Երեւան: Մեդիամաքս: Երեւանի քաղաքապետարանի աշխատակազմի բնապահպանության վարչության պետ Ավետ Մարտիրոսյանն այսօր ներկայացրել է 2012 թվականին նախատեսված կանաչապատման աշխատանքների համալիր ծրագիրը:

«Այս տարի մոտ 3 անգամ կավելանան մայրաքաղաքի կանաչ տարածքները: Սա Երեւանի քաղաքապետի որդեգրած սկզբունք է եւ ընդգրկելու է բոլոր վարչական շրջանները: Մենք անելու ենք ամեն ինչ, որպեսզի Երեւանը բոլոր համար դառնա հանգստի հաճելի գոտի», -նշել է վարչության պետը:

Նախատեսված աշխատանքների շրջանակում Երեւան մտնող ավտոճանապարհների ու պողոտաների միջնամասերը, զբոսայգիների, պուրակների եւ այլ կանաչ գոտիների շուրջ 35 հեկտար տարածքով համապատասխան հատվածները կձեւավորվեն նոր սիզամարգերով, 6 հեկտար էլ կընդգրկեն ծաղկային տարածքները: Դրանց մշտական խնամքի ապահովման նպատակով կանցկացվի 27 հազար գծամետր ոռոգման  ցանց:

Մշտադալար ու դեկորատիվ ծառերով եւ թփերով կավելանան մայրաքաղաքի կանաչ գոտիները, այդ թվում նաեւ այգիներն ու պուրակները: ՀՀ մարզերից այդ նպատակով ներկրվել է ավելի քան 19 հազար խմ բուսահող եւ կարմիր ավազ:

«Ընդամենը մեկ տարի անց կանաչապատ տարածքների տարբերությունն ակնհայտ կլինի»,-նշել է Ավետ Մարտիրոսյանը:

Բնապահպանության վարչության պետը ներկայացրել է նաեւ «Շողակաթ» հեռուստաընկերության հարակից պուրակի եւ Մարգարյանի անվան «Մոր եւ մանկան առողջության պահպանման» ԳՀԿ-ի հարակից տարածքի անբարեկարգ եւ բարձիթողի վիճակը վերացնելու, ինչպես նաեւ կանաչ գոտու պահպանման եւ ընդլայնման անհրաժեշտությունից ելնելով մշակված բարեկարգման համալիր ծրագիրը` նախագծային փաստաթղթերով եւ մանրակերտային լուսանկարներով:

Ըստ նախագծի` Գլխավոր պողոտայի Մաշտոցի պողոտա-Եզնիկ Կողբացի հատվածում նախատեսվում է կառուցել սալապատված 2 լայն ճեմուղիներ, որոնք կեզրագծվեն ինչպես գոյություն ունեցող, այնպես էլ նոր` մշտադալար ու դեկորատիվ  ծառաշարերով եւ կանաչ սիզամարգերով: Տարածքի ծաղկապատման, ինչպես նաեւ կանաչ գոտու մշտական խնամքի ապահովման նպատակով կանցկացվի ոռոգման ցանց: Կվերանորոգվեն նաեւ տարածքի միջնամասի կանաչ գոտու եզրաքարերն ու ջրային ավազանները, կտեղադրվեն հարմարավետ նստարաններ: Ծրագրով նախատեսված է նաեւ գիշերային լուսավորության ապահովում:  Ծրագրի ավարտից հետո տարածքի հետագա բարեկարգումը կիրանացնեն ոչ միայն  համապատասխան ծառայությունները, այլեւ կանաչ գոտուն հարակից ոչ ընդհանուր օգտագործման տարածքում տնտեսական գործունեություն իրականացնող անհատներն ու կազմակերպությունները:

«Ընդգծենք, որ այս օրերին ժամանակավոր, թեթեւ կոնստրուկցիաներով տեղադրվող շինությունները չեն ներառում կանաչ գոտին, ավելին`տեղադրման ընթացքում չի հատվել կամ վերատնկվել որեւէ ծառ: Բարեկարգման համալիր ծրագրի ավարտից հետո տարածքն իրավամբ կդառնա հանգստյան հանրային գոտի: Աշխատանքները կմեկնարկեն գարնանը», - հայտնել է քաղաքապետարանի մամուլի ծառայությունը: