Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:

Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

•    15 ՏԱՐԻ ԱՌԱՋ․ 2004 ԹՎԱԿԱՆԻ ՀՈՒՆԻՍԻ 3-10

Իգդիրի նահանգապետն ընդդեմ Հայկական ԱԷԿ-ի

Հունիսի 7-ին Իգդիրի նահանգապետ Նուրեթին Արասը հանդես էր եկել հայտարարությամբ` Հայկական ատոմակայանի շուտափույթ փակման անհրաժեշտության մասին:

Նուրեթին Արասը հայտնել էր, որ նահանգի իշխանությունները սկսել են ստորագրություններ հավաքել Հայկական ատոմակայանի փակման պահանջի տակ: Նա նշել էր, որ ստորագրահավաքի առաջին իսկ օրը 2 500 ստորագրություններ էր հավաքվել: Իգդիրի նահանգապետն ասում էր, որ Հայկական ատոմակայանի փակման վերաբերյալ պահանջը կներկայացվի Թուրքիայի իշխանություններին:

«Զվարթնոցի» նոր տերմինալը

Հունիսի 7-ին «Զվարթնոց» միջազգային օդանավակայանում կայացել էր նոր ուղեւորային տերմինալի կառուցման մեկնարկի հանդիսավոր արարողությունը:

«Զվարթնոց» օդանավակայանում

 

Արարողությանը հայտարարվել էր, որ նոր տերմինալի մակերեսը կկազմի 18 000 մետր, իսկ շինարարությանն ուղված ներդրումների ծավալը՝ մոտ $‌50 մլն։ Տերմինալի կառուցումը նախատեսվում էր ավարտել երեք փուլով՝ 3-4 տարվա ընթացքում։

•    10 ՏԱՐԻ ԱՌԱՋ․ 2009 ԹՎԱԿԱՆԻ ՀՈՒՆԻՍԻ 3-10

Սանկտ Պետերբուրգում «ճեղքում չկա»

Հայաստանի եւ Ադրբեջանի նախագահներ Սերժ Սարգսյանը եւ Իլհամ Ալիեւը հունիսի 4-ին Սանկտ Պետերբուրգում կայացած բանակցությունների ժամանակ  «ճեղքման» կամ «զգալի առաջընթացի» չեն հասել: 

Այդ մասին հանդիպումից հետո հայտարարել էր ՀՀ ԱԳՆ ղեկավար Էդվարդ Նալբանդյանը:

Սերժ Սարգսյանը եւ Իլհամ Ալիեւը 2009 թվականին

Լուսանկարը` REUTERS

«Չնայած այսօր չի կարելի խոսել ճեղքման կամ զգալի առաջընթացի մասին, կողմերն առաջ են ընթանում եւ պայմանավորվել են շարունակել բանակցությունները»,- ասել էր Նալբանդյանը:

Ադրբեջանի ԱԳՆ ղեկավար Էլմար Մամեդյարովը նշել էր, որ «ճեղքում չի եղել, սակայն առաջխաղացում կա»: Նա հայտարարել էր, որ կողմերը ավելի մեծ ըմբռնումով են մոտենում միմյանց դիրքորոշումներին: 

«Ողջամիտ ժամկետներում»

ԱՄՆ պետքարտուղարի Եվրոպայի եւ Եվրասիայի հարցերով օգնական Ֆիլիպ Գորդոնը հունիսի 9-ին Երեւանում հայտարարել էր, որ «հայ-թուրքական հարաբերությունների կարգավորումը պետք է կայանա ողջամիտ ժամկետներում եւ առանց որեւէ նախապայմանների»: 

Պատասխանելով Մեդիամաքս-ի հարցին՝ Ֆիլիպ Գորդոնը շեշտել էր, որ «հայ-թուրքական երկխոսությունը չպետք է կապվի այլ հարցերի հետ»: Մեկնաբանելով «ողջամիտ ժամկետներ» եզրույթը՝ պետքարտուղարի օգնականը նշել էր, որ կոնկրետ ժամկետները պետք է որոշեն Հայաստանն ու Թուրքիան: 

Ֆիլիպ Գորդոնը եւ Հայաստանում ԱՄՆ դեսպան Մարիա Յովանովիչը

Լուսանկարը` Ֆոտոլուր

«Կողմերը հասկանում են, որ գործընթացը չի կարող անվերջ շարունակվել: Նրանք գիտակցում են առաջ շարժվելու անհրաժեշտությունը»,- ասուլ էր Ֆիլիպ Գորդոնը:

«Քվեարկման որոշակի ձեւ»

Նույն օրը Ֆիլիպ Գորդոնը Երեւանում հայտարարել էր, որ ղարաբաղյան հակամարտության կարգավորման գործընթացում օգտագործվելու է «քվեարկման որոշակի ձեւ, որն արտացոլելու է ժողովրդի կամքը»:

Ամերիկացի դիվանագետը նշել էր, որ կարգավորումը պետք է «հավասարակշռված ձեւով» արտացոլի երեք հիմնական սկզբունքներ` ինքնորոշման իրավունքը, տարածքային ամբողջականությունը եւ ուժի չգործադրումը:

•    5 ՏԱՐԻ ԱՌԱՋ. 2014 ԹՎԱԿԱՆԻ ՀՈՒՆԻՍԻ 3-10

Լեռնային Ղարաբաղի ժողովրդի կարծիքը

Հունիսի 4-ին ՀՀ նախագահ Սերժ Սարգսյանն ասել էր, որ «բոլոր բանակցային ջանքերն ու գործընթացները պետք է հաշվի առնեն հենց Լեռնային Ղարաբաղի ժողովրդի դիրքորոշումն ու կարծիքը»:

Այդ մասին ՀՀ նախագահը հայտարարել էր ԵԱՀԿ գործող նախագահ, Շվեյցարիայի Համադաշնության Նախագահ, արտաքին գործերի դաշնային դեպարտամենտի ղեկավար Դիդիե Բուրկհալտերի հետ բանակցություններից հետո: 

Սերժ Սարգսյանն ու Դիդիե Բուրկհալտերը

Լուսանկարը` Ֆոտոլուր

«Երբ խոսվում է վստահության ամրապնդման միջոցառումների մասին, մենք հստակ նշում ենք, որ դրանց թվում առաջնահերթը Լեռնային Ղարաբաղի ժողովրդի նկատմամբ պատշաճ հարգանքի դրսեւորումն է: Ի վերջո, այս պայքարն ինքնորոշման հիմնարար իրավունքի համար մղվող ազգային-ազատագրական պայքար է, եւ չի կարող լինել լուծում, եթե լիարժեքորեն հաշվի չառնվի այս իրականությունը: Մեր խորին համոզմունքն է, որ արդյունավետ լինելու համար բոլոր բանակցային ջանքերն ու գործընթացները պետք է հաշվի առնեն հենց Լեռնային Ղարաբաղի ժողովրդի դիրքորոշումն ու կարծիքը»,- ասում էր Սերժ Սարգսյանը:

Արա Թադեւոսյան