Մեդիամաքս-ը շարունակում է «Նորագույն պատմություն» հատուկ նախագիծը` ներկայացնելով 1990 թվականից ի վեր Հայաստանում տեղի ունեցած նշանակալի իրադարձությունները:

Այսօր կպատմենք «Top 10 of Rabiz» նախագծի մասին, որի առաջին մասը լույս տեսավ 1998 թվականին: Այն միավորեց մի խումբ տաղանդավոր մարդկանց` Արթուր Ջանիբեկյանին, Վարդան Զադոյանին, Հայկոյին, Գրիգոր Աղախանյանին, Գարիկ Մարտիրոսյանին եւ հսկայական հաջողություն ունեցավ Հայաստանում:

Վարդան Զադոյան` երբեմն գաղափարները ծնվում էին հենց ստուդիայում

Top 10 of Rabiz-ին երբեք շատ լուրջ չեմ վերաբերվել եւ կարծում եմ, որ դա նախագծի հաջողության պատճառներից մեկն էր:

Գաղափարն առաջացավ Արթուր Ջանիբեկյանի մոտ: Դա եղավ «Նոր հայերի» հին գրասենյակում, որը գտնվում էր Սայաթ-Նովայի պողոտայում: Եթե չեմ սխալվում, Սթինգ էինք լսում, եւ Արթուրն առաջարկեց արտասահմանյան հիթերը հայկական ռաբիզի հետ «համատեղելու» գաղափարը:

Վարդան Զադոյանը:

Լուսանկարը` Վ. Զադոյանի արխիվից:

Առաջին փորձը կատարեցինք «50 տարի» երգի հետ: Նախագծի նախնական գաղափարախոսությունը կայանում էր ռաբիզը «հեգնելու» մեջ, բայց արդյունքում, մեզանից անկախ, մենք, փաստորեն, մեծապես գովազդեցինք ռաբիզը: Ի դեպ, «50 տարի» երգի հեղինակը կտրականապես դեմ էր երգը մեր նախագծում օգտագործելուն, եւ Արթուրը ստիպված էր նրան երկար համոզել:  

Նախագծի մասին որոշումը կայացրեցինք երեքով` Արթուր Ջանիբեկյանը, Գարիկ Մարտիրոսյանը եւ ես: Որոշեցինք նախագծում ընդգրկել Գրիգոր Աղախանյանին: Երգերի ընտրությամբ (ինչպես արտասահմանյան, այնպես էլ հայկական) եւ Հայկոյի հետ համատեղ աշխատանքով հիմնականում ես էի զբաղվում, տեքստերը նույնպես ես էի գրում:  

Top 10 of Rabiz-ի «50 տարի» տեսահոլովակն, իհարկե, վրդովմունք առաջացրեց հասարակության որոշ մասի մոտ: Անկեղծ ասած, այնքան էլ լավ չեմ հասկանում հայտարարություններն այն մասին, որ տեսահոլովակը «չափից դուրս համարձակ» էր 1998 թվականի համար: Նույն տարիներին արտասահմանում նկարահանվում էին բազմաթիվ տեսահոլովակներ, որոնց համեմատ մերը պարզապես անմեղ չարաճճիություն էր: Երեւանում, այո, նման տեսահոլովակներ այն ժամանակ չէին նկարահանում, բայց մեր «50 տարի» հոլովակնը նախեւառաջ արեւմտյան կլիպերի պարոդիա էր, քան կանացի կիսամերկ բարեմասնությունները ցույց տալու ձգտում:

Շուտով Գարիկը, Գրիշան ու ես հասկացանք, որ ստուդիայում պետք է առանձին ձայնագրվենք, քանի որ երբ երեքով միասին էինք լինում, մի քանի րոպե անց սկսվում էր հիստերիկ ծիծաղը, որն հնարավորություն չէր տալիս շարունակել աշխատանքը:

Երբեմն գաղափարները ծնվում էին հենց ստուդիայում`«մաքուր էջից»: Գաղափարի համար կարող էր հիմք ծառայել սովորական անեկդոտը, կամ մեզանից մեկի պատմությունը այս կամ այն իրադարձության  մասին:  

Top 10 of Rabiz-ի առաջին նախագծի ձայնագրության ժամանակ «արտահոսք» էր եղել. «50 տարի» ձայնագրությունը հայտնվել էր «Երիտասարդական» մետրոյի կայարանի մոտ գտնվող վաճառասեղաններին, եւ քաղաքում իրարանցում էր սկսվել. ոչ ոք չէր կարող հասկանալ` ի՞նչ է դա, ո՞վ է դրանով զբաղվում:  

Այն ժամանակ գրագողության դեմ պայքարի մասին խոսք լինել չէր կարող, եւ Արթուր Ջանիբեկյանը ստիպված եղավ մեծ ջանքեր գործադրել խնդիրն արագ լուծելու եւ մեր ձայնագրությունը վաճառասեղաններից հանելու համար:

Իմ կարծիքով, Top 10 of Rabiz նախագծերից ամենահաջողվածները առաջին ու երրորդ ալբոմներն են:

Top 10 of Rabiz III ալբոմի շապիկը:

Top 10 of Rabiz նախագիծը մեզ համար ԿՎՆ-ում երբեմն առաջացող դադարները լրացնելու միջոց էր: Հենց այդ պատճառով ես դեմ էի Top 10 of Rabiz-ի «կենդանի» կատարումներին: Նախագծի գոյության ողջ ընթացքում մենք ընդամենը երկու փոքր համերգ ենք ունեցել:

Top 10 of Rabiz I ալբոմի երգերը.

Հայ եմ ես

Սեւ-սեւ աչեր

Բաց արա

Ֆերգանա

Բում-Բում Աշոտիկ

50 տարի

Տաշ-տուշ

Ձմեռ Պապի

Նամակ-Նամակ

Zoma E!

Կարող եք ներբեռնել այստեղ:

Գրիգոր Աղախանյան` Top 10 of Rabiz-ը  «դատապարտված» էր հաջողության

1997 թվականին ես եւ նախկին կինս դուրս եկանք Երգի պետական թատրոնից:

Իհարկե, մտածում էինք այն մասին, թե ինչով պետք է զբաղվենք եւ հենց այդ ժամանակահատվածում Հայկոն մեզ ծանոթացրեց Արթուր Ջանիբեկյանի, Վարդան Զադոյանի եւ Գարիկ Մարտիրոսյանի հետ: Բավականին շուտ ընկերացանք եւ մի օր, մեր տանը խոսակցություն բացվեց «ռեմիքս» հասկացությունից: Որոշեցինք փորձել նման մի բան ստեղծել:

Անմիջապես որոշվեց, որ երաժշտական պրոդյուսերը կլինի Հայկոն, քանի որ բացի երգիչ եւ կոմպոզիտոր լինելուց, նա նաեւ շատ լավ գործիքավորող էր, աշխատել էր «Նոր Հայերի» հետ, անցել էր ԿՎՆ-ի «դպրոցը»:

Գրիգոր Աղախանյանը:

Լուսանկարը` Մեդիամաքս

Քննարկում էինք, թե ի՞նչ ոճի երաժշտություն օգտագործել ռեմիքսներում եւ Արթուրն ասաց, որ եթե ուզում ենք հաջողության հասնենք, պետք է հնչի ռաբիզը:

Քանի որ Հայկոն ռեստորանում աշխատելու փորձ ուներ եւ շատ լավ ծանոթ էր ռաբիզի ընտրանուն, դա օգնեց մեզ երգերի ընտրության հարցում:

Բավականին բարդ եւ ծավալուն աշխատանք էր՝ որոշել, թե ո՞ր արտասահմանյան հիթը «համահունչ» կլինի տվյալ ռաբիզ երգի հետ, հետաքրքիր ձեւով «միքսել» այդ երգերը: 

Աշխատում էինք Հայկոյի տանը՝ մեծագույն հաճույքով, անկրկնելի լավ ու բարի մթնոլորտում: Լինում էր, որ ժամերով չէինք կարող կենտրոնանալ, անընդմեջ կատակում էինք:

