Երեւան: Մեդիամաքս: Ամերիկահայ գրող Փիթըր Բալաքյանն իր «Օզոնի հանդես» բանաստեղծությունների շարքի համար արժանացել է ամերիկյան ամենահեղինակավոր՝ Պուլիցերյան մրցանակին:

Այս մրցանակը տրվում է գրականության, լրագրության, երաժշտության եւ թատրոնի ասպարեզներում հասած հաջողության համար։

Բալաքյանի «Օզոնի հանդես» շարքի բանաստեղծություններից մեկը Սիրիայի անապատում Հայոց ցեղասպանության զոհերի մասունքների նկարահանումների մասին է:

Բանաստեղծ, հուշագրող եւ գիտնական Փիթեր Բալաքյանը բանաստեղծությունների յոթ հատորի, չորս գրքի եւ մի քանի համատեղ թարգմանության հեղինակ է։ 1997թ. տպագրված նրա «Ճակատագրի սեւ շունը» (Black Dog of Fate) բեսթսելլերն արժանացել է հուշագրության ասպարեզում «PEN/Albrand» մրցանակի եւ համարվում է ամերիկահայերի երիտասարդ սերնդին սեփական արմատների վերաբացահայտմանն ուղղորդող լավագույն գործերից մեկը։

Բալաքյանի «Այրվող Տիգրիս. Հայոց ցեղասպանությունը եւ Ամերիկայի արձագանքը» (The Burning Tigris: The Armenian Genocide and America’s Response) գիրքը 2005թ. արժանացել է Ռաֆայել Լեմկինի անվան մրցանակի՝ ընդգրկվելով New York Times թերթի բեսթսելերների ցանկում։ Տեր Գրիգորիս Եպիսկոպոս Պալաքյանի «Հայ Գողգողթան» գրքի նրա թարգմանությունը (երջանկահիշատակ Արիս Սեւակի հետ) համեմատվում է Հոլոքոստի վերաբերյալ Էլի Վիզելի եւ Պրիմո Լեւիի հուշագրությունների հետ։

Փիթեր Բալաքյանն ունի ամերիկյան քաղաքակրթության ասպարեզում փիլիսոփայության դոկտորի կոչում (Բրաունի համալսարան) եւ 1980թ. ի վեր դասավանդում է Նյու Յորք նահանգի Քոլգեյթի համալսարանում, որտեղ այժմ անգլերենի ֆակուլտետում հումանիտար գիտությունների պրոֆեսոր է եւ ստեղծագործական գրավոր խոսքի կենտրոնի տնօրենը։