Աշնանը կբացվի "Զվարթնոց" միջազգային օդանավակայանի նոր տերմինալը, որով կավարտվեն Հայաստանի գլխավոր օդանավակայանի նոր համալիրի շինարարական աշխատանքները:
Մեդիամաքս-ի թղթակիցը այցելել է նոր տերմինալի շինհրապարակ եւ ծանոթացել Հայաստանի գլխավոր օդային դարպասի շինարարության ընթացքին:
Օդանավակայանի կոնցեսիոն կառավարիչ “Արմենիա միջազգային օդանավակայաններ” ՓԲԸ հանրային կապերի պատասխանատու Գեւորգ Աբրահամյանը տեղեկացրեց, որ օդանավակայանի արդիականացման երրորդ եւ վերջին փուլը (2007-2011թթ., ներդրումների ծավալը` $160 մլն) ավարտին կմոտենա ընթացիկ տարվա օգոստոս-սեպտեմբեր ամիսներին, երբ շահագործման կհանձնվի նոր տերմինալը, որն ամբողջությամբ կփոխարինի Երեւանի օդանավակայանի հանրահայտ շրջանաձեւ շենքը:
“Զվարթնոցի” արդիականացման աշխատանքների առաջին փուլը տեւեց 2002-ից 2004-ը, որի ընթացքում նորոգվեց թռիչքուղին, ղեկուղիները, տեղադրվեցին լուսազդանշանային եւ լուսավորության նոր համակարգեր, իսկ երկրորդ փուլի ընթացքում (2004-2007) կառուցվեց նոր ուղեւորային համալիրը, որը պահանջեց շուրջ $84 մլն ներդրումներ:
Նոր տերմինալի նախագծման վրա աշխատում են Արգենտինայից ժամանած ճարտարապետները` իրենց հայ գործընկերների հետ համատեղ: Բուն շինարարական աշխատանքները իրականացնում են 15 տեղական եւ արտասահմանյան ընկերություններ` շուրջ 600 աշխատակիցներով:
Նոր հանրային տերմինալի տարածքը կկազմի 34 հազ. ք.մ., որի դիմացը կլինի երկհարկանի ավտոկայանատեղին` նախատեսված 600 ավտոմեքենաների համար: Ընդ որում, ինչպես ավտոկայանատեղիի, այնպես էլ տերմինալի տանիքները կլինեն յուրահատուկ. առաջինը կլինի խոտածածկ, իսկ երկրորդը` 40%-ով ապակեպատ: Ապակեպատ է նաեւ տերմինալի ողջ դիմային մասը, որի ձեւավորման մեջ օգտագործվել են հայկական դրոշի գույներով ապակիներ` ցրված պատահականության սկզբունքով:
Նոր տերմինալի երկրորդ հարկում կտեղակայվեն ուղեւորների գրանցման 46 կետեր, ինչը ավելի քան 2 անգամ գերազանցում է ներկայիս տերմինալի գրանցման սեղանների քանակը, իսկ առաջինում կլինի դիմավորման նոր ընդարձակ սրահը (ներկայիս դիմավորման սրահը ժամանակավոր բնույթ է կրում):
Գեւորգ Աբրահամյանի հավաստմամբ, օդանավակայանի նոր տերմինալը իրավամբ կարող է համարվել Հայաստանի ամենասեյսմակայուն շինությունը` շնորհիվ նոր համալիրի բոլոր կառույցների շինարարության ընթացքում կիրառվող կապարառետինե կրիչներով մեկուսիչների, որոնք թույլ են տալիս շենքին դիմանալ 9 բալ ուժգնությամբ երկրաշարժին:
Խոսելով օդանավակայանի ներկայիս շենքի հետագա ճակատագրի մասին, Գեւորգ Աբրահամյանն ասաց, որ չնայած օդանավակայանի հին շենքը գեղեցիկ շինություն է, այդուհանդերձ այն չէր համապատասխանում ժամանակակից միջազգային օդանավակայանների պահանջներին եւ որոշվեց այն վերակառուցելու փոխարեն կառուցել բոլորովին նոր տերմինալ: “Զվարթնոցի” հին շենքը կպահպանվի, կնորոգվի եւ կօգտագործվի այլ նպատակներով:
Շինարարական աշխատանքների ավարտից հետո “Զվարթնոց” միջազգային օդանավակայանը կկարողանա սպասարկել տարեկան 3 մլն ուղեւոր` 2 անգամ ավել, քան այն սպասարկել է 2010թ. ընթացքում:
