Երեւան: Մեդիամաքս: Բրիտանական ֆիլմերի փառատոնն այս տարի Երեւանում կմեկնարկի փետրվարի 22-ին եւ կտեւի մինչեւ մարտի 5-ը:

Բրիտանական խորհրդի հայաստանյան մասնաճյուղի տնօրեն Արեւիկ Սարիբեկյանն այսօր ասել է, որ թվով 12-րդ փառատոնի մեկնարկը կտրվի «Ամառը փետրվարին» ֆիլմով: Այն «Մոսկվա» կինոթատրոնում կցուցադրվի ժամը փետրվարի 22-ին, ժամը 16:00-ին:

Փառատոնի գլխավոր հովանավոր ԱրմենՏել ընկերության գլխավոր տնօրեն Անդրեյ Պյատախինն ասել է, որ ընկերության գործունեության կարգախոսն է «Այսօր եւ այստեղ բարելավվել մարդկանց կյանքը», եւ փառատոնը նույնպես ուղղված է այդ գաղափարի իրականացմանը:

«Փառատոնը բարձրացնում է սահմանափակ հնարավորություններով մարդկանց խնդիրները, հասարակությունում նրանց ինտեգրման հարցերը», - ասել է նա:

Փառատոնին ներկայացված ֆիլմերը, բացի  «Մոսկվա» կինոթատրոնից, կցուցադրվեն «Նաիրի» եւ «Սինեմա Սթար» կինոթատրոններում: Մուտքն ազատ է լինելու:

Բացի ֆիլմերի ցուցադրումից, փառատոնի շրջանակներում կանցկացվեն վարպետության դասընթացներ եւ մրցույթներ: Մասնավորապես, մրցույթների մասնակիցները պետք է նկարահանեն 1-րոպեանոց ֆիլմ եւ ներկայացնեն լուսանկարներ՝ ներառական եւ հաղորդակցության առկա խնդիրների վերաբերյալ:

Մարտի 5-ից փառատոնում ներկայացված ֆիլմերը կցուցադրվեն նաեւ մարզերում, մասնավորապես, Գորիսում, Գյումրիում եւ Գավառում: