«Խոհանոցային օրագրեր»` Մեդիամաքսի նոր խորագիրն է, որտեղ կներկայացնենք այն մարդկանց, ում համար խոհանոցը ամենօրյա հոգսերից կտրվելու եւ ստեղծագործելու մի վայր է: Մեր «հերոսները» պրոֆեսիոնալ խոհարարներ չեն, սակայն կարողանում են լավագույնս ինքնաարտահայտվել խոհանոցում: Նրանք պատմում են խոհանոցում հաստատած իրենց կանոնների, սովորությունների, թուլությունների մասին, ինչպես նաեւ ներկայացնում են հետաքրքիր մի ճաշատեսակ:
Մեր նախագիծը սկսեցինք Գայանե Պողոսյանի խոհանոցից, որը մեր ընկերուհիներից մեկի հարազատ քույրն է, բայց նրա հետ շփվելու առիթ երբեւէ չէինք ունեցել: Հենց ներս մտանք, միանգամից զգացինք «համով բաների» բույրը՝ Գայանեն նախապես լիքը ուտեստներ էր պատրաստել:
Առաջին բլիթը կուտ չի գնում
Ուտեստներ պատրաստելու պրոցեսը միշտ սիրել եմ: Ամենակարեւորն ինձ համար փորձարկումներ անելն է: Համացանցում կամ գրքերում տեղադրված բաղադրատոմսերից համարյա չեմ օգտվում, ինքս եմ ամեն ինչ հորինում:
Պատրաստման ընթացքում համեմունքները միշտ աչքաչափով եմ ավելացնում: Ներքին ինչ-որ զգացմունք կա, որ թույլ չի տալիս սխալվել: Խոհանոցում ես արարում եմ, ճաշ պատրաստելն ինձ համար ստեղծագործ մի պրոցես է:
Առաջին պատրաստածս ճաշատեսակը բորշչն էր, այն դեպքում, որ ինձ միշտ թվում էր, թե այն աշխարհի ամենադժվար պատրաստվողն էր: Մտածում էի, եթե բորշչը ստացվի, ուրեմն ամեն ինչ էլ կկարողանամ պատրաստել: Առաջինը համտեսեց պապաս ու այդպես էլ չհավատաց, որ ես եմ հեղինակը՝ կարծելով, թե մաման է պատրաստել: Հիմա, երբ ամուսնացել եմ ու իմ ընտանիքն ունեմ, հայրս միշտ հիշում է այդ դեպքն ու ամեն անգամ նշում, որ թերագնահատում էր կարողություններս ու միայն հիմա է սկսել հավատալ, որ այն բորշչն իրականում ես էի պատրաստել:
Եթե լավ տրամադրություն ունեմ, ապա ցանկացած ուտեստ ինձ մոտ շատ լավ կստացվի: Ու միշտ ամենաառաջին փորձը լավագույնն է լինում:
Խոհանոցային աշխարհի մասին
Խոհանոցն իմ աշխարհն է ու այստեղ ես ամեն բան սիրում եմ: Չեմ հասկանում այն մարդկանց, որ բողոքում են ճաշ եփելուց, պարզապես պետք չէ վերածել այն «կնիկական» գործի: Ամեն ինչն էլ կարելի է հոգսի ու խնդրի վերածել, բայց չէ որ այս ամենում կարելի է գեղեցկություն տեսնել: Վստահեցնում եմ նաեւ, որ խոհանոցում շատ ժամանակ անցկացնելու հետ մեկտեղ կարելի է հասնել նաեւ խնամված տեսք ունենալ, ինչը եւս շատ կարեւոր է:
Խոհանոցն ու ամենօրյա կյանքը այնքան շատ զուգահեռներ ունեն: Խոհանոցում էլ կարող ես հաղթանակներ ու պարտություններ, վերելքներ ու վայրէջքներ ունենալ:
Լուսանկարը` Մեդիամաքս
Ինձ համար սա հոբի է դարձել: Եթե քո կողքին կան սիրելի մարդիկ, ամուսին, խոհանոցը լավ տարբերակ է նրանց հանդեպ տածած սերն արտահայտելու ու ցուցադրելու համար:
Ի տարբերություն շատերի, նույնիսկ աման լվալու պրոցեսն ինձ համար հաճելի է ու օգտակար: Եթե պետք է երկար մտածել, կամ էլ մեկի հետ հեռախոսով խոսել, դա անում եմ հենց ամանները լվանալիս:
Իհարկե, նախ եւ առաջ, կարեւոր է համը, բայց ոչ պակաս ուշադրություն եմ դարձնում ուտեստի տեսքին եւ մատուցվող սպասքին: Ձեւավորելը իմ տարերքն է: Ինձ համար կարեւոր է ամեն մանրուք՝ սփռոց, անձեռոցիկ, մոմեր, ծաղիկներ:
Ոգեշնչվել, որ ընտանիքի անդամները չթունավորվեն
Ամուսինս շատ է սիրում համեղ ուտել ու ես մեծ սիրով ու հաճույքով նրա համար միշտ նոր ճաշատեսակներ եմ պատրաստում: Նա էլ ամեն օր սպասում է, թե այսօր ինչ եմ հորինելու: Հենց ամուսինս է ինձ ոգեշնչում, որ ամեն օր զարմացնեմ նրան:
Խոհանոց միայն լավ տրամադրությամբ եմ մտնում, անկախ նրանից, թե որքան ծանրաբեռնված է եղել օրս, որովհետեւ գիտեմ՝ մեր տրամադրությունը, միանշանակ, փոխանցվում է ուտելիքին: Ճշմարտություն կա այն առակի մեջ, որ եթե կինը զայրացած մտնի խոհանոց ու ճաշ պատրաստի, ապա ընտանիքի անդամները կթունավորվեն:
Ձեռքի համը
Ամուսինս նույնպես շատ լավ ձեռք ունի ու բացի մսամթերքից, բանջարեղենից պատրաստված ուտեստներն էլ իր մոտ լավ են ստացվում: Այնպես որ, երբեմն նա էլ ինձ է անակնկալներ մատուցում: Իսկ գնումները միասին ենք անում:
Շատ եմ սիրում մամայիս պատրաստած ուտեստները: Նրա պատրաստած հասարակ ձվաձեղն անգամ ուրիշ համ ունի: Երեւի «մամայական» հոգատարությունը փոխանցվում է նաեւ ուտեստներին:
Այսօր պատրաստելու ենք մի ճաշատեսակ, որ ինքս եմ հորինել: Մի օր հյուրընկալու էինք մեր քավորի ընտանիքը ու հենց խանութում մտածեցի, ինչ մթերքներ գնեմ ու խառնեմ իրար: Այս ուտեստին դեռ անուն չեմ մտածել:
Վեց բաժնի համար մեզ պետք է՝
Մեկ հավ
Մայոնեզ
Կարմիր ու սեւ պղպեղ
Աղ
Կարտոֆիլ – 10 հատ
Բուլղարական պղպեղ – 3 հատ
Բրոկոլի
Լոլիկ – 2 հատ
Հոլանդական պանիր
Կանաչի
Հավը նախապես կիսում ենք երկու մասի ու համեմում ենք մայոնեզով, կարմիր ու սեւ պղպեղով, աղով, չամանով: Ըստ ցանկության կարող ենք նաեւ տոմատի մածուկ ավելացնել: 25-30 րոպեով տեղադրում ենք հավը ջեռոցն ու անցնում ենք խավարտին:
Լուսանկարը` Մեդիամաքս
Կարտոֆիլը կլոր-կլոր ու միջին հաստության կտրատում ենք: Համեմում ենք այն աղով ու մոտ հինգ րոպե թողնում ենք կարտոֆիլը ձեթի մեջ: Հետո քամում ենք ձեթն ու շուրջը տեղադրում ենք պղպեղն ու նախապես ձեթի մեջ տապակած բրոկոլին: Տեղադրում ենք ջեռոցի մեջ 15-20 րոպեով: Երբ կարտոֆիլը կարմրում է՝ վրան տեղադրում ենք կլոր-կլոր կտրատած լոլիկն ու քերիչով անցկացրած հոլանդական պանիրը: Կանաչին ավելացնում ենք ըստ ցանկության: Ես ավելացնում եմ մաղադանոս: Հինգ րոպեն ջեռոցում բավարար է, որ հոլանդական պանիրը հալվի: Վերջ, ուտեստը պատրաստ է:
Լենա Գեւորգյան (տեքստ)
Մարիամ Լորեցյան (լուսանկարներ)
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: