Երեւան: Մեդիամաքս: Հայաստանում Մեծ Բրիտանիայի դեսպանատան վիզաների բաժինն այլեւս չի գործելու:
Այս մասին Մեդիամաքս-ին հայտնել է ՀՀ-ում Մեծ Բրիտանիայի դեսպանատան հաղորդակցության գծող ղեկավար Լիլիթ Քալանթարյանը:
Միացյալ Թագավորության վիզա ստանալու համար ՀՀ քաղաքացիներն այս տարվա ապրիլից պետք է դիմեն մասնավոր ընկերության, որին դեսպանատունը փոխանցել է վիզաների տրամադրման համար թղթաբանությամբ զբաղվելու գործառույթը:
«2014-ի ապրիլից այս տարածաշրջանում Միացյալ Թագավորության վիզաների ընդունման կենտրոնի գործերը վարելու է մեր նոր կոմերցիոն գործընկերը՝ Teleperformance ընկերությունը: Այսինքն` ՄԹ վիզա ստանալու համար այսուհետ ՀՀ քաղաքացիները փաստաթղթերը պետք է ներկայացնեն ոչ թե դեսպանատուն, այլ այդ ընկերության երեւանյան գրասենյակ»,- ասել է դեսպանատան ներկայացուցիչը:
Լիլիթ Քալանթարյանը պարզաբանել է, որ Teleperformance-ը մասնավոր ընկերություն է, որը միջնորդ է «քաղաքացու եւ Մեծ Բրիտանիայի վիզաների բաժնի միջեւ»: Բոլոր դիմումները շարունակելու են ընդունվել Միացյալ Թագավորության Վիզաների և իմիգրացիայի անձնակազմի կողմից, ինչպես դա արվում է ներկայումս:
Նշենք, որ այս նորամուծությունը գործելու է նաեւ Ադրբեջանում եւ Վրաստանում:
Նոր փոփոխության համաձայն, 2014-ի ապրիլից այս տարածաշրջանում վիզայի դիմումների կենտրոնի ծառայություններից օգտվելու համար անհրաժեշտ է վճարել 59 ֆունտ ստերլինգ` ի հավելում վիզայի վճարի:
«Սա գանձվելու է որպես վիզայի հետ կապված ծառայությունների սպասարկման վարձ, իսկ վճարումը կատարվելու է վիզայի վճարի հետ՝ վիզայի դիմումի հանձման համար օր եւ ժամ ստանալու պահին»,- տեղեկացրել է Լիլիթ Քալանթարյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: