Երեւան։ Մեդիամաքս։ Վարչապետ Նիկոլ Փաշինյանն այսօր ասել է, որ չի հաջողվել Հայաստան-Ադրբեջան սահմանի Տեղ գյուղի հատվածում սահմանապահների ընթացող տեղակայումն իրագործել առանց սրացումների:

Կառավարության նիստի ընթացքում նա կարեւորել է Եվրամիության հայտարարությունը, որտեղ ընդգծվում է 1991 թվականի սահմանագիծը:

«Խոսքը հայկական ԽՍՀ եւ ադրբեջանական ԽՍՀ միջեւ գոյություն ունեցած վարչական սահմանագծի մասին է, որը 1991 թվականի Ալմա Աթայի հռչակագրով վերածվել է պետական սահմանի:

ԵՄ-ն արձանագրել է, որ այդ սահմանագիծը պետք է հարգվի: Դրանում ընդգծվում է նաեւ այդ սահմանագծից երկու կողմերի ԶՈՒ հետքաշումն ապահով հեռավորության վրա՝ որպես իրադրության կայունության հուսալի երաշխիք:

Հայաստանը պատրաստ է գնալ նման միջոցի Հայաստան-Ադրբեջան 1991 թվականի սահմանային գծի ողջ երկայնքով: Մենք մեր պատրաստակամությունը հայտնում ենք 2021 թվականից, եւ նման գործողությունը բխում է Պրահայի քառակողմ եւ Սոչիի եռակողմ պայմանավորվածությունների տրամաբանությունից»,- ասել է Նիկոլ Փաշինյանը:

Նրա խոսքով՝ նման լուծմանը խոչընդոտում է Ադրբեջանի ապակառուցողական մոտեցումը. «Ադրբեջանը սիստեմատիկ ի ցույց է դնում միջազգային հարթակներում ձեռք բերված պայմանավորվածությունները չկատարելու իր գործելակերպը:

Սակայն ի հեճուկս բոլոր դժվարությունների՝ մենք շարունակում ենք հավատարիմ եւ ներգրավված մնալ տարածաշրջանային բոլոր հարցերը, Լեռնային Ղարաբաղի հիմնախնդիրը, Հայաստան-Ադրբեջան հարաբերությունները բանակցություններով կարգավորելու քաղաքականությանը»:

Նիկոլ Փաշինյանը նշել է նաեւ, որ Հայաստանը պատրաստ է տարածաշրջանային տնտեսական եւ տրանսպորտային կապերի վերաբացմանը՝ նախկինում ՀՀ-ի կողմից բարձրաձայնված սկզբունքների հիման վրա, պատրաստ է նաեւ սահմանների դելիմիտացիային՝ Պրահայի եւ Սոչիի պայմանավորվածությունների հիման վրա: