Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:
Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:
• 15 ՏԱՐԻ ԱՌԱՋ. 2004 ԹՎԱԿԱՆԻ ԱՊՐԻԼԻ 8-14
«Պղպջակների հեղափոխություն»
Ապրիլի 8-ին ՀՀ նախագահ Ռոբերտ Քոչարյանը հայտարարել էր, որ «Վրաստանի իշխանափոխությունը մեծ ոգեւորություն ու հույսեր է արթնացրել մեր ընդդիմության մոտ»:
ՀՀ նախագահն ասել էր, որ վրաստանյան իրադարձություններից հետո ընդդիմության շարքերում «առաջնորդության համար մրցավազք սկսվեց, որը որոշակի ուղղություն տվեց վերջնագրերին, քանի որ կար նաեւ այն հարցը, թե ով ավելի ակտիվ կլինի եւ ավելի ընդդիմադիր կեցվածք կընդունի»:
«Այդ ամենը հանգեցրեց իրավիճակի, երբ ընդդիմությունը ինքն իրեն դրեց այնպիսի փակուղու մեջ, որից այնպիսի ելք գտնել, որը թույլ կտար փրկել դեմքը: Նրանք ստիպված կլինեն կամ անօրինականության գնալ՝ իմանալով, թե ինչ պատասխան կստանան, կամ էլ նահանջել, ինչն, իրենց կարծիքով, նշանակում է կորցնել դեմքը: Ահա այսպես է ձեւավորվել ագրեսիվ քաղաքական փոքրամասնություն»,- հայտարարել էր Ռոբերտ Քոչարյանը:
Ռոբերտ Քոչարյանը` 2004 թվականին Լուսանկարը` REUTERS
«Գործը հասավ նրան, որ նրանք նույնիսկ սկսեցին քննարկել Հայաստանում իշխանափոխության խորհրդանիշերը՝ վարդը, մեխակը եւ այլն: Ես ուզում եմ ընդդիմությանն առաջարկել խորհրդանիշ, որն, իմ կարծիքով, թե ուղիղ, թե փոխաբերական կերպով ավելի ճիշտ է արտացոլում ներկա իրավիճակը՝ օճառի պղպջակների հեղափոխություն»,- ասել է երկրի ղեկավարը:
Հավաքի ցրումը
Ապրիլի 13-ի վաղ առավոտյան ոստիկանությունը ցրեց ընդդիմության հավաքը, որն անցկացվում էր Բաղրամյան պողոտայում, Ազգային ժողովի եւ ԱՄՆ դեսպանատան շենքերի հարեւանությամբ:
Ժամը 02:00-ին ոստիկանության ուժերը սկսեցին հատուկ գործողություն՝ ցուցարարներին դուրս մղելով պողոտայից: Կիրառվել էին ջրցան մեքենաներ, ազդանշանային ու ձայնային նռնակներ:
Հավաքը ցրելուց հետո իրավապահները ձերբակալություններ էին իրականացրել «Հանրապետություն», «Ազգային միասնություն» եւ Հայաստանի Ժողովրդական կուսակցության գրասենյակներում:
Ոստիկանները ծեծի էին ենթարկել «Հայկական ժամանակ» թերթի թղթակիցներ Հայկ Գեւորգյանին եւ Ավետիս Բաբաջանյանին եւ ռուսաստանյան Առաջին ալիքի օպերատոր Լեւոն Գրիգորյանին, ովքեր լուսաբանում էին Բաղրամյան պողոտայում տեղի ունեցող իրադարձությունները:
Ապրիլի 13-ին «Արդարություն» դաշինքի առաջնորդ Ստեփան Դեմիրճյանը հայտարարել էր, որ ընդդիմության հանրահավաքի ցրումը «աննախադեպ հանցագործություն է հայ ժողովրդի նկատմամբ»:
«Մենք կազմակերպված, ստոր եւ դավադիր ռազմական գործողության վկա դարձանք, որի նպատակն էր կոտրել անօրինական ընտրված նախագահի դեմ ելած ժողովրդի կամքը»,- հայտարարել էր նա:
Լուսանկարը` REUTERS
«Արդարություն» դաշինքի ղեկավարը «բացարձակ սուտ» որակեց ՀՀ ոստիկանության հայտարարությունն այն մասին, որ հանրահավաքի մասնակիցներն իրենց ագրեսիվ էին պահում: Ստեփան Դեմիրճյանը հայտարարել էր, որ ցուցարարների վրա հարձակված ոստիկանության հատուկ նշանակության ուժերը թաքնված են եղել Հայաստանի Ազգային Ժողովի շենքում: Նրա խոսքով՝ պատասխանատվության մի մասն ընկնում է խորհրդարանում մեծամասնություն կազմող իշխող կոալիցիայի եւ անձամբ ԱԺ խոսնակ Արթուր Բաղդասարյանի վրա:
Ազգային-Ժողովրդավարական Միության (ԱԺՄ) ղեկավար Վազգեն Մանուկյանը հայտարարել էր, որ «իշխանությունները գնացին նման քայլի, որովհետեւ շատ լավ հասկանում էին, որ եթե ցուցարարներն ամբողջ գիշեր մնային Բաղրամյանի պողոտայում, վաղը նրանց կմիանար ողջ Երեւանը, ինչն անխուսափելի կդարձներ Ռոբերտ Քոչարյանի հրաժարականը»:
Ապրիլի 14-ին պաշտպանության նախարար, ՀՀ Ազգային անվտանգության խորհրդի քարտուղար Սերժ Սարգսյանը հայտարարել էր, որ «ոստիկանները պարտավոր էին վերականգնել հասարակական կարգը Բաղրամյանի պողոտայում»:
«Չեմ կարծում, որ 1, 2 կամ 4 հազար մարդ իրավունք ունեին կաթվածահարել մեկ միլիոն բնակչությամբ քաղաքի նորմալ գործունեությունը»,- ասել էր Սերժ Սարգսյանը:
Մեկնաբանելով ընդդիմության ներկայացուցիչների հայտարարություններն այն մասին, որ հանրահավաքի մասնակիցները ոչ մի անօրինական բան չէին անում, այլ պարզապես «երգում ու պարում» էին, պաշտպանության նախարարը նշել էր. «Ես չեմ կարծում, որ Բաղրամյան պողոտայի երթեւեկելի մասը նախատեսված է պարելու համար»:
Ապրիլի 14-ին ՀՀ նախագահ Ռոբերտ Քոչարյանը խոսել էր քաղաքական երկխոսության անհրաժեշտության մասին, միեւնույն ժամանակ նշելով, որ անընդունելի է համարում, եթե նման երկխոսության պատրաստակամությունը վերջնագրի բնույթ կրի:
«Այսօր ընդդիմությունն ունի բոլոր հնարավորությունները, որպեսզի վերադառնա նորմալ աշխատանքի դաշտ: Եթե դա տեղի չունենա, իշխանություններն ունեն բավարար իրավական ներուժ՝ ժողովրդին պաշտպանելու եւ անօրինականության դրսեւորումները կանխելու համար»,- շեշտել էր Հայաստանի նախագահը:
• 10 ՏԱՐԻ ԱՌԱՋ. 2009 ԹՎԱԿԱՆԻ ԱՊՐԻԼԻ 8-14
«Ալիեւը պատերազմելու ցանկություն չունի»
Ապրիլի 10-ին ՀՀ նախագահ Սերժ Սարգսյանը համոզմունք էր հայտնել, որ իր ադրբեջանցի պաշտոնակից Իլհամ Ալիեւը պատերազմելու ցանկություն չունի:
Սերժ Սարգսյանն այդ մասին ասել էր՝ մեկնաբանելով միջնորդների հայտարարություններն այն մասին, որ Հայաստանի եւ Ադրբեջանի նախագահները փորձում են ղարաբաղյան կարգավորման հեռանկարներին նայել «միմյանց աչքերով»:
«Երբ ես փորձում եմ խաղաղ գործընթացին նայել իմ ադրբեջանցի պաշտոնակցի աչքերով, շատ լավ ապագա եմ տեսնում Հարավային Կովկասի համար: Համոզված եմ, որ իմ ադրբեջանցի պաշտոնակիցը, լինելով նորմալ մարդ, չի ցանկանում պատերազմել, քանի որ պատերազմն արդեն բազմաթիվ տառապանքներ է բերել մեր ժողովուրդներին: Երբ ես կարգավորման հեռանկարներին նայում եմ ադրբեջանցի պաշտոնակցիս աչքերով, տեսնում եմ լավատեսական պատկեր»,- հայտարարել էր Սերժ Սարգսյանը:
Սերժ Սարգսյանը`2009 թվականի ապրիլի 10-ին Լուսանկարը` Ֆոտոլուր
«Անկեղծ համոզմունք»
Ապրիլի 10-ին Սերժ Սարգսյանը հայտարարել էր Թուրքիայի հետ հարաբերությունների կարգավորման անհրաժեշտության իր «անկեղծ համոզմունքի» մասին:
«Ես անկեղծորեն համոզված եմ, որ մենք պարտավոր ենք կարգավորել հարաբերությունները Թուրքիայի հետ, եւ այդ համոզմունքը իմ մոտ ձեւավորվել էր Հայաստանի նախագահ ընտրվելուց առաջ: Կարծում եմ, որ թուրքական հմուտ դիվանագիտությունը կարող է գնահատել իմ անկեղծության աստիճանը»,- ասել էր Սերժ Սարգսյանը:
Նախագահը նշել էր, որ հայ-թուրքական երկխոսության մեկնարկին նպաստել էին նաեւ մի շարք միջազգային զարգացումներ: Սերժ Սարգսյանը շեշտել էր, որ Հայաստանը շարունակում է պահպանել իր հստակ դիրքորոշումը՝ առանց նախապայմանների Թուրքիայի հետ դիվանագիտական հարաբերություններ հաստատելու անհրաժեշտության մասին:
Սերժ Սարգսյանը`2009 թվականի ապրիլի 10-ին Լուսանկարը` Ֆոտոլուր
«Եթե դուք դա փոխզիջում եք համարում, կարող եք այդպես մտածել: Սակայն ես կոչ եմ անում ձեզ հավատալ մեր բոլոր հայտարարություններին այն մասին, որ Թուրքիայի հետ երկխոսության ընթացքում մենք չենք քննարկում Հայոց ցեղասպանության հարցը եւ ղարաբաղյան կարգավորման գործընթացը»,- հայտարարել էր Հայաստանի նախագահը
Սերժ Սարգսյանը չէր բացառել, որ «մենք կարող ենք սխալվել մեր հաշվարկներում, եւ Թուրքիան կարող է նահանջել եւ հրաժարվել ձեռք բերված պայմանավորվածություններին»:
«Սակայն, վստահ եմ, որ նույնիսկ նման զարգացումների դեպքում մենք այդ իրավիճակից ավելի ուժեղ դուրս կգանք, քանի որ միջազգային հանրությունը համոզվեց առանց նախապայմանների հարաբերություններ հաստատելու մեր պատրաստակամության մեջ»,- ասում էր Սերժ Սարգսյանը:
• 5 ՏԱՐԻ ԱՌԱՋ. 2014 ԹՎԱԿԱՆԻ ԱՊՐԻԼԻ 8-14
Տեր-Պետրոսյանը, Ծառուկյանը ու Հովհաննիսյանը
Ապրիլի 10-ին կայացել էր ՀՀ առաջին նախագահ, Հայ Ազգային Կոնգրես կուսակցության նախագահ Լեւոն Տեր-Պետրոսյանի, «Բարգավաճ Հայաստան» կուսակցության նախագահ Գագիկ Ծառուկյանի եւ «Ժառանգություն» կուսակցության առաջնորդ Րաֆֆի Հովհաննիսյանի հանդիպումը:
Երեք կուսակցությունների համատեղ հաղորդագրության համաձայն, հանդիպման ընթացքում կողմերը «քննարկել էին երկրում ստեղծված նոր քաղաքական իրավիճակում համատեղ քաղաքական օրակարգի եւ գործողությունների ծրագրի ձեւավորման հարցեր»:
Սարգսյանի խոստումը եւ Աբրահամյանի նշանակումը
Ապրիլի 10-ին ՀՀ նախագահ Սերժ Սարգսյանը հայտարարել էր.
Սերժ Սարգսյանը՝ 2014 թվականի ապրիլի 10-ին Լուսանկարը` ՀՀ նախագահի մամուլի ծառայություն
«Ձեր առաջ պաշտոնապես հայտարարում եմ, որ ես՝ Սերժ Սարգսյանը, այլեւս երբեք չեմ առաջադրվելու ՀՀ նախագահի պաշտոնի համար: Եթե վերջնական քննարկումների արդյունքում իմ ցանկությանը չհամապատասխանող ուղի ընտրվի, նկատի ունեմ պառլամենտական կառավարման մոդելը, ապա ես չեմ հավակնի նաեւ վարչապետի պաշտոնին»,- ասել է Սերժ Սարգսյանը` նշելով, որ մեկ մարդն իր կյանքում երկու անգամից ավել չպետք է հավակնի երկրի կառավարման ղեկին:
Ապրիլի 14-ին Սերժ Սարգսյանը կառավարության անդամներին ներկայացրել էր նոր վարչապետ Հովիկ Աբրահամյանին:
Սերժ Սարգսյանը եւ Հովիկ Աբրահամյանը`2014 թվականի ապրիլի 14-ին Լուսանկարը` ՀՀ նախագահի մամուլի ծառայություն
Արա Թադեւոսյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: