Երեւան: Մեդիամաքս: Արցախից բռնի տեղահանված ընտանիքների վերականգնմանն ուղղված «Թեւեր» ծրագիրն այժմ հասանելի է նաեւ Երեւանում:

Ծրագրի այս փուլին մասնակցում է 69 երեխա եւ 44 ծնող:

Այն իրականացնում է «Մենք ենք մեր սարերը» զարգացման գործակալությունը՝ ֆրանսիական «Սատար Արցախին» միության հովանավորությամբ։

Ծրագիրը ներառում է հոգեբանական, ինտելեկտուալ եւ ֆիզիկական վերականգնման բաղադրիչներ, «որոնք օգնում են տեղահանված երեխաներին եւ նրանց ընտանիքներին հաղթահարել ադապտացման դժվարությունները»։  

Երեւանում «Թեւեր»-ն իրականացվում է «Ինթրա» հոգեկան առողջության կենտրոնի հետ համատեղ:

«Նախնական գնահատումները ցույց են տալիս, որ ծրագրի շահառուների մեծ մասը տագնապայնության բարձր մակարդակ ունի, ուստի նրանց համար մշակվել են հատուկ թերապեւտիկ մոտեցումներ։

Ֆիզիկական վերականգնման բաղադրիչը իրականացվում է Հայաստանի Ֆուտբոլի ֆեդերացիայի ակադեմիայի հետ համագործակցությամբ։ Արցախցի երեխաները երեք առաջարկված մարզաձեւերից ընտրել են լողը։

Առաջիկայում կմեկնարկի նաեւ կրթական բաղադրիչը, որի նպատակն է խթանել 12-18 տարեկան երեխաների անհատական զարգացումը»,- ասվում է հաղորդագրությունում:

«Թեւեր» ծրագրին առ այսօր մասնակցել է 387 երեխա եւ 228 ծնող։