Երեւան: Մեդիամաքս: «Ոսկե ծիրան» 10-րդ միջազգային կինոփառատոնի շրջանակներում անցկացվելիք «Ռեժիսորներ առանց սահմանների» տարածաշրջանային ծրագրին մասնակցելու համար ընտրվել է 12 կինոնախագիծ:

Ինչպես տեղեկացնում է Մեդիամաքս-ը, ծրագրի համակարգող Լուսինե Մարտիրոսյանն այսօր ասել է, որ ներկայացված նախագծերը կմրցեն զարգացման երեք դրամաշնորհների համար՝ մեկ 5 000 եւ երկու 3 500-ական եվրոյի չափով:

Բացի այդ, «Ռեժիսորներ առանց սահմանների» ծրագրի շրջանակներում կանցկացվի Հայաստան-Թուրքիա կինոպլատֆորմը, այստեղ $‌10 հազար եւ $‌5 հազար մրցանակների համար կմրցեն 10 կինոնախագծեր:

«Ֆիլմեր առանց սահմանների» ծրագրի շրջանակներում «Մոսկվա» կինոթատրոնում կցուցադրվեն Արեւելյան գործընկերության երկրների 10 ֆիլմեր, այդ թվում՝ «Փարաջանով» ֆիլմը:

«Ոսկե ծիրան» 10-րդ միջազգային կինոփառատոնը կանցկացվի հուլիսի 7-ից 14-ը Երեւանում: