Սեպտեմբերի 27-ին, Արցախի դեմ Ադրբեջանի սանձազերծած ագրեսիայի օրը, Ադրբեջանի պետական սահմանապահ ծառայության YouTube-ի պաշտոնական ալիքում հայտնվեց «Կրակ» երգի այս տեսահոլովակը:

Հոլովակն, ի դեպ, մեկ շաբաթում ընդամենը 7 հազար դիտում է ունեցել:

Հոլովակում ցուցադրված է Ադրբեջանի գրեթե ողջ զինանոցը՝ օդուժ, ԱԹՍ-ներ զրահատեխնիկա եւ այլ: Հավանաբար, Ադրբեջանի պետական սահմանապահ ծառայությունը ենթագիտակցաբար կռահել է, որ շուտով այս տեխնիկայի զգալի մասը խոցվելու է Արցախի զինված ուժերի կողմից եւ որոշել էր դրանց հուշերը պահպանել գոնե տեսահոլովակում։

 

Երգը կատարում են երգիչներ Ջեյհուն Զեյնալովը (Ceyhun Zeynalov) եւ Նարմին Կարիմբայովան (Narmin Karimbayova)-ն՝ Nur խմբի ուղեկցությամբ։

Երգը կոչվում է Atəş, որը թարգմանաբար նշանակում է «կրակ»։ Ադրբեջանը, ասես, կենտրոնացել է կրակի թեմայի վրա, նրանց պաշտոնական կարգախոսը կրկին դրա մասին է՝ «Ադրբեջան՝ կրակի երկիր»։

Հասարակություն | 2020-09-30 15:15:03

Zuck Independent Agency-ն նոր իմաստ է տվել Ադրբեջանի կարգախոսին

Հիմա էլ Ադրբեջանին կրակի «թեմայի մեջ» ակտիվ պահում են Արցախի զինված ուժերը։

Երաժիշտները Atəş երգը կատարում են ռազմական համազգեստով, երգը պարբերաբար ուղեկցվում է հրթիռների արձակման կադրերով, մինչդեռ պարզ չէ, թե ուր են կրակում, քանի որ գործողությունները հիմնականում տեղի են ունենում բաց դաշտերում՝ առանց տեսանելի թշնամու։

 

Նարմին Կարիմբայովան հայտնի է «Ադրբեջանի ձայնը» հեռուստաշոուից։ Նա իր ինստագրամյան էջում այս շաբաթ ուղերձով դիմել է զինվորներին ու նոր երգի շնորհիվ ինքն իրեն հռչակել է այս պատերազմի «հաղթանակի» խորհրդանիշներից մեկը։ Հոլովակի նկարահանման վայրից նրա նկարները վկայում են, որ նկարահանումները տեղի են ունեցել Եվլախում:

 

Կադրերից մեկում էլ զինծառայողները դրոշ են ճոճում ցուցանակի մոտ, որն ազդարարում է, թե մինչեւ Շուշի 110 կիլոմետր է:

Քանի դեռ թշնամին շարունակում է վայելել ոչ թե հոլովակային, այլ իրական կրակը, առաջարկում ենք լսել եւ նայել այսօր Adana Project խմբի ներկայացրած «Զարթիր Լաո» երգի այս տարբերակը՝ պատերազմներին մեր մասնակցության իրական կադրերով։

Ամալի Խաչատրյան