Հուլիսը ծուլացնում է, ստիպելով ավելի շատ մտածել ծովի, քան՝ մշակութային իրադարձությունների մասին: Սակայն եթե ծովափին դեռ չեք հասել, կարելի է շաբաթ օրը նվիրել թատրոնին, որը նույնպես առօրյայից կտրվելու եւ ինչ-որ ժամանակով ուրիշ կյանքի մեջ խորասուզվելու լավ հնարավորություն է:
ՇԱԲԱԹ, ՀՈՒԼԻՍԻ 21
Կեսօրին Տիկնիկային թատրոնում երեխաները հետեւելու են, թե ինչպես խեղճ բանաստեղծ աքաղաղը փորձելու է գտնել կորցրած եւ իր համար անչափ կարեւոր «Ծուղրուղու» բառը:
Տոմսերի արժեքը՝ 800-1400 դրամ:
***
Գաֆեսճյան արվեստի կենտրոնում շարունակվում են «Երաժշտական զբոսանքները»՝ 8 տարեկանից բարձր երեխաների համար: Այս անգամ հանդիպումը կանցնի առանձնահատուկ ոգեւորությամբ, քանի որ նվիրված է լինելու 20-րդ դարի երկու նորարար արվեստագետներին՝ Մարսել Դյուշանին եւ Ջոն Քեյջին: Ստեղծվելու է նաեւ աղմուկի նվագախումբ, որի համար երեխաները պետք է տանից բերեն որեւէ կենցաղային իր:
Սկիզբը՝ ժամը 14:00-ին:
Գրանցվելու եւ մանրամասների համար զանգահարեք 010 54 19 32/34 հեռախոսահամարներով:
Մասնակցությունն անվճար է:
***
Ժամը 19:00-ին Հ. Ղափլանյանի անվան դրամատիկական թատրոնում «Զավեշտալի կատակերգություն հյուրանոցում» է տեղի ունենալու՝ խորհրդականի, սիրուհու եւ դիակի մասնակցությամբ:
Տոմսերի արժեքը՝ 1000-2000 դրամ:
***
Նույն ժամին Համազգային թատրոնում կկայանա դերասան, ռեժիսոր, ՀՀ վաստակավոր արտիստ Դավիթ Հակոբյանի ծննդյան 60-ամյակին նվիրված «Փրկության կզղի» ներկայացումը՝ բեմադրված Վիլյամ Սարոյանի «Ուստրեն եւ մարգարիտը» ստեղծագործության հիման վրա:
Այն պատմում է Օքեյ բայ դը Սի քաղաքի մարդկանց մասին:
Տոմսերի արժեքը՝ 1000-2000 դրամ:
***
Ենոքավանում գտնվող Yell Extreme Park-ը շաբաթ եւ կիրակի օրերին կախարդական կերպով նշելու է իր ծնունդը՝ տարատեսակ խաղերով, վրանների մեջ գիշերելով, բացօթյա փարթիով՝ Dj-ների եւ տարբեր երաժշտական խմբերի մասնակցությամբ:
Մանրամասներին եւ գնացուցակին ծանոթացեք այստեղ:
ԿԻՐԱԿԻ, ՀՈՒԼԻՍԻ 22
Կիրակի օրվա հիմնական իրադարձությունը Ձմերուկի փառատոնն է, որն արդեն 6-րդ անգամ կանցկացվի Կարապի լճում:
Փառատոնի մեկնարկը կտրվի ժամը 18:00-ին շքերթ-դիմակահանդեսով, որին կհաջորդեն բացման արարողությունը, հյուրասիրությունը, խաղերն ու ուրախ մրցույթները:
***
Ժամը 19:30 Գոյ թատրոնում Հայ աճպարարների միության անդամները իրական-մոգական երեկոն են ապահովելու՝ նորովի ներկայացնելով աճպարարների հնարքները:
Տոմսերի արժեքը՝ 2000-3000 դրամ:
***
Եթե պատրաստ եք կիրակի վաղ առավոտյան արթնանալ, կարող եք հետաքրքիր եւ միմյանցից շատ տարբերվող արշավների մասնակցել:
Առաջինը կազմակերպում է Գիտարշավ ակումբը՝ «Լքված Վանքերը» նախագծի շրջանակներում: Ուղեւորվելու եք դեպի Ստեփանավանի տարածաշրջանում գտնվող Հնեվանքը:
Մասնակցության արժեքը՝ 6500 դրամ, իսկ մանրամասներին կարող եք ծանոթանալ այստեղ:
Մյուս արշավը հնարավորություն կտա ուղեւորվել դեպի Ջավախքի լեռներ եւ բարձրանալ Խենթասար լեռը (3046 մետր):
Մասնակցության արժեքը կազմում է 6500 դրամ, բոլոր մանրամասներն այստեղ են:
Աննա Բուբուշյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: