Երեւան: Մեդիամաքս: ՀՀ պաշտպանության նախարարի առաջին տեղակալ Դավիթ Տոնոյանի գլխավորած պատվիրակությունը հուլիսի 2-3-ին Վիլնյուսում մասնակցել է «Եվրոպական ընդհանուր անվտանգության եւ պաշտպանական քաղաքականությանը» նվիրված սեմինարին:
ՀՀ ՊՆ լրատվական ծառայության հաղորդման համաձայն, միջոցառումը կազմակերպել էր Եվրոպական Միության նախագահությունը ստանձնող Լիտվայի պաշտպանության նախարարությունը՝ ԵՄ Արեւելյան գործընկերության շրջանակներում:
Իր ելույթում Դավիթ Տոնոյանը մի շարք մոտեցումներ է առաջարկել Հայաստանի եւ Եվրամիության միջեւ Արեւելյան գործընկերության շրջանակներում պաշտպանական համագործակցության գոյություն ունեցող հնարավորությունների օգտագործման համար՝ ուղղված, մասնավորապես միջազգային այլ կազմակերպությունների` ՀԱՊԿ-ի, ԵԱՀԿ-ի, ՆԱՏՕ-ի հետ ՀՀ համագործակցության ծրագրերի կրկնության բացառմանը եւ փոխլրացման ապահովմանը:
«Մասնավորապես, հաշվի առնելով, որ, ինչպես սահմանվում է ՀՀ Ազգային անվտանգության ռազմավարությունում, միջազգային եւ տարածաշրջանային անվտանգությանն ուղղված ներգրավման գործընթացներին ՀՀ լիիրավ մասնակցությունը համապատասխանում է ՀՀ շահերին, նշվել է, որ հաջորդ տարի նախաձեռնվելիք պաշտպանության ռազմավարական նոր վերանայման ընթացքում պաշտպանության պլանավորման նկատառումներում ԵՄ-ի հետ համագործակցության դերի հստակեցմանը լրացուցիչ ուշադրություն կհաղորդվի», - նշված է ՀՀ պաշտպանության նախարարության հաղորդակցության մեջ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: