Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:

Այդ բացը լրացնելու ցանկությամբ Մեդիամաքսը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

•    15 ՏԱՐԻ ԱՌԱՋ. 2002 ԹՎԱԿԱՆԻ ՀՈԿՏԵՄԲԵՐԻ 9-15

Հայաստանի եւ Ուկրաինայի չկայացած ռազմական համագործակցությունը

Հոկտեմբերի 10-ին՝ Ուկրաինայի նախագահ Լեոնիդ Կուչմայի Հայաստան կատարած պաշտոնական այցի շրջանակներում երկու երկրների պաշտպանության նախարարությունների միջեւ ստորագրվեց «Ռազմական համագործակցության մասին» համաձայնագիրը:

Լեոնիդ Կուչման եւ Ռոբերտ Քոչարյանը Երեւանում 2002 թվականին

Լուսանկարը` Photolur

Լեոնիդ Կուչման հայտարարել էր, որ այս փաստաթուղթը «առաջին քայլն է ռազմական ոլորտում համագործակցություն սկսելու ճանապարհին»: «Սակայն ես համոզված եմ, որ այն վերջինը չի լինի», - հավելել էր Ուկրաինայի նախագահը:

Իրականում այդ քայլը դարձավ վերջինը. հայ-ուկրաինական ռազմական համագործակցությունն այդպես էլ մնաց թղթի վրա: Փոխարենը վերջին 15 տարվա ընթացքում Ուկրաինան մեծ քանակով զենք եւ ռազմական տեխնիկա վաճառեց Ադրբեջանին:

Գեղամյանը համոզված է, որ կհաղթի

«Ազգային Միաբանություն» կուսակցության առաջնորդ Արտաշես Գեղամյանը հոկտեմբերի 10-ին համոզմունք էր հայտնել, որ կհաղթի 2003 թվականին կայանալիք նախագահական ընտրություններում: Գեղամյանը նշում էր, որ Ռոբերտ Քոչարյանին «լավագույն դեպքում կհաջողվի հավաքել ձայների 15 տոկոսը, որից 10-12 տոկոսը՝ բացառապես վարչական ռեսուրսի շնորհիվ»:

Ելցինը Հայաստանում

Հոկտեմբերի 14-ին Ռոբերտ Քոչարյանի հրավերով Ռուսաստանի առաջին նախագահ Բորիս Ելցինը կնոջ՝ Նատալյա Ելցինայի հետ, վեցօրյա այցով ժամանեց Հայաստան:

Սերժ Սարգսյանը, Բորիս Ելցինը եւ Նաինա Ելցինան Երեւանում 2002 թվականին

Լուսանկարը` Photolur

Այցի շրջանակներում Բորիս Ելցինը այցելեց Ռուսաստանի Դաշնային սահմանապահ ծառայության Արտաշատի սահմանային ջոկատի տեղամաս, որտեղ նրան շնորհեցին «Պատվավոր սահմանապահի» կոչում եւ հանձնեցին սահմանապահի գլխարկ:

•    10 ՏԱՐԻ ԱՌԱՋ. 2007 ԹՎԱԿԱՆԻ ՀՈԿՏԵՄԲԵՐԻ 9-15

«Վստահության եւ կայունության մթնոլորտում»

Ելույթ ունենալով հոկտեմբերի 9-ին հայ-բելգիական գործարար համաժողովում, ՀՀ նախագահ Ռոբերտ Քոչարյանը համոզմունք էր հայտնել, որ 2008 թվականի նախագահական ընտրությունները «կանցնեն վստահության եւ կայունության մթնոլորտում»: Նա հիշեցրել էր, որ 2007 թվականի խորհրդարանական ընտրությունները համապատասխանում էին միջազգային ստանդարտներին: ՀՀ նախագահի խոսքով, այդ ընտրություններում «ընտրողները վստահություն հայտնեցին կառավարության վարած քաղաքականությանը եւ մերժեցին արմատական ուժերի Ազգային Ժողովում ներկայացված լինելու իրավունքը»:

2008 թվականի նախագահական ընտրությունները ոչ միայն չանցան Քոչարյանի նշած մթնոլորտում, այլ հանգեցրեցին անկախացումից ի վեր հասարակության ամենալուրջ պառակտմանը:

•    5 ՏԱՐԻ ԱՌԱՋ. 2012 ԹՎԱԿԱՆԻ ՀՈԿՏԵՄԲԵՐԻ 9-15

Իլհամ Ալիեւը Սաֆարովի եւ «մարդասիրության» մասին

Ադրբեջանի նախագահ Իլհամ Ալիեւն հոկտեմբերի 9-ին ասել էր, որ ճիշտ է համարում Ռամիլ Սաֆարովին ներում շնորհելու մասին իր որոշումը.

«Դա շատ ճիշտ որոշում էր, եւ եթե ես նույնիսկ այդ ժամանակ իմանայի, որ հայերը եւ նրանց հովանավորները նման աղմուկ կբարձրացնեն, միեւնույն է ներում կշնորհեի Ռամիլ Սաֆարովին:

Իլհամ Ալիեւը

Լուսանկարը` REUTERS

Ադրբեջանը հայրենիք է վերադարձրել իր սպային: Ամենագլխավորը դա է: Ինչ էլ չասեն հայերը, դա ինձ բոլորովին չի հետաքրքրում: Ինչ էլ չասեն նրանց հովանավորները,  դա ինձ բոլորովին չի հետաքրքրում, ես նշանակություն չեմ տալիս այդ հայտարարություններին, եւ Ադրբեջանի հասցեին այդ անհիմն մեղադրանքներից եւ ոչ մեկն անպատասխան չի մնացել: Եվրախորհրդարանը, ցավոք, երկրորդ անգամ հակաադրբեջանական բանաձեւ ընդունեց: Ադրբեջանի Միլի Մեջլիսն արժանի պատասխան տվեց նրանց: Եվրոպայի Խորհրդի գլխավոր քարտուղարը մի մարդ է, որը պետք է պաշտպան հանդիսանա մարդասիրության եւ մարդու իրավունքների համար: Նախորդ տարիներին Եվրոպայի Խորհուրդը, հումանիտար սկզբունքների պատրվակով, ստիպում էր մեր պետությանը ներում շնորհել հանցագործություններ գործած մարդկանց: Ռամիլ Սաֆարովը մոտ ինը տարի մնաց կալանքի տակ, այսինքն, նրա ներումը լիովին հիմնավորված է բարոյական, քաղաքական եւ իրավական տեսանկյուններից: Բայց ի՞նչ ենք մենք տեսնում: Մենք կրկին տեսնում ենք երկակի ստանդարտների քաղաքականություն: Ամենայն վստահությամբ ասում եմ, որ եթե հայ սպան սպաներ ադրբեջանցի սպային, երբեք նման աղմուկ չէր լինի», - հայտարարել էր Իլհամ Ալիեւը:

Արա Թադեւոսյան