Երգերում հնչող բոլոր կատակները եւ տեքստերը գրվում էին նախապես, սակայն, իհարկե, ընթացքում բազմաթիվ իմպրովիզացիաներ էին լինում: Օգտագործվել էին նաեւ 90-ականներին բնորոշ արտահայտությունները, կատակները, «սլենգային» բառերը: Դա Top 10 of Rabiz-ի հաջողության գրավականներից մեկն էր:

Ձայներիզը վաճառքի հանվեց 1998թ-ի հունվարին: Ասում էին, որ մեկ արկղը վաճառվում էր մի քանի ժամում: Շատ էին նաեւ անօրինական ձայնագրությունները:

Մինչ ձայներիզի պաշտոնապես լույս տեսնելը ռադիոյում հնչել էին «50 տարի» երգի հատվածները եւ արձագանքներից պարզ էր դարձել, որ Top 10 of Rabiz-ը  «դատապարտված» էր հաջողության:

Ի դեպ, «50 տարի» երգի հեղինակը միակն էր, ով վրդովմունքով ընդունեց «միքսած» տարբերակը, քանի որ ժամանակին այդ երգն իր եղբորն էր նվիրել: Հիշում եմ, որ այդ հարցը բավականին երկար էր շտկվում:

Մնացած երգերի հեղինակները եւ կատարողները շատ գոհ էին`Top 10 of Rabiz-ի շնորհիվ նրանց երգերը ճանաչելի դարձան նույնիսկ նրանց համար, ովքեր մինչ այդ  ընդհանրապես ծանոթ չէին ռաբիզ երաժշտությանը:

Top 10 of Rabiz-ում ներկայացված կերպարներից շատերին «մարմնավորում» էր Վարդան Զադոյանը: Նա բացառիկ անձնավորություն է. կարող է արտաբերել ցանկացած հնչյուն, լիներ դա որեւէ արտիստի ձայն, թե, օրինակ, բացվող դռան ճռռոց (ժպտում է):

Առաջին երեք ալբոմներում կանանց պարտիաները կատարում էին Իդա Աղախանյանը եւ Հասմիկ Կարապետյանը:

Ունեցել ենք նաեւ կենդանի կատարումները, սակայն դրանք չէր կարելի համեմատել աուդիո տարբերակի հետ, քանի որ շատ բարդ էր ամբողջապես ներկայացնել այն ամենը, ինչը կար ձայներիզի վրա:

Top 10 of Rabiz II ալբոմի շապիկը:

«50 տարի» երգի տեսահոլովակը որոշակի իմաստով մարտահրավեր հանդիսացավ: Այն տարիների համար այն համարվում էր շատ «բաց»: Սկզբում ցանկանում էին մի փոքր «մեղմացնել» այն, սակայն Արթուր Ջանիբեկյանը չհամաձայնվեց եւ, իհարկե, նա իրավացի էր: Տաղանդավոր եւ յուրահատուկ անձնավորություն լինելով, նա միշտ ունեցել է մի քանի քայլ առաջ նայելու եւ հաջողության գրավականը զգալու ունակությունը: 

Ինչպես հաճախ է լինում, առաջին ալբոմի հաջողությունից հետո որոշեցինք ձայնագրել շարունակությունը: Եվ, իհարկե, երկրորդ ալբոմի լույս տեսնելուց հետո կարծիքներ հնչեցին, որ առաջինը շատ ավելի լավն էր: Սակայն ես կարծում եմ, որ տեխնիկական առումով, վարպետության տեսակետից, երկրորդ մասը շատ ավելի պրոֆեսիոնալ է կատարած:

Top 10 of Rabiz II ալբոմի երգերը.

Գարուն է բացվել

Շատ-շատ սիրում եմ

Պաղ աղբյուրի մոտ

50 տարի (ռեմիքս)

Ջանա

Սթինգ (Կեղծ ընկերներ)

Բալես

Սրտի բանալին

Երեւանի աղջիկներին

Նամակ

Կարող եք ներբեռնել այստեղ:

Երգիչ, նախագծի գործիքավորող եւ երաժշտական պրոդյուսեր Հայկո` կասետի թողարկման առավոտյան քաղաքում կարծես ռումբ պայթած լիներ

Top 10 of Rabiz-ի մտահաղացումը Արթուր Ջանիբեկյանն էր, եւ հենց նա ինձ առաջարկեց մասնակցել նախագծին:

Այդ տարիներին ստուդիա չունեի, աշխատում էինք մեր տանը: Հավաքվում էինք` Գարիկ Մարտիրոսյանը, Վարդան Զադոյանը, Գրիշա Աղախանյանը: Յուրաքանչյուրը հետաքրքիր մտքեր էր առաջարկում, քննարկում էինք երգացանկը, ես էլ ընտրում էի թե դրանցից, որոնք են «միանալու» իրար: Վարդանն ու Գարիկն էլ գրում էին տեքստերը: Բայց նշեմ, որ մեզանից յուրաքանչյուրն էլ մասնակցում էր աշխատանքային պրոցեսի բոլոր փուլերին` Top 10 of Rabiz նախագծում մեծ տեղ ուներ իմպրովիզացիան:

Հայկոն:

Լուսանկարը` Հայկոի արխիվից:

Այն ժամանակ դեռ չգիտեի, թե ինչպես է պետք արագացնել դանդաղ երգերը, ու երբեմն այնքան էի համոզում տղաներին, որ երգը վատն է ու պետք չէ այն ընտրել, որ ի վերջո համաձայնվում էին:

Աշխատանքի ընթացքում անդադար ծիծաղում էինք, հումորը երաժշտությանը գերազանցում էր: Կարծում եմ, Top 10 of Rabiz-ը ոչ միայն հումորային, այլեւ երգիծային նախագիծ էր:

Շատ էինք ծիծաղում նաեւ երգերի վերջավորությունների վրա, որովհետեւ երբեմն «ալարում էի» գործերը լավ ավարտել: Մի կերպ ավարտում էի միքսերը ու տղաներին սուրճ կամ թեյ էի առաջարկում: Եթե Top 10 of Rabiz-ի երգերը ուշադիր լսեք, կզգաք թեյ ու սուրճ խմելու պահերը (ժպտում է):

Սկզբում այն երգիչներն, ում երգերը ընտրում էինք նախագծի համար, լավ չէին ընդունում այդ փաստը, որովհետեւ նախագծի էությունը չէին ընկալում: Հետո, երբ թողարկվեց առաջին ալբոմը, եւ ողջ քաղաքի ավտոմեքենաներում Top 10 of Rabiz-ն էր հնչում, արդեն հենց երգիչներն էին դիմում մեզ, խնդրում էին, որ իրենց երգերն էլ միքսենք:

Հանդիսատեսի արձագանքը իրոք շոկային էր: Կասետի թողարկման առավոտյան քաղաքում կարծես ռումբ պայթած լիներ: Չեմ տեսել որեւէ այլ ալբոմ, որը հայկական շուկայում նման «բում» առաջացներ: Մարդիկ անգամ սկսել էին առօրյայում Top 10 of Rabiz-ի արտահայտությունները օգտագործել:

Top 10 of Rabiz-ի հաջողության գրավականը լավ գաղափարն էր, նաեւ անկեղծությունն ու խիզախությունը: Նախագծի ստեղծմանը մասնակցած բոլոր մարդկանց հետ անդամների մտերիմ ընկերներ ենք մնացել:

Top 10 of Rabiz III ալբոմի երգերը.

Անկախ Հայաստան

Քեֆ ենք անում

Մեր Լեննական սիրուն քաղաք

Եթե գար այն ժամանակ

Ջեյմս Բրաուն, Մենակ մարդը

Ո՞վ է նա

Հորս, Մորս ռեգի

Համբո N 5

Աղաչում եմ

Կարող եք ներբեռնել այստեղ:

Նախագծի վրա աշխատել են` Աննա Բուբուշյանը, Լենա Գեւորգյանը, Արամ Մակարյանը, Արա Թադեւոսյանը, Լիլիթ Բաբայանը, Կարինե Պետրոսյանը: