Օրացույցային գարնան առաջին հանգստյան օրերին արշավական ակումբները ձնառատ երթուղիների լայն ընտրություն են առաջարկում:

Առավել հեշտ կողմնորոշվելու համար Մեդիամաքսն, ինչպես ամեն շաբաթ, դրանք հավաքել է մեկ տեղում:  

Փետրվարի 28-մարտի 2 (ուրբաթ, շաբաթ, կիրակի)

«Խարույկ» արշավական ակումբ. Ձմեռային վերելք Խուստուփ՝ Վերին Վաչագանից

Առաջիկա ուրբաթ արշավական ակումբը կազմակերպում է եռօրյա արշավ, որի նպատակն է վերելք կատարել Խուստուփ լեռ (3201 մ)՝ Վերին Վաչագան գյուղից: Նախատեսված է երկու կանգառ Վայքում եւ Կապանում: Գիշերակացները լինելու են հյուրատանը:

Արշավը միջինից բարդ է եւ դրան մասնակցելու համար պետք է ունենալ ձմեռային վերելքների փորձ ու շատ լավ ֆիզիկական պատրաստություն:

Երթուղու երկարությունը 23 կմ է, հարաբերական բարձրությունը՝ 1800 մ:

Մանրամասները՝ հղումով:

Մարտի 1-2 (հանգստյան օրերն ամբողոջությամբ)

Գիտարշավ ակումբ. Երկօրյա արշավ Գորի եւ Ուփլիսցիխե

Մարտի 1-2-ին Գիտարշավ ակումբը կազմակերպում է երկօրյա արշավ դեպի Գորի քաղաք (Վրաստան), որը 12-րդ դարում հիմնադրել են Անիից գաղթած հայերը։ Այն մշտապես ունեցել է հայկական ներկայություն, իսկ մինչեւ 20-րդ դարի սկիզբը հայերը կազմում էին քաղաքի բնակչության մեծամասնությունը։

Բացի այդ, նախատեսված է այց հնագույն Ուփլիսցիխե քարանձավային քաղաք, Աթենի բերդ եւ Սուրբ Սիոն տաճար (7-րդ դար):

Մանրամասները՝ հղումով:

Մարտի 1 (շաբաթ)

ARI / ԱՐԻ արշավական ակումբ. Քայլարշավ Աղավնավանքում եւ համտես Դիլվադոսում

Մարտի 1-ին ձնածածկ անտառների եւ թեթեւ քայլարշավների սիրահարներին ակումբը հրավիրում է Տավուշի մարզ՝ քայլելու Ախնաբաթի անտառում։ Արշավը սկսվելու է Գետիկի հովտում, որտեղ բացահայտելու եք անտառում թաքնված 12-13 դարում կառուցված Աղավնավանքը:

Արշավի ընթացքում անցնելու եք նաեւ 25 մետր բարձրություն եւ 70-90 մետր տրամագիծ ունեցող 300-400 տարեկան կենու պուրակով:

Լուսանկարը` ARI / ԱՐԻ

Վերջում այցելելու եք Դիլվադոս՝ համտեսելու մրգօղիների լայն տեսականի, որոնք ստանում են հիմնականում վայրի հատապտուղներից եւ մրգերից:

Մանրամասները՝ հղումով:

Համշեն Տուր. Վերելք Թեղենիս լեռ + Թեղենյաց վանք

Այս շաբաթ օրը Համշեն Տուրը նախատեսում է վերելք Թեղենիս լեռ (2851 մ), որը Ծաղկունյաց լեռների ամենաբարձր գագաթն է։ Երթուղին անցնելու է անտառային եւ լեռնային գեղեցիկ արահետներով։ Այցելելու եք նաեւ Թեղենյաց վանք, որի զարդաքանդակներն ու տեղադրությունը շատ յուրահատուկ են: Աղվերանից քայլելու եք Բուժական գյուղ՝ անցնելով հրաշք տեսարաններով:  

Քայլարշավի երկկողմանի երկարությունը մոտ 15 կմ է, հարաբերական բարձրությունը՝ շուրջ 900 մետր:

Մանրամասները՝ հղումով:

Մարտի 2 (կիրակի)

Armenian Geographic արշավական ակումբ. Արշավ Մարգավետի լեռներով

Այս կիրակի ակումբն իրականացնելու է արշավ Մարգավետի լեռներով։

Երթուղին սկսվելու է Դիլիջան-Վանաձոր մայրուղուց, եւ Մարգավետի հարավային լանջերով բարձրանալու եք լեռնաշղթայի կատարային հատված։ Այնուհետեւ կատարային հատվածով քայլելու եք դեպի Ծակուտ լեռ (2284 մ)։ Հաջորդ գագաթը Իշոցն է (2315 մ), որտեղ կարճ դադարից հետո շարունակելու եք ճանապարհը դեպի Խոռական լեռ (2258 մ)։

Լուսանկարը` Armenian Geographic

Վերելքի ընթացքում բացվում է հիանալի տեսարան դեպի Աղստեւի հովիտն ու Փամբակի լեռները։

Երթուղու երկարությունը 14 կմ է, հարաբերական բարձրությունը՝ 900 մ:

Մանրամասները՝ հղումով:

Հատիս Տուր. Մենք 44 տարեկան ենք, տոնական վերելք Հատիս

1981 թվականի մարտի 2-ին ստեղծվել եւ մինչ այժմ գործում է Հատիս Տուրը: Ավանդույթի համաձայն իր տարեդարձն ակումբը նշում է հարազատ Հատիս լեռան գագաթին: Այս կիրակի իրականացվելիք վերելքը նվիրված է Հատիս Տուրի հիմնադիր Մարտին Թաթոսիչին եւ ակումբի հիմնադրման 44-ամյակին։ Հատիս լեռը (2528 մ) Կոտայքի մարզում է: Վերելքին մասնակցությունն անվճար է, բայց պարտադիր է ունենալ 2500 մ + եւ ձմեռային վերելքների փորձ:

Մանրամասները՝ հղումով:

ArmLand արշավական ակումբ. Արշավ Անձավաջրի կիրճում, վերելք Գորշասար եւ Պուտավոր լեռներ

Մարտի 2-ին ArmLand արշավական ակումբն ուղեւորվում է Վայոց Ձորի մարզ։ Այստեղ իրականացվելու է գեղեցիկ քայլարշավ դեպի Անձավաջրի կիրճ, ինչպես նաեւ նախատեսված է վերելք Գորշասար (2234 մ) եւ Պուտավոր (2260 մ) լեռները՝ վայելելու վայոցձորյան տարբերվող գույները։ Սա քիչ հայտնի արշավական ուղղություն է, որը հաստատ կհիացնի գեղեցկությամբ։

Լուսանկարը` ArmLand

Արշավի երկարությունը 13 կմ է, բարդության ասիճանը՝ միջին:

Մանրամասները՝ հղումով:

That Trail արշավական ակումբ. Արտանիշ լեռ

Մարտի 2-ին ակումբն արշավելու է Գեղարքունիքի մարզում՝ վերելք կատարելով Արտանիշ լեռ (2461 մ): Այն Սեւանա լճի արեւմտյան ափին է՝ Շորժա բնակավայրի մոտակայքում։ Արտանիշի գագաթից հրաշալի տեսարան է բացվում դեպի Սեւանա լիճ։

Քայլարշավի երկարությունը 10 կմ է, հարաբերական բարձրությունը՝ 550 մ։

Լուսանկարը` That Trail

Հիշեցնենք, որ այս արշավական ակումբը արշավներ է կազմակերպում բացառապես փոքր՝ 5-7 հոգանոց խմբերի համար:

Մանրամասները՝ հղումով:

Համշեն Տուր. Քայլարշավ Խորանաշատ եւ Տավուշի բերդ

Կիրակի օրը այս ակումբն առաջարկում է տեսնել Տավուշի հրաշալիքներից Խորանաշատն ու Տավուշի (Ցլիկ Ամրամի) բերդը: Ուղեւորությունը նախատեսված է վերջերս վերանորոգված «Սարի ճանապարհով», որը կապում է Ճամբարակն ու Բերդը՝ ապահովելով շատ գեղեցիկ տեսարաններ։

Քայլարշավը դեպի Խորանաշատ վանք սկսվելու է Չինարի գյուղից: Վանքը սահմանի անմիջական հարեւանությամբ է եւ հասանելի է հատուկ թույլտվության դեպքում, որն էլ արշավի մասնակիցներն այդ օրը կունենան։

Քայլարշավի ընդհանուր երկարությունը մոտ 6 կմ է:

Մանրամասները՝ հղումով:

ARI / ԱՐԻ արշավական ակումբ. Վերելք Երախի լեռներ

Երբեւէ եղե՞լ եք Մարս մոլորակում, եթե ոչ, ապա այս արշավը ձեզ համար է:

Այս կիրակի ԱՐԻ-ն մեկնում է Արարատի մարզ՝ բարձրանալու Երախի լեռներ։ Լեռնաշղթան Գեղամա լեռների հարավարեւմտյան ճյուղավորումներից է եւ ունի 16 կմ երկարություն։ Գագաթից անվերջ կարող եք հիանալ Արարատով, Արագածով, Գեղամա լեռնաշղթայով եւ Երանոսով:

Լուսանկարը` ARI / ԱՐԻ

Քայլարշավը սկսվելու է Սիսավանից, ավարտվելու՝ Վեդիում։

Երթուղու երկարությունը 12 կմ է, բարդության աստիճանը՝ հեշտ +:

Մանրամասները՝ հղումով:

ARI / ԱՐԻ Խոխա արշավական ակումբ.  Քաղաքային զբոսանք Երեւանում՝ վիշապաքարերի հետքերով

Նախորդ շաբաթ նախատեսված վիշապաքարերի հետքերով զբոսանքը Երեւանում կիրականացվի այս կիրակի:

6-14 տարեկան խոխեքի հետ ԱՐԻ Խոխան շրջելու է Երեւանում եւ ինտերակտիվ ու ստեղծարար ձեւով պարզելու է վիշապաքարերի ծագումնաբանությունը, կիրառությունը, տեսակները եւ շատ ավելին։

Լուսանկարը` ARI / ԱՐԻ Խոխա

Զբոսանք-բացահայտման ժամանակ երեխաներին կտրամադրվեն լրացուցիչ նյութեր:

Մանրամասները՝ հղումով:  

North Peak լեռնային ակումբ. Վերելք Արտավազ

Կիրակի օրը North Peak լեռնային ակումբը հրավիրում է բոլոր լեռնասերներին կատարելու վերելք Արտավազ լեռ (2929 մ): Այն Կոտայքի մարզում է՝ Փամբակի լեռնաշղթայի գագաթներից: Այստեղից բացվում են հրաշալի տեսարաններ բոլոր ուղղություններով, իսկ պարզ եղանակին երեւում են նույնիսկ Արարատն ու Սեւանա լիճը:

Վերելքը սկսվելու է համանուն գյուղից, ընդհանուր քայլելու եք մոտ 12 կմ՝ հավաքելով 1100 մ հարաբերական բարձրություն:

Լուսանկարը` North Peak

Վերելքը միջինից բարդ է, մասնակցության համար ցանկալի է ունենալ ձմեռային վերելքների փորձ, իսկ լավ ֆիզիկական մարզավիճակը պարտադիր է: Ստուգեք ձմեռային հանդերձանքը արշավին գրանցվելուց առաջ։

Մանրամասները՝ հղումով:

My hiking արշավական ակումբ. Վերելք Վայոցսար լեռ

Մարտի 2-ին ակումբը բարձրանալու է Վայոցսար լեռ (2581 մ), որը Վայոց Ձորի մարզում է՝ Հերհեր գյուղից հյուսիս-արեւմուտք: Լինելով առանձնացված լեռնային դաշտի վրա՝ այն ազդեցիկ տպավորություն է թողնում:

Վայոցսարն ունի հատած կոնի տեսք եւ մոտ 125 մ խորությամբ խառնարան:

Լուսանկարը` Լեւոն Գալստյանի

Երթուղու երկարությունը 10 կմ է, հարաբերական բարձրությունը՝ մոտ 650 մ:

Վերելքը հարմար է նաեւ սկսնակների համար:

Մանրամասները՝ հղումով:

«Խարույկ» արշավական ակումբ. Ձմեռային վերելք Վարդաբլուր (Գայլի ականջներ)

Մարտի 2-ին ակումբն իրականացնելու է վերելք Վայքի լեռնաշղթայի Վարդաբլուր (Գայլի ականջներ, 2452 մ) լեռ: Արշավը սկսվելու է Զեդեա գյուղից: Ճանապարհին վայելելու եք չքնաղ տեսարաններ դեպի Թեքսարի, Վայքի, Քարկատարի լեռներն ու Արարատը:

Քայլարշավի երկարությունը 15 կմ է, հարաբերական բարձրությունը՝ 900 մետր, բարդության աստիճանը՝ միջին:

Մանրամասները՝ հղումով:

Պատրաստեց Յանա Շախրամանյանը