Երեւան: Մեդիամաքս: Մարդու իրավունքների եվրոպական դատարանը (ՄԻԵԴ) այսօր հրապարակել է «Դողու Փերինչեքն ընդդեմ Շվեյցարիայի» գործով վճիռը, որի համաձայն թուրք քաղաքական գործչին քրեական պատասխանատվության ենթարկելու որոշումը խախտում է Մարդու իրավունքների եվրոպական կոնվենցիայի 10-րդ հոդվածը (արտահայտման ազատություն):

2007թ. մարտին թուրք ազգայնական Դողու Փերինչեքը Շվեյցարիայում դատապարտվել էր Հայոց Ցեղասպանության ժխտման համար: Նա Հայոց ցեղասպանությունն անվանել էր «միջազգային սուտ», ինչի համար «Շվեյցարիա-Հայաստան» ասոցիացիան նրան դատի էր տվել ռասայական խտրականության հոդվածով:

Դատարանի որոշման մեջ ասված է, որ դատավորները պետք է հավասարակշռություն պահպանեին Մարդու իրավունքների եվրոպական կոնվենցիայի 10-րդ եւ 8-րդ հոդվածների միջեւ: 8-րդ հոդվածը վերաբերվում է մասնավոր կյանքը հարգելուն եւ, դատարանի բնորոշմամբ, այն պաշտպանում է զոհերի եւ այսօր ապրող հայերի արժանապատվությունը:

Միաժամանակ, դատարանի որոշման մեջ ասված է.

«Դատարանն ընդգծում է, որ այն լիազորված չի եղել պարզել, թե արդյո՞ք հայ ժողովրդի կոտորածները եւ զանգվածային տեղահանությունը Օսմանյան կայսրությունում կարող է բնորոշվել իբրեւ «ցեղասպանություն», քանի որ, ի տարբերություն միջազգային քրեական դատարանների, նման իրավական որոշումներ կայացնելու լիազորություն չունի»:

Հայաստանը 2014թ. օգոստոսից «Դողու Փերինչեքն ընդդեմ Շվեյցարիայի» գործում ներգրավված էր որպես երրորդ կողմ: Հայաստանի շահերը ՄԻԵԴ-ում պաշտպանում էին փաստաբաններ Ամալ Քլունին եւ Ջեֆրի Ռոբերտսոնը:

2014թ. մարտին Մեդիամաքսը հանգամանորեն անդրադարձել էր «Փերինչեք v. Շվեյցարիա» գործին եւ դրա հնարավոր հետեւանքներին Հայաստանի համար: