Երեւան: Մեդիամաքս: ՀՀ նախագահ Սերժ Սարգսյանն այսօր ասել է, որ Ադրբեջանը մտացածին պատրվակներ է գտնում ԵԱՀԿ Մինսկի խմբի համանախագահողների առաջարկած սկզբունքների հիման վրա կարգավորումից խուսափելու նպատակով:
Այս մասին նախագահն ասել է ՀՀ Ազգային ժողովում՝ Եվրանեսթ խորհրդարանական վեհաժողովի չորրորդ լիագումար նիստի բացմանը:
«Կարծում եմ՝ անհրաժեշտ է միջազգային հանրության, եվրոպական կառույցների աներկբա գնահատականը այդ երկրի նման գործելակերպին»,- ասել է նախագահը:
Նրա խոսքով՝ Բաքուն հետ է կանգնում արդեն իսկ ձեռք բերված պայմանավորվածություններից եւ փորձում է առաջ մղել պայմանագրի շուրջ բանակցությունների գաղափարը՝ առանց համաձայնության գալու հիմնարար սկզբունքների շուրջ:
«Մի բան պարզ է, որ խնդրի լուծման բանալին գտնվում է ոչ թե Փարիզում, Մոսկվայում կամ Վաշինգտոնում, այլ՝ Բաքվում, Ստեփանակերտում եւ Երեւանում»,- ընդգծել է Սերժ Սարգսյանը:
Նա նաեւ ափսոսանք է հայտնել, որ ադրբեջանական կողմն ընդառաջ չի գնում Հայաստանի կառուցողական երկխոսության հաստատմանն ուղղված քայլերին:
«Ասածիս վկայությունն է հայկական պատվիրակությունների ակտիվ մասնակցությունը Ադրբեջանում կայացած բազմաթիվ միջոցառումներին, ներառյալ՝ 2012թ. Բաքվի լիագումար նիստին»,- հիշեցրել է Սերժ Սարգսյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: