Երեւան: Մեդիամաքս: Այսօր կայացել է ՀՀ կրթության, գիտության, մշակույթի եւ սպորտի նախարարության ենթակայությամբ գործող թանգարանների եւ արգելոց-թանգարանների էլեկտրոնային տոմսերի միասնական ավտոմատացված համակարգի շնորհանդեսը:
ԿԳՄՍՆ-ից հայտնել են, որ համակարգով ներդրվում է տոմսային տնտեսության եւ ֆինանսական հոսքերի կառավարման ժամանակակից գործիքակազմ, որը կապահովի թանգարանային այցելությունների համակարգված կազմակերպումը:
Յուրաքանչյուր քաղաքացի կարող է կայքից ստանալ համապարփակ տեղեկատվություն թանգարանի, գործող ծրագրերի, ցուցադրությունների եւ ընթացիկ միջոցառումների մասին, ինչպես նաեւ էլեկտրոնային հարթակի միջոցով պատվիրել իրեն հետաքրքրող ցուցադրության տոմսը, հնարավորություն կլինի նաեւ գնել մի քանի տոմս միաժամանակ եւ օգտվել զեղչային քաղաքականությունից:
Միջոցառմանը ներկա ԿԳՄՍ նախարար Ժաննա Անդրեասյանը կարեւորել է, որ համակարգի միջոցով թանգարանային գործունեությունը կապվում է զբոսաշրջային քաղաքականության հետ. զբոսաշրջային երթուղիների պլանավորման, փաթեթների ներկայացման տեսանկյունից բոլոր ծառայությունները հասանելի են դառնում մեկ տեղում:
Նախարարը խորհրդանշական է համարել, որ նոր համակարգը կմեկնարկի ՀՀ անկախության օրը՝ սեպտեմբերի 21-ին, Հայաստանի պատմության թանգարանում բացվող «Մայր աստվածություն. Անահիտից Մարիամ» խորագրով ժամանակավոր ցուցադրության տոմսերի վաճառքից:
Նշվում է, որ համակարգի ներդրման արդյունքում թանգարանների տոմսերի գնային քաղաքականությունը որեւէ փոփոխության չի ենթարկվի:
Էլեկտրոնային հարթակի ստեղծման աշխատանքներն իրականացրել է WebEx Technologies ընկերությունը. այսուհետ այցելուները կարող են ձեռք բերել թանգարանային տոմսերն առցանց՝ մուտք գործելով museumsarmenia.am կայք:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: