթե մեր կողմից զսպվածություն չլինի, իրենք իրենց այդքան զուսպ չեն պահի»:
«Միշտ պայքարը կա…»
Լուիզան օրը սկսում է դրական լիցքերով: Շատ է սիրում մարմնամարզության ժամը, ասում է, որ 80 եւ ավել ձգում է անում, իսկ օրվա ավարտին հիմնականում շատ հոգնած է լինում:
Լուիզա ԽլղաթյանըԼուսանկարը` Մեդիամաքս
«Ցածր գնահատական ոչ ոք չի ուզում ստանալ, հատկապես երբ բնավորությամբ առաջնորդ ես լինում: Այնպես որ, միշտ պայքարը կա»:
Զրուցեց Սիրանուշ Եղիազարյանը
Լուսանկարները` Մարիամ Լորեցյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: