Երեւան: Մեդիամաքս: Հայաստանի վարչապետի պաշտոնակատար Նիկոլ Փաշինյանն այսօր ասել է, որ «մենք դատապարտում ենք Բելառուսի եւ Ադրբեջանի գործարքը զինտեխնիկայի մատակարարման մասին»:
Այսօր Երեւանում հանդես գալով մամուլի ասուլիսում, Նիկոլ Փաշինյանն ասել է, որ այդ գործարքը «ուղղված է ընդդեմ Հայաստանի շահերի եւ խաթարում է Հավաքական անվտանգության պայմանագրի կազմակերպության (ՀԱՊԿ) էությունը»:
Անդրադառնալով նախորդ շաբաթ արված իր հայտարարությանը եւ Բելառուսի ԱԳՆ մամուլի քարտուղարի արձագանքին, Նիկոլ Փաշինյանն ասել է, որ «այս հարցում իմ զրուցակիցը Բելառուսի նախագահն է, որից ես արձագանք դեռեւս չեմ ստացել»:
«Ես պարզաբանումներ կպահանջեմ Բելառուսի նախագահից տեղի ունեցածի եւ մի շարք այլ գործընթացների վերաբերյալ: Մենք լռության չենք մատնելու մեր երկրի շահերին առնչվող որեւէ հարց, պաշտպանելու ենք Հայաստանի ազգային շահերը», - ասել է վարչապետի պաշտոնակատարը:
Նա նկատել է, որ եթե դեկտեմբերի 6-ին Սանկտ-Պետերբուրգում կայանալիք հանդիպմանը ՀԱՊԿ անդամները կոնսենսուսի չհասնեն, «մենք կշարունակենք աշխատել այդ ուղղությամբ»:
Նիկոլ Փաշինյանն ասել է, որ ինչպես արդեն ասել է նախկինում, ՀԱՊԿ-ի անդամ-երկրների փոխադարձ պարտավորությունները հստակեցնելու խնդիր կա:
«Մենք մեր դաշնակցային պարտավորությունները լիարժեք կատարում ենք, ինչը, ցավոք, չենք կարող ասել մեր մի շարք գործընկերների մասին: Ուստի անհրաժեշտ է անել այդ հստակեցումները», - ասել է կառավարության ղեկավարը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: