ՄԱԿ-ի բնակչության հիմնադրամի գործադիր ներկայացուցիչ Ծովինար Հարությունյանը շնորհավորել է բոլոր ներկաներին Բարության միջազգային օրվա կապակցությամբ:
«Նոյեմբերի 13-ին բազմաթիվ երկրներ նշում են Բարության համաշխարհային օրը: Ուրախ եմ, որ այս գեղեցիկ մրցույթի արդյունքները Մեդիամաքսի հետ որոշեցինք ամփոփել հենց այս օրը»,-ասել է նա:
Ծովինար Հարությունյանի կարծիքով, եթե օրինակ դեռահասները փորձեն աշխարհի մասին պատկերացում կազմել լրատվամիջոցների կամ սոցիալական ցանցերի միջոցով, ապա այնպիսի տպավորություն կստեղծվի, որ աշխարհը լի է միայն վտանգներով, կոնֆլիկտներով, պատերազմներով:
«Մենք ընտրեցինք բարությունը՝ ցույց տալու համար, որ այս ամենի կողքին կան բարին գործող մարդիկ»,- նշել է ՄԱԿ-ի բնակչության հիմնադրամի գործադիր ներկայացուցիչը:
Ծովինար Հարությունյանը եւ Արա Թադեւոսյանը Լուսանկարը` Մեդիամաքս
Մեդիամաքսի տնօրեն Արա Թադեւոսյանն ասել է, որ ՄԱԿ-ի Բնակչության հիմնադրամի հայաստանյան գրասենյակի հետ ամեն տարի աշնանը մրցույթ կազմակերպելը բարի ավանդույթ է դարձել:
«Ինձ պատահել է այս անհավանական բարի պատմությունը» մրցույթը Մեդիամաքսի եւ ՄԱԿ-ի Բնակչության հիմնադրամի թվով չորրորդ մրցույթն է: 2015 թվականին անցկացվել էր «Իմ աղջիկը», 2016-ին՝ «Իմ կինն իմ ընկերն է», իսկ 2017-ին՝ «Իմ տատիկը, իմ պապիկը» մրցույթը:
Արա Թադեւոսյանը տեղեկացրել է, որ այս տարի մրցույթին ներկայացվել է 136 շարադրություն:
«Չեմ կարծում, որ բարի գործեր անելու համար խրախուսանք է պետք կամ դրամական պարգեւ, բայց, այնուամենայնիվ, հաճելի է, որ կարող ենք ձեր աշխատանքները գնահատականի արժանացնել»,-ասել է նա:
Լուսանկարը` Մեդիամաքս
Մրցույթում հաղթած Տաթեւ Կարապետյանը ստացել է՝ 400 000 ՀՀ դրամ, երկրորդ տեղը զբաղեցրած Լիլիթ Բարսեղյանը՝ 200 000 ՀՀ դրամ, իսկ երրորդ տեղը զբաղեցրած Մարիամ Գրիգորյանը՝ 100 000 ՀՀ դրամ:
Լիլիթ Բարսեղյանն ասել է, որ անձամբ իրեն մոտիվացրել է ոչ թե դրամական պարգեւը, այլ այն հանգամանքը, որ իր պատմության մասին իմանում են շատերը:
Լուսանկարը` Մեդիամաքս
«Նախորդ տարի մասնակցել էի «Իմ տատիկը, իմ պապիկը» մրցույթին եւ հաճույքով ընթերցում էի անչափ հուզիչ պատմությունները: Մեդիամաքսի եւ ՄԱԿ-ի Բնակչության հիմնադրամի այս համատեղ նախաձեռնությունը շատ եմ սիրում, եւ հաճույքով ամեն տարի կմասնակցեմ»,-ասել է նա:
Մարիամ Մանոյան
