Երեւան: Մեդիամաքս: Հայ գործարարների ասոցիացիայի նախագահ, «Տաշիր» խմբի նախագահ Սամվել Կարապետյանն այսօր ասել է, որ «անհնար է անտեսել այն վտանգավոր ազդակներն ու միտումները, որոնք վերջին ամիսներին մեծ թափ են հավաքում Հայաստանում»։
«Այսօր տարբեր ուժեր բացահայտ կերպով Հայաստանին մղում են Ռուսաստանից հրաժարվելու եւ պատմական ինքնաոչնչացման քայլին։ Կարեւոր է հենց հիմա կանխել այնպիսի որոշումների ընդունումը, որոնք անխուսափելիորեն կարող են հանգեցնել ծանր հետեւանքների ինչպես Արցախի, այնպես էլ Հայաստանի համար։
Այս առումով, ինչպես եւ նախկինում, կարծում եմ, որ Արցախի ապագայի անվտանգության եւ նրա բնակիչների խաղաղ կյանքի միակ երաշխիքը պատմական այս դժվարին ժամանակաշրջանում Ռուսաստանի միջնորդությունն է խաղաղության համաձայնագրի ստորագրման հարցում։ Հայաստանի իշխանությունները պետք է հավասարակշռված մոտեցում դրսեւորեն, որը անվտանգության ամուր երաշխիքներ կտա եւ կկանխի Արցախի կորուստը։
Չի կարելի հաշվի չառնել նաեւ, որ Ռուսաստանի Դաշնությունն այսօր Հայաստանի ամենամեծ տնտեսական գործընկերն է, ռուս խաղաղապահներն Արցախի անվտանգության երաշխավորն են, մեր երկրներին միավորում են դարավոր գործընկերային, մշակութային եւ հոգեւոր կապեր։ Այդ իսկ պատճառով այժմ, առավել քան երբեւէ, կենսական նշանակություն ունի ճիշտ ընտրություն կատարել եւ պահպանել հայկական Արցախը աշխարհի համար», - ասված է Սամվել Կարապետյանի հայտարարության մեջ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: