Ապրիլի 4-6-ի համար հայկական արշավական ակումբները բազմաթիվ հետաքրքիր, այդ թվում՝ նոր երթուղներ են առաջարկում:

Դրանց կարող եք ծանոթանալ Մեդիամաքսում:  

Ապրիլի 4-6 (ուրբաթ, շաբաթ, կիրակի)

Armenian Geographic արշավական ակումբ. Նոր ուղղություն / Կարմրաքար լեռ, Մալեւի կիրճ

Ապրիլի 4-6-ն ակումբը Հայաստանի հարավում բացահայտելու է նոր ուղղություն: Արշավն էքսպեդիցիոն է եւ իրականացվելու է առաջին անգամ։

Ուրբաթ օրն առավոտյան Երեւանից ուղեւորվելու եք բարձրալեռնային Լիճք գյուղ։ Երկրորդ օրը՝ նախաճաշից հետո, մեկնելու եք Մալեւ, որը Մեղրիի տարածաշրջանի լքված գյուղերից մեկն է: Այն բնակեցված է եղել մինչեւ 1960-ականները: Ճանապարհին ունենալու եք կանգառ Արաքսի ափին, ինչից հետո գետի ափով կուղեւրովեք Մալեւի կիրճ։ Մալեւից կսկսվի վերելքը Կարմրաքար լեռ (2454 մ):

Երթուղու երկարությունը 17 կմ է, հարաբերական բարձրությունը՝ 1100 մ:

Մանրամասները՝ հղումով:

Ապրիլի 5-6 (հանգստյան օրերն ամբողջությամբ)

4 Peaks Alpine Club մանկապատանեկան լեռնային ակումբ. Գիշերակաց Լաստիվերի քարանձավում

Առաջիկա հանգտյան օրերին ակումբը մեկնում է Տավուշի մարզ՝ առաջարկելով գիշերակացով արշավ Լաստիվերում:

Լուսանկարը` 4 Peaks Alpine Club

Այստեղ միահյսուված են հեքիաթային բնությունը եւ մարդու ձեռքի աշխատանքը: Այն Խաչաղբյուր գետի կիրճում է՝ Ենոքավան գյուղից 3 կմ հեռավորության վրա:

Կիրճում շրջելուց, ջրվեժներով հիանալուց հետո գիշերելու եք քարանձավում, որում կա վառարան եւ այլ անհրաժեշտ պայմաններ:

Երթուղու երկկողմ երկարությունը 8 կմ է, հարաբերական բարձրությունը՝ 400 մ:

Մանրամասները՝ հղումով:

Գիտարշավ ակումբ. Երկօրյա արշավ Թբիլիսի, Կոջոր եւ Բեթանիա

Ապրիլի 5-6-ը «Հայոց բերդերը» նախագծի շրջանակում ակումբը մեկնելու է Թբիլիսի, Կոջորի բերդ եւ Բեթանիայի վանք:

Հանգստյան օրերի ընթացքում նախատեսված են քայլարշավներ դեպի բազմաթիվ հուշարձաններ՝ բերդեր, վանքեր, դղյակներ:

Կոջորը հայ մեծանուն կոմպոզիտոր Արամ Խաչատրյանի ծննդավայրն է:

Քայլարշավի ընդհանուր երկարությունը 10 կմ է։

Մանրամասները՝ հղումով:

Ապրիլի 5 (շաբաթ)

Armenian Geographic արշավական ակումբ. Գլաձորի կիրճով Սպիտակավոր

Ապրիլի 5-ին ակումբն իրականացնելու է արշավ Թեքսարի լեռների լանջերով։

Երթուղին սկսվելու է Վերնաշեն գյուղից: Նեղ ձորերով ու գեղեցիկ արահետներով բարձրանալու եք Սպիտակավոր վանք (14-րդ դար), որտեղ ամփոփված են Գարեգին Նժդեհի մասունքները:

Լուսանկարը` Armenian Geographic

Երթուղու երկարությունը 18 կմ է, հարաբերական բարձրությունը՝ 600 մ:

Մանրամասները՝ հղումով:

Armenian Geographic արշավական ակումբ. Վերելք Խոսրովասար

Նույն օրն ակումբը վերելք է իրականցնելու Խոսրովասար լեռ (1988 մ)։

Այն Արարատի մարզում է, իսկ գագաթին մերձակա հատվածն ընդգրկված է Խոսրովի անտառ պետական արգելոցի տարածքում։

Երթուղու երկարությունը 11 կմ է, հարաբերական բարձրությունը՝ 900 մ:

Մանրամասները՝ հղումով:

ARI / ԱՐԻ արշավական ակումբ. Քայլարշավ Անձավաջրի եւ Զոզոյի կիրճեր

Ապրիլի 5-ին ակումբը մեկնում է Վայոց ձոր՝ բացահայտելու Անձավաջրի եւ Զոզոյի կախարդական կիրճերը։ Ժայռոտ ու անանցանելի թվացող հսկայական պատերը տպավորություն են ստեղծում, թե հայտնվել ես մեկ այլ մոլորակում:

Արշավի ընթացքում կվայելեք վայոցձորյան տեսարաններն ու կբացահայտեք կիրճում թաքնված քարայրները:

Արշավի երկարությունը 9 կմ է, բարդության աստիճանը՝ հեշտ:

Մանրամասները՝ հղումով:

ԱՐԻ Խոխա արշավական ակումբ. 3-6տ. խոխա արշավ Քասախի կիրճում

Կիրակի օրն ակումբը 3-6 տարեկան երեխաների եւ ծնողների հետ մեկնում է Արագածոտնի մարզ՝ բացահայտելու Քասախի կիրճն իր միջնադարյան կառույց Սաղմոսավանքով ու ժայռերով։

Արշավը սկսվելու է Սաղմոսավան գյուղում, ավարտվելու՝ Օհանավանում։

Լուսանկարը` ԱՐԻ Խոխա

Կիրճի ճանապարհն անցնելու է ծաղկած ծառերի մոտով: Պատրաստվե՛ք, գեղեցիկ լուսանկարներ եք ունենալու:

Երթուղու երկարությունը 6 կմ է, բարդության աստիճանը՝ միջին:

Մանրամասները՝ հղումով:

«Խարույկ» արշավական ակումբ. 4 գագաթ Արեգունու լեռներում

Ապրիլի 5-ին ակումբը վերելք է իրականացնելու Արեգունու լեռներում:

Նախատեսված է բարձրանալ 4 գագաթ՝ Արեգին, Կապտասար, Շիկասար, Երիցսար:

Լուսանկարը` «Խարույկ»

Լուսանկարը՝ «Խարույկ»

Երթուղու երկարությունը 18 կմ է, հարաբերական բարձրությունը՝ 650 մ:

Մանրամասները՝ հղումով:

Ապրիլի 6 (կիրակի)

ArmLand արշավական ակումբ. Վերելք Արա լեռ

Կիրակի օրն ակումբն ուղեւորվում է Կոտայքի մարզ՝ վերելք կատարելու Արա լեռ (2605 մ): Ըստ լեգենդի՝ Հայաստանի «պառկած հսկան» կոչվել է հայոց արքա Արա Գեղեցիկի անունով:

Արշավը սկսվելու է լեռան լանջի բնական քարանձավի մեջ գտնվող մատուռից` Ծաղկեվանքից, իսկ գագաթից իջնելու եք լեռան արեւելյան կողմը:

Երթուղու երկարությունը մոտ 10 կմ է, hարաբերական բարձրությունը՝ 600մ:

Մանրամասները՝ հղումով:

Armenian Geographic արշավական ակումբ. Վերելք Դրախտիսար եւ Գոմադրունք

Եթե ուզում եք հայտվել վայոցձորյան դրախտում, ուրեմն միացեք ակումբի այս արշավին դեպի Քարկատարի լեռներ՝ Դրախտիսար եւ Գոմադրունք գագաթներ։

Արշավը սկսվելու է Ռինդ գյուղից։ Օրվա սկզբում բարձրանալու եք Ռինդի վիմափոր եկեղեցի, որը յուրահատուկ կառույց է։ Այն փորված է դժվարամատչելի ժայռի մեջ։ Եկեղեցու կառուցման ստույգ թվականը հայտնի չէ, ենթադրաբար դա եղել է վաղ միջնադարում: Այնուհետեւ ճանապարհը կշարունակվի դեպի Գոմադրունք (2149 մ) եւ Դրախտիսար (2209 մ) լեռներ:

Լուսանկարը` Armenian Geographic

Երթուղու երկարությունը 20 կմ է, հարաբերական բարձրությունը՝ 900 մ:

Մանրամասները՝ հղումով:

Armenian Geographic արշավական ակումբ. Վերելք Երանոս լեռ

Կիրակի օրն ակումբն իրականացնելու է արշավ Երանոսի լեռներով՝ Ազատ գետի հոսանքն ի վար: Այս անգամ Երանոս լեռան գագաթ (1824 մ) վերելք եք կատարելու ամենաերկար ու գեղեցիկ երթուղիներից մեկով:

Ճանապարհին կտեսնեք նաեւ բնության յուրահատուկ հուշարձանը՝ Երանոսի Սֆինքսը:

Երթուղու երկարությունը 26 կմ է, հարաբերական բարձրությունը՝ 1000 մ:

Մանրամասները՝ հղումով:

Armenian Geographic արշավական ակումբ. Հրեշտակների ձոր եւ Գեւորգ Մարզպետունու ամրոց

Կիրակի օրն ակումբը հրավիրում է մասնակցել մշակութային ճանաչողական քայլարշավի Արարատի մարզում:

Ծրագրի սկզբում կուղեւորվեք Ուրցաձոր գյուղ, որտեղից էլ կքայլեք Տափի բերդ (6 կմ)։ Այնուհետեւ քայլարշավը կշարունակվի դեպի Հրեշտակների ձոր (4 կմ):

Մանրամասները՝ հղումով:

Armenian Geographic արշավական ակումբ. Արշավ դեպի Շաղոտ ջրվեժ

Ակումբի կիրակնօրյա մյուս ուղղությունը Շաղոտ ջրվեժն է: Իջեւանի լեռներում գտնվող Շաղոտը Հայաստանի ամենաբարձր գահավիժող ջրվեժներից է:

Լուսանկարը` Armenian Geographic

Արշավը սկսվելու է Տավուշի մարզի Թեղուտ գյուղից, ավարտվելու՝ Հաղարծինում:  

Երթուղու երկարությունը 14 կմ է, հարաբերական բարձրությունը՝ 900 մ:

Մանրամասները՝ հղումով:

Հատիս Տուր. Արշավ Աղջկա բերդ

Ապրիլի 6-ին Հատիս Տուրն ուղեւորվում է Տավուշի մարզ՝ Աղջկա բերդ:

Ժամանակին այն նշանավոր ռազմական կառույց է եղել: Բերդն Իջեւան քաղաքից մոտ 16 կմ հարավ-արեւմուտք է՝ անտառապատ սարի գագաթին:

Մանրամասները՝ հղումով:

«Ճանապարհորդ» արշավախումբ. Վերելք Կարմրակ լեռ

Ապրիլի 6-ին ակումբն առաջին անգամ վերելք կիրականացնի Թեքսարի լեռների Կարմրակ գագաթը (2077 մ)՝ հետաքրքիր քայլարշավային երթուղով:

Այստեղից բացվում են հիասքանչ տեսարաններ. մի կողմում Արփա գետի, մյուսում՝ դրա վտակ Հերհերի կիրճերն են, իսկ դիմացը՝ Թեքսարի, Վարդենիսի, Զանգեզուրի լեռների ու Վայոց սարի ձյունածածկ գագաթները:

Լուսանկարը` «Ճանապարհորդ»

Քայլարշավի երկարությունը 17 կմ է, հարաբերական բարձրությունը՝ 550 մ:

Մանրամասները՝ հղումով:

ARI / ԱՐԻ արշավական ակումբ. Վերելք Գնիշիկ լեռ եւ Արփա պահպանվող տարածք

Այս կիրակի ակումբը մեկնում է Վայոց ձոր՝ բարձրանալու Գնիշիկ լեռ (2509 մ)։ Վերելքը սկսվելու է Խաչիկ գյուղ տանող ճանապարհից, իսկ գագաթից հետո տեսնելու եք Արփա պահպանվող լանդշաֆտը, որտեղից կարող եք բացահայտել Նորավանքը արծվի բարձրությունից։ Եթե հաջողակ լինեք, արշավի ընթացքում կհանդիպեք նաեւ բեզոարյան այծերի եւ քարակաքավների։ Այնպես որ, եթե հեռդիտակներ ունեք, վերցրեք դրանք ձեզ հետ:

Երթուղու երկարությունը 13 կմ է:

Մանրամասները՝ հղումով:

ARI / ԱՐԻ արշավական ակումբ. Քայլարշավ Դեբեդի կիրճում

Ապրիլի 6-ին ակումբը մեկ այլ երթուղի է առաջարկում Լոռվա մարզում: Այստեղ բացահայտելու եք Դեբեդի կիրճի պատմամշակութային ժառանգությունը։

Երթուղին սկսվելու է Օձուն վանական համալիրից: Դրա ընթացքում կայցելեք ժայռերի մեջ թաքնված Հոռոմայր (7-րդ դար) եւ Քոբայր:

Երթուղու երկարությունը 9 կմ է, բարդության աստիճանը՝ հեշտ:

Մանրամասները՝ հղումով:

ԱՐԻ Խոխա արշավական ակումբ. 6-14 տ. խոխա արշավ Տասանորդի լեռներով

Կիրակի օրն ակումբը 6-14 տարեկան երեխաների եւ պատանիների հետ ուղեւորվում է Արարատի մարզ՝ թափառելու Տասանորդի լեռներով։

Լուսանկարը` ԱՐԻ Խոխա

Արշավը սկսվելու է Լանջանիստ գյուղից, որտեղից կքայլեք ձորում գտնվող հին գյուղատեղի՝ տեսնելու 14-րդ դարի Սպիտակ վանք եկեղեցու ավերակները: Տասանորդի լեռները հարուստ են կարմիր ժայռերով:  

Արշավի երկարությունը 9 կմ է, բարդության աստիճանը՝ հեշտ:

Մանրամասները՝ հղումով:

Պատրաստեց Յանա Շախրամանյանը