Երեւան: Մեդիամաքս: ՀՀ արտգործնախարար Էդվարդ Նալբանդյանը հայտարարել է, որ միջազգային հանրությունը անհապաղ քայլեր պետք է ձեռնարկի՝ պաշտպանելու Մերձավոր Արեւելքի քրիստոնյաներին, որոնք կարող են դիտարկվել որպես այս տարածաշրջանում անհետացման եզրին հայտնված ամենախոցելի խմբերից մեկը:
Այս մասին Էդվարդ Նալբանդյանն ասել է Ժնեւում՝ ելույթ ունենալով ՄԱԿ-ի «Աջակցություն Մերձավոր Արեւելքում քրիստոնյաների իրավունքներին» խորագրով քննարկմանը։
«Ցավոք, Մերձավոր Արեւելքում այսօր քրիստոնեության գոյությունը լուրջ վտանգի տակ է: Քսանմեկ եգիպտացի ղպտիների գլխատումը եւ Սիրիայում ասորիների դեմ դաժան հարձակումները միայն վերջին դրվագներն են: Բավական է նշել, որ քրիստոնյաների թիվը բնակչության ընդհանուր թվի հարաբերակցությամբ 20-րդ դարասկզբի առավել քան 20%-ից 21-րդ դարասկզբին նվազել է 5%-ից էլ պակաս:
Մերձավոր Արեւելքի քրիստոնյաները կարող են դիտարկվել որպես անհետացման եզրին հայտնված ամենախոցելի խմբերից մեկը՝ այդպիսով պահանջելով անհապաղ գործողություններ՝ նրանց պաշտպանության եւ աջակցության համար»,- ասել է Հայաստանի արտաքին քաղաքական գերատեսչության ղեկավարը։
Նրա խոսքով՝ Իսլամական պետության, «Ալ Նուսրա»-ի եւ ահաբեկչական այլ խմբերի դեմ պայքարը պետք է ընթանա ցեղասպանությունների կանխարգելման համատեքստում։
Էդվարդ Նալբանդյանն ընդգծել է, որ Հայաստանը լիովին աջակցում է ՄԱԿ-ի անվտանգության խորհրդի համապատասխան բանաձեւերի լիակատար կատարմանը:
Նախարարը հիշեցրել է 2014թ. մարտին «Ալ Քաիդա»-ի հետ սերտորեն առնչվող ահաբեկչական խմբավորումների՝ հայաբնակ Քեսաբի վրա հարձակման, Քեսաբի հայկական կրոնական եւ մշակութային ժառանգության, Դեյր Զորի Սրբոց Նահատակաց Հայկական եկեղեցու պղծման մասին:
«Քաղաքակրթության դեմ ուղղված այս ոճիրը աղաղակող հիշեցումն է անցյալում տեղի ունեցած նմանատիպ բարբարոսական արարքների` Բուդդայի բամիանական արձանների, Տիմբուկտուի դամբարանների եւ Նախիջեւանում հայկական միջնադարյան հազարավոր խաչքարերի ոչնչացման դեպքերի, երբ ադրբեջանական կառավարության աչալուրջ հսկողության ներքո հազարավոր հուշարձաններ ոչնչացվեցին»,- ասել է ԱԳ նախարարը՝ կոչ անելով դատապարտել նման քայլերն ամբողջ խստությամբ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: