Լավրով. Փառուխում իրավիճակի դեէսկալացիայի հետ կապված արդյունքներ կան - Mediamax.am

2988 դիտում

Լավրով. Փառուխում իրավիճակի դեէսկալացիայի հետ կապված արդյունքներ կան



Երեւան։ Մեդիամաքս։ Երեւանում կայացած ասուլիսի ընթացքում ՌԴ արտաքին գործերի նախարար Սերգեյ Լավրովն ասել է, որ Լեռնային Ղարաբաղի Փառուխ գյուղում ստեղծված իրավիճակը «ռուս զինվորականները համարում են իրենց գերակայություններից մեկը»:

«Այնտեղ արդեն կան որոշակի արդյունքներ՝ իրավիճակի դեէսկալացիայի հետ կապված: Մեզ մոտ կա գիտակցություն, որ սահմանազատման սկսվող առարկայական աշխատանքների շրջանակում այս հարցերը դիտարկվելու եւ անպայման լուծվելու են»,- ասել է Սերգեյ Լավրովը:

 

Այս տարվա մարտի 24-ին ադրբեջանական զինված ուժերը ռուսական խաղաղապահ առաքելության պատասխանատվության գոտում խախտել են Լեռնային Ղարաբաղի շփման գիծը՝ ներխուժելով Արցախի Փառուխ գյուղ։

 

Ռուսաստանի պաշտպանության նախարարությունը հայտարարել էր, թե բանակային ստորաբաժանումները հետ քաշելու կոչ է հղել ադրբեջանական կողմին:

 

Մարտի 27-ին ՌԴ պաշտպանության նախարարությունը հաղորդագրություն էր տարածել, թե ադրբեջանական կողմն իր ստորաբաժանումները դուրս է բերել Լեռնային Ղարաբաղի Փառուխ բնակավայրի հատվածից:

 

ՀՀ արտաքին գործերի նախարարությունը, սակայն, հայտարարել էր՝ «ադրբեջանական ստորաբաժանումների ներխուժումը Լեռնային Ղարաբաղում Ռուսաստանի խաղաղապահ զորախմբի պատասխանատվության գոտի շարունակվում է»:

 

 

«Ակնկալում ենք, որ Լեռնային Ղարաբաղում ՌԴ խաղաղապահ զորախումբը կոնկրետ միջոցներ կձեռնարկի խաղաղապահների պատասխանատվության գոտի ադրբեջանական ստորաբաժանումների ներխուժումը դադարեցնելու եւ Ադրբեջանի զինված ուժերը դուրս բերելու համար: Կարեւոր ենք համարում, որ ադրբեջանական ստորաբաժանումների ներխուժման այս ողջ ընթացքում խաղաղապահ զորախմբի գործողությունների պատշաճ քննություն տեղի ունենա եւ տրվեն մի շարք հարցերի պատասխաններ»,- նշված էր ՀՀ ԱԳՆ հաղորդագրության մեջ:

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Մեր ընտրանին