Երեւան: Մեդիամաքս: ՀՀ կառավարության ղեկավար Տիգրան Սարգսյանը "Ռոքն օգնում է Հայաստանին" նախագծին աջակցելու համար ՀՀ վարչապետի հուշամեդալով է պարգեւատրել բրիտանացի հայտնի երաժիշտ եւ պրոդյուսեր Թրեվոր Հորնին, ավստարալացի ռեժիսոր Բերնի Զելվիսին եւ լրագրող Քրիստինա Ռովատին:
Yes եւ Buggles խմբերի անդամ Թրեվոր Հորնը Լոնդոնի Sarm Studios-ի սեփականատերն է, որտեղ 2010թ. հոկտեմբերին տեղի ունեցավ Իէն Գիլանի ու Թոնի Այոմիի ստեղծած WhoCares խմբի ձայնագրությունը: WhoCares-ը ստեղծվել է Գյումրիի թիվ 6 երաժշտական դպրոցի վերականգման համար միջոցներ հավաքագրելու նպատակով: Թրեվոր Հորնը ստուդիան տրամադրել էր անվճար:
Բերնի Զելվիսը եւ Քրիստինա Ռովատ իրենց միջոցներով Սիդնեյից ուղեւորվել էին Լոնդոն, որ նկարահանան WhoCares-ի տեսահոլովակը, որը տեղ է գտել նախորդ շաբաթ թողարկված սկավառակի վրա: Նրանք իրենց կատարած աշխատանքի դիմաց որեւէ վարձատրություն չէին ստացել:
Պարգեւատրման խնդրանքով ՀՀ վարչապետին էր դիմել Մեդիամաքս-ը, որը ավստրալական Do Something կազմակերպության հետ համատեղ իրականացնում է “Ռոքն օգնում է Հայաստանին” նախագիծը:
