Երեւան: Մեդիամաքս: Մարտի 22-ին Երեւանում կայացել է Media International Service միջազգային ընկերության հայաստանյան մասնաճյուղի շնորհանդեսը:

Media International Service-ի տնօրեն Տիգրան Սաֆարյանը ներկայացրել է ընկերության գործառույթներն ու միջազգային չափանիշներին համապատասխան տեխնոլոգիաները, որոնք կիրառվելու են ընկերության աշխատանքում:

Հայաստանի չորս հեռուստաալիքների՝ Արմենիայի, Շանթի, ԱրմՆյուզի եւ Ա-թիվիի գովազդի բացառիկ վաճառողը ներկայացնելու է գովազդի վաճառքի նպատակաուղղված մոտեցում, համաձայն որի իրականացնելու է ռեյտինգների վաճառք՝  քանակական, սեռային, տարիքային եւ այլ չափման համակարգերով:

«Մինչ այս պահը հեռուստատեսությունը միաժամանակ սեփական հաղորդումներ էր ստեղծում եւ գովազդ վաճառում: Այսուհետ գովազդը կվաճառեն ոլորտի պրոֆեսիոնալները, իսկ հեռուստատեսությունը կզբաղվի ստեղծագործական աշխատանքով, ինչը կնպաստի նաեւ եթերի որակի բարձրացմանը»,- Մեդիամաքս-ին ասել է Արմենիա հեռուստաընկերության գլխավոր տնօրեն Դավիթ Բաբախանյանը:

««Media International Service-ի հետ համագործակցությունից առաջին հերթին ակնկալում եմ ֆինանսական կայունություն եւ գովազդային ոլորտի հավասարակշռություն: Բոլոր զարգացած երկրներում կան նման կազմակերպություններ, որոնք մասնագիտանում են հեռուստաընկերությունների գովազդի վաճառքի ոլորտում», - Մեդիամաքս-ի հետ զրույցում ասել է Շանթ հեռուստաընկերության տնօրեն Արթուր Եզեկյանը:

«Վստահելով գովազդի վաճառքն այս ընկերությանը՝ հաջորդ տարվա հունվարից հեռուստաընկերությունները կունենան պլանավորված գովազդային բյուջեներ, ինչը հնարավորություն կտա ծրագրել նոր նախագծեր»,-ասել է ԱրմՆյուզ հեռուստաընկերության տնօրեն Արտակ Ալեքսանյան:

«Կարծում եմ, որ սա դրական կազդի գովազդային դաշտի վրա՝ հեռուստաընկերություններին օգնելով ստեղծել առավել որակյալ արտադրանք»,-ասել է Ա-թիվի հեռուստաընկերության տնօրեն Վահագն Խաչատրյանը:

Media International Service-ի հայաստանյան մասնաճյուղի աշխատանքը պաշտոնապես կմեկնարկի ապրիլի 1-ից: