Երեւան: Մեդիամամքս: Մինչ ամռան վերջ Մինաս Ավետիսյանի երկու վերականգնված որմնանկարները` «Թել են մանում» եւ «Երկանք», կտեղադրվեն «Զվարթնոց» օդանավակայանի նորակառույց տերմինալում:
Այդ մասին Մեդիամաքսի հետ հարցազրույցում ասել է ՀՀ մշակույթի նախարարության ժամանակակից արվեստի բաժնի ղեկավար Սոնա Հարությունյանը:
Նախագծի ֆինանսական օժանդակությունն է ցուցաբերել Արգենտինայում բնակվող հայազգի ձեռնարկատեր Էդուարդո Էռնեկյանը, որի ընկերությունը ղեկավարում է օդանավակայանը:
«Թել են մանում» որմնանկարի վերականգնման համար Էռնեկյանը 35 մլն դրամ է հատկացրել, իսկ «Երկանք»-ի վերականգնման համար`22 մլն:
«Թել են մանում» որմնանկարը (13,50х4մ) կտեղադրվի նոր ուղեվորային տերմինալի տարածքում, իսկ «Երկանքը» (5,7х3մ)` նախագահական տերմինալում:
«Այս նախագծի շնորհիվ մենք ոչ միայն լուծում ենք որմնանկարների վերականգնման եւ հանրային մատչելիության հարցը, այլեւ ներկայացնում ենք մեր մշակութային ժառանգությունը Հայաստան այցելող զբոսաշրջիկներին եւ հյուրերին», - Մեդիամաքս-ին ասել է Սոնա Հարությունյանը:
Նա նշել է, որ որմնանկարները միշտ եղել են հայկական գեղանկարչության «թույլ տեղը»: «Մենք երբեք չենք ունեցել որմնանկարների մեծ քանակ, մեզ համար դա “ճոխություն” է եղել: Եվ հիմա մենք հնարավորություն ունենք աշխարհին ներկայացնելու այն, ինչ ունենք: Հնարավոր է, դա մեր այցեքարտը դառնա»,- ասել է նա:
Որմնանկարների վերականգնման աշխատանքները կսկսվեն մայիսի 1-ից: «Թել են մանում» աշխատանքը նախատեսված է տեղադրել նոր տերմինալում մինչեւ օգոստոսի 1: Երկու որմնանկարների վերականգնման աշխատանքները, որոնց կմասնակցեն թե տեղացի, թե իտալացի մասնագետները, միաժամանակ կիրականացվեն:
Այս տարվա ընթացքում նախատեսված է Մինասի եւս երկու որմնանկարների վերականգնում` «Գորգ են գործում» եւ «Արմենիա»: «Արմենիա» որմնանկարի վերականգնման պատրաստակամություն են հայտնել Երեւանի քաղաքապետ Կարեն Կարապետյանը եւ քաղաքի գլխավոր ճարտարապետ Միքայել Հասրաթյանը: Այս հարցը մոտ ժամանակներում կքննարկվի եւ կիրականացվի մասնավոր ներդրումների ներգրավվմամբ:
«Արմենիա» որմնանկարը Շիրակի մարզում է գտնվում, Վահրամաբերդ գյուղում: Այն ստեղծվել է Մինասի կողմից 1973 թվականին տեղի Մշակույթի տան պատին: 1988 թվականի երկրաշարժից հետո շենքը գրեթե ամբողջովին ավերվել է, սակայն Մինասի որմնանկարով պատը պահպանվել է: Հետագայում աշխատանքը տեղադրվել է սարկոֆագի մեջ:
Մինասի որմնանկարների մեծ մասը գտնվում է Շիրակի մարզի արդյունաբերական ձեռնարկությունների շենքերում: Երկրաշարժից հետո շենքերը վնասվել են, իսկ այնտեղ պահպանված որմնանկարները անմխիթար վիճակում են:
Մինասի որմնանկարների վերականգնման աշխատանքները սկսվել են 2008 թվականին: Իտալացի մասնագետների ջանքերի շնորհիվ 2009 թվականին վերականգնվել եւ Ջաջուռում Մինասի թանգարանում տեղադրվել է «Թորոս Ռոսլինի ծնունդը» որմնանկարը: 2010 թվականին Մինասի «Հանդիպում» եւ «Խաչքարի մոտ» աշխատանքները վերականգնվել եւ տեղադրվել են ՀՀ կառավարության շենքում:
