Երեւան: Մեդիամաքս: Հայաստանի վարչապետ Նիկոլ Փաշինյանն այսօր ասել է, որ «Արցախի խնդիրը գոնե այս փուլում դիվանագիտական լուծում չունի»:
Այսօր վարչապետը ուղիղ եթերում դիմել է ժողովրդին: Մեդիամաքսը ներկայացնում ուղերձի հիմնական դրույթները:
Այսօր խնդիրը դիվանագիտական լուծում չունի
«Բոլոր այն հույսերը, թե պետք է դիվանագիտական լուծում գտնել, այս իրավիճակում պետք է ավարտված համարել», - ասել է Նիկոլ Փաշինյանը:
Նա բացատրել է, որ այսօր ստեղծվել է մի իրավիճակ, երբ «այն, ինչին մենք համաձայն ենք, կամ կարող էինք համաձայն լինել, Ադրբեջանը համաձայն չէ»:
Ավելին, նկատել է Նիկոլ Փաշինյանը, Ալիեւն ասում է, որ «իր համար միակ ընդունելի տարբերակը Արցախի կապիտուլյացիան է»:
Ռուսաստանի հետ հարաբերությունները
Նիկոլ Փաշինյանն ասել է, որ շատ բարձր է գնահատում Ռուսաստանի հետ հարաբերությունները:
«Մենք զգում ենք Ռուսաստանի աջակցությունը՝ որպես Հայաստանի Հանրապետության եւ հայ ժողովրդի ռազմավարական դաշնակից», - ասել է վարչապետը:
Նիկոլ Փաշինյանն ասել է, որ երկու երկրները մշտական հաղորդակցության մեջ են եւ արդյունավետ փոխգործակցում են:
«Ռուսաստանն արել է առավելագույնը եւ շարունակելու է անել, ես որեւէ կասկած չունեմ», - շեշտել է վարչապետը:
Մեր անելիքը
«Մեր անելիքը մեկն է՝ զենք վերցնել ու մինչեւ վերջ պայքարել մեր ժողովրդի իրավունքների համար, որպեսզի վերջում դիվանագիտական եղանակով հասնենք որեւէ ընդունելի տարբերակի, որը վերջնական կլինի», - ասել է Նիկոլ Փաշինյանը:
Նա տեղական կառավարման մարմինների, կուսակցությունների, հասարականան կազմակերպությունների ղեկավարներին կոչ է արել ձեւավորել կամավորական ջոկատներ եւ հանձնել դրանք Զինված ուժերի Գլխավոր շտաբի պետի ենթակայության ներքո:
Իրավիճակն առաջնագծում եւ հակառակորդի կորուստները
Վարչապետն ասել է, որ «առաջնագծում բավականին բարդ ու դժվար իրավիճակ է, ողջ հարավով մարտական գործողություններ են ընթանում»:
Նրա խոսքով, «հակառակորդը մարտի է նետում վերջին ռեզերվները»: «Այո, նրանց ռեսուրսները մեծ են, բայց մեր բանակը աննկարագրելի ծավալի կորուստներ է պատճառում հակառակորդին ու Ադրբեջանը հումանիտար հրադադարի չի համաձայնում նաեւ այս պատճառով, քանի որ ունի 10 հազարին մոտ կորուստներ: Ադրբեջանը վախենում է նաեւ սպանված վարձկանների եւ թուրք զինծառայողների դիակների առկայության փաստերի ի հայտ գալուց», - ասել է Նիկոլ Փաշինյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: