Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:

Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

•    15 ՏԱՐԻ ԱՌԱՋ. 2004 ԹՎԱԿԱՆԻ ՍԵՊՏԵՄԲԵՐԻ 30-ՀՈԿՏԵՄԲԵՐԻ 6

«Հայաստանն ուխտագնացության երկիր է»

Հոկտեմբերի 6-ին բրազիլացի գրող Պաուլո Կոելիոն Երեւանում մասնակցում էր իր ամենահայտնի գրքի՝ «Ալքիմիկոսի» հայերեն հրատարակության շնորհանդեսին:

Գրողի մի քանի հարյուր երկրպագուներ «պաշարել էին» Հայաստանի գրողների միության շենքը:

Պաուլո Կոելիոն՝ Ռոբերտ եւ Բելլա Քոչարյանների հետ

Լուսանկարը` Armenianweekly.com

Իր ելույթում Պաուլո Կոելիոն Հայաստանն անվանել էր «ուխտագնացության երկիր»:

•    10 ՏԱՐԻ ԱՌԱՋ. 2009 ԹՎԱԿԱՆԻ ՍԵՊՏԵՄԲԵՐԻ 30-ՀՈԿՏԵՄԲԵՐԻ 6

Գիլանն ու Այոմին Երեւանում են

Deep Purple-ի մենակատար Իէն Գիլանը եւ Black Sabbath-ի կիթառահար Թոնի Այոմիին հոկտեմբերի 1-ին ժամանել էին Երեւան՝ Մեդիամաքսի Armenia Grateful 2 Rock («Հայաստանը շնորհակալ է ռոքին») նախագծի շրջանակում:

Երեւան էին եկել նաեւ Asia եւ Yes ռոք-խմբերի անդամ Ջեֆ Դաունսը, ավստրալիացի լեգենդար թենիսիստ Փեթ Քեշը եւ «Ռոքն օգնում է Հայաստանին» նախագծի հեղինակ, Do Something կազմակերպության գործադիր տնօրեն Ջոն Դին:

Իէն Գիլանը եւ Թոնի Այոմին՝ Երեւանի կոնյակի գործարանում

Լուսանկարը` Մեդիամաքս

Այցի շրջանակում Իէն Գիլանը, Թոնի Այոմիին, Ջեֆ Դաունսը եւ  Ջոն Դին պարգեւատրվել էին Պատվո շքանշաններով՝ «հայ ժողովրդին եւ Հայաստանին ցուցաբերած զգալի եւ շարունակական աջակցության համար»:

Հանձնելով շքանշանները, ՀՀ վարչապետ Տիգրան Սարգսյանը հոկտեմբերի 2-ին հայտարարել էր, որ «այսօր առանձնահատուկ օր է հայ ժողովրդի համար»:

«Մենք հյուրընկալում ենք հանրահայտ մարդկանց, որպեսզի ողջ հայ ժողովրդի անունից հայտնենք մեր երախտագիտությունը: 20 տարի է անցել այն ողբերգական օրերից, սակայն ժողովուրդը մի կողմից մինչ օրս հիշում է այն մարդկային կորուստները, որոնք ապրել է 1988 թվականին, մյուս կողմից` լցված է երախտիքի մեծ զգացմունքով այն մարդկանց հանդեպ, ովքեր օգնության ձեռք են մեկնել այն դժվարին օրերին»,- նշել էր վարչապետը:

Ձախից աջ՝ Ջեֆ Դաունսը, Իէն Գիլանը, Ջոն Դին, Տիգրան Սարգսյանը, Թոնի Այոմին

Լուսանկարը` Մեդիամաքս

«Լինելով այս մարդկանց մեծ երկրպագուն, ես իմ կյանքում երբեք չէի կարող պատկերացնել, որ երբեւէ հնարավորություն կունենամ հանձնել իրենց այս պարգեւները: Այսօր իմ կյանքի ամենաերջանիկ օրերից մեկն է»,- խոստովանել էր Հայաստանի վարչապետը:

Օբամայի հետ զրույցը

Լոս Անջելեսում գտնվելու ընթացքում ՀՀ նախագահ Սերժ Սարգսյանը հոկտեմբերի 5-ին հեռախոսազրույց էր ունեցել ԱՄՆ նախագահ Բարաք Օբամայի հետ:

Բարաք Օբաման իր սատարումն էր հայտնել ՀՀ Նախագահին հայ-թուրքական հարաբերությունների կարգավորման ուղղությամբ գործադրվող ջանքերին եւ վերահաստատել էր ԱՄՆ-ի դիրքորոշումն առ այն, որ հայ-թուրքական հարաբերությունների կարգավորման գործընթացը պետք է ընթանա առանց նախապայմանների եւ չպետք է շաղկապվի Լեռնային Ղարաբաղի հակամարտության կարգավորման գործընթացի հետ:

•    5 ՏԱՐԻ ԱՌԱՋ. 2014 ԹՎԱԿԱՆԻ ՍԵՊՏԵՄԲԵՐԻ 30-ՀՈԿՏԵՄԲԵՐԻ 6

«Հայաստանին դժվար ժամանակներ են սպասում»

Սեպտեմբերի 30-ին Արժույթի միջազգային հիմնադրամի (ԱՄՀ) հայաստանյան առաքելության ղեկավար Մարկ Հորթոնն ասել էր, որ «տարածաշրջանի զարգացումների, պատժամիջոցների եւ աշխարհաքաղաքական դժվարությունների հետեւանքով Հայաստանին դժվարին ժամանակներ են սպասում»:

Նա նշել էր, որ այդ պայմաններում կառուցվածքային բարեփոխումների համար Հայաստանի իշխանությունները պետք է «վճռական գործողություններ կատարեն»:

Մարկ Հորթոնը հանդիպում է ՀՀ նախագահ Սերժ Սարգսյանի հետ

Լուսանկարը` ՀՀ նախագահի մամուլի ծառայություն

Մարկ Հորթոնն ասել էր, որ Հայաստանի կառավարությունը շարունակում է թերակատարել պետական բյուջեով նախատեսված ծախսերը, ինչը բացասական ազդեցություն է ունենում խոշոր կապիտալ ծրագրերի վրա` միաժամանակ նպաստելով տնտեսական աճի դանդաղեցմանը:

Արա Թադեւոսյան