Երեւան: Մեդիամաքս: ԵՄ արտաքին գործերի եւ անվտանգության քաղաքականության Բարձր ներկայացուցչի խոսնակը հայտարարել է, որ «ներկայում տեղի է ունենում Ղարաբաղի հայերի զանգվածային գաղթ՝ սեպտեմբերի 19-ից 20-ը Ադրբեջանի ռազմական գործողության եւ Լաչինի միջանցքի նախորդ ամիսների շրջափակման հետեւանքով»։
«Մարդիկ լքում են իրենց տները Լեռնային Ղարաբաղում եւ ապաստան գտնում Հայաստանում։ Անհետաձգելի է շարունակական անխոչընդոտ մարդասիրական աջակցություն ցուցաբերել նրանց, ովքեր դեռ կարիքի մեջ են Ղարաբաղում, ինչպես նաև նրանց, ովքեր հեռացել են։ Եվրամիությունը աջակցում է Կարմիր Խաչի Միջազգային Կոմիտեի (ԿԽՄԿ) աշխատանքին:
Եվրահանձնաժողովը հայտարարել է 5 միլիոն եվրոյի չափով մարդասիրական օգնության լրացուցիչ փաթեթի մասին՝ օգնելու Լեռնային Ղարաբաղից Հայաստան տեղահանվածներին եւ Ղարաբաղում խոցելի իրավիճակում հայտնվածներին: ԵՄ-ն և նրա անդամ երկրները պատրաստ են լրացուցիչ մարդասիրական օգնություն տրամադրել։
Ադրբեջանը պատասխանատվություն է կրում Ղարաբաղի հայերի իրավունքները և անվտանգությունը ապահովելու համար, ներառյալ՝ առանց ահաբեկման և խտրականության իրենց տներում արժանապատիվ ապրելը, ինչպես նաև տեղահանվածների վերադարձի իրավունքը։ Կարեւոր է, որ ՄԱԿ-ի առաքելությունը կարողանա մուտք գործել տարածք առաջիկա օրերի ընթացքում:
Եվրամիությունն ի գիտություն է ընդունել Ադրբեջանի իշխանությունների կողմից հատուկ պորտալի միջոցով հայ բնակիչների գրանցման գործընթացի մեկնարկը։ ԵՄ-ն կշարունակի ուշադիր հետևել զարգացումներին», - ասված է խոսնակի հայտարարության մեջ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